خراب بيت
_ إنتِ مش هترتاحي غير لما تخربي بيت ابنك، ساعتها بس هترتاحي.
_ ليه؟ وهو أنا لما أبقى زعلانة عليه وعارفة اللي بيحصل معاه أبقى وحشة؟
وبعدين طول ما أنا شايفة فيه غلط بيحصل مش هسكت عليه أبدًا.
_ خليكي في حياتك وهما في حياتهم.
_ البت مش خايفة عليه يا حبة عيني، شايل كل حاجة لوحده وهي مش هاين عليها تساعده بحنية ولو مرة واحدة.
_ ابنك راجل ويقدر يتحمل المسئولية يا كوثر، اطلعي إنتِ منها بس،و بلاش تتدخلي بينهم، إحنا هنرجع تاني ولا إيه؟
_ مالك يا سمير إنت مكبر الموضوع ليه كل ده؟ عشان عايزاها تحس بجوزها شوية وتساعد معاه في مصاريف البيت.
_ مش مكبر الموضوع ولا حاجة، بس دي مسألة شخصية بينهم.
_ وأنا مش غريبة ومش هسيب ابني تايه كده، والهانم مش هاين عليها تساعده.
_ يا ست هم أحرار ببعض، ومش كل شوية أفهمك إن دي حياتهم الشخصية وما ينفعش أي حد يدخل فيها.
_ برضو هتقولي شخصية وأنا بقولك أنا أمه ومن حقي أفكر في مصلحة ابني يا سمير.
كانت ليلى نازلة على السلم، وباب شقة كوثر مفتوح، أول ما شافتها سابت سمير وجريت عليها.
_ ليلى، إنتِ رايحة فين؟
ليلى استغربت أسلوبها معاها، بس ردت بهدوء:
_ رايحة الشغل يا طنط.
_ يعني بتشتغلي أهو والدنيا ماشية معاكي حلو، طب ما تحسي بجوزك، ولا إنتِ إيه؟ مش بتحسي خالص؟
_ ليه بتقولي كده؟ وبعدين هو سيف قال لحضرتك حاجة؟
_ ما قالش حاجة، بس أنا أمه وأحس بيه من غير ما يتكلم، يا بنتي لازم تخلي شوية رحمة في قلبك، مش كده.
_ هو أنا عملت إيه لكل ده؟
_ كل ده ومش عارفة ولا حاسة ولا عاملة نفسك عبيطة؟ طيب يا ستي أنا هقولك بقى، مش حرام عليكي سايبة سيف هو اللي شايل مسئولية البيت لوحده؟ لا وإنتِ كمان عليه.
_ طيب ما ده الطبيعي، سيف هو المسئول عني وعن كل مستلزمات البيت.
_ يا بجاحتك يا شيخة، إنتِ إيه؟ مش بتحسي يعني؟ سايبة الواد شايل الهم، وحضرتك ولا همك، وحاطة إيدك في الميه الباردة.
سمير لاحظ إن الموضوع بيكبر، فقرب منهم.
_ كوثر خشي، أنا عايز أتكلم معاكي في موضوع، وإنتِ يا بنتي روحي شغلك عشان ما تتأخريش.
هزت رأسها بهدوء، وقبل ما تتحرك كانت كوثر مسكتها من إيدها ووقفتها مكانها.
_ مش هتروحي في مكان، أنا لسه ما خلصتش كلامي.
سمير وهو بيجز على سنانه:
_ سيبيها يا كوثر، ولما ترجع ابقي كملي كلامك معاها، كده هتتأخر على شغلها.
