الانسة 3الاخير

الفصل الثالث عشر
“قراءه ممتعه ”
– لا يا ماما مش هنروح معاه احنا مش شحاتين ولا بنقبل صدقه من حد انتي مش طول عمرك مربياني علي عزه النفس
حنان : ياام دماغ انشف من الحجر افهمي ، هو كلامه صح وانا بصراحه قلبي وجعني من كتر قلقي عليكي لحد ماتروحي بخاف عليكي من الناس السوابق اللي في المنطقه وكله كوم وابن مهلبيه الارشانه كوم .. اعقلي ويلا روحي حضري شنطتك
زمت شفتيها وقالت بضيق : طيب ياامي هسمع كلامك بس لو المكان مريحنيش هنرجع تاني
حنان : ماشي يابنتي اللي انتي عايزاه يلا بقي الراجل مستني بقاله كتير تحت
دهب : طيب
جهزت دهب الحقائب واحتفظت بمقص صغير بيدها ،ونزلا سويا الي سليم بالاسفل وقالت حنان له : معلش يا استاذ سليم اتأخرنا عليك
رد عليها بابتسامه قائلا : لا ولا يهمك.. يلا بينا
قالت دهب بسرعه : لا ممكن دقيقه واحده هعمل حاجه
نظر اليها بدهشه وقال : اتفضلي
ذهبت دهب مهروله الي مهلبيه لتأخد ثأرها التي لم تأخذه الي الان .. ومن حسن حظها انها كانت متواجده بالشارع واستغلت انها كانت تتسامر مع احدي النسوه في الشارع ثم علي حين غره مسكت المقص وابتسمت ابتسامه شريره وقصت خصله كبيره ثم ركضت الي سياره سليم مره اخري وركضت خلفها مهلبيه بكل حقد وغل وعندما وصلا الاثنان الي السياره دخلت دهب بسرعه وهي تلهث اما مهلبيه عندما رأت سليم تسمرت مكانها وهي تشعر بالحنق الشديد فقال لها سليم بتحدي : في حاجه ؟!
ردت وهي تكظم احساسها بداخلها : لا يابيه مفيش
دخل الي السياره وقال لها : طيب عن اذنك بقي عشان امشي
مهلبيه :اتفضل يابيه
ثم بعد ان غادر هذه الحاره الضيقه مسكت قالب من الطوب وض*ربته في الارض بقوه وهي تصرخ فركض اليها ابنها وقال لها : مالك ياما فيه ايه ؟!
ردت بضيق : مفيش ياروح امك
_________
عندما اقترب سليم من المنطقه اتي يعيش بها قال لدهب وهو يضحك : ممكن افهم بقي ايه حركات العيال اللي عملتيها دي قبل ما نمشي
ردت حنان بسرعه : قولها يابني لحسن دي مجناني بالهبل بتاعها ده
نظرت الي امها وهي متسعه العينين وقالت بضيق: لا مش حركات عيال ولا حاجه ده تار قديم مش اكتر
رد مبتسما : وهو يعني اللي بياخد تاره يجري زي العيال بالشكل ده
دهب : لا انا مجريتش ده اكيد بيتهيقلك
رفع حاجبيه وقال : جايز برضه
بعد القليل من الوقت وصلوا الي العماره القاطن بها وصعدوا الي شقه والده عامر وعندما وقفوا امامها قال لهم سليم : دي شقه والدي هتقعدوا فيها شويه لحد مااتفق مع صاحب الشقه وكمان لو هتتنضف
حنان : ماشي يابني وماله
دق سليم علي شقه والده ففتح لهم في الحال بكل بشاشه وقال : يا اهلا بالبيه اخيرا جيت وجبت معاك حاجه تفتح النفس
سعل سليم بصوت مرتفع وقال : متخدوش في بالكم ياجماعه ده ابويا بيحب يهزر كتير .. دول جيرانك الجداد
ثم تابع حديثه وهو يدقق علي كل حرف : اللي هيبقوا في الشقه اللي قصادك وهيأجروها
لم يتعجب ولم يصدر عنه اي تعبير وقال بابتسامه : اتفضلوا اتفضلوا انتوا نورتونا
سليم : طيب هسيبكم انا تتعرفوا علي بعض وهروح اظبط الامور
اغلق عامر الباب في وجه ولده وقال : مع السلامه انت ..علي مهلك
ضحك سليم من الخارج وقال : هي بقيت كده ، ماشي مردودالك
طيله هذا الوقت كانت حنان ودهب ينظران بذهول ولكنه لم يستمر طويلا حيث انه ادخلهم الي غرفه الضيوف وجعلهم يجلسوا ثم بدون اي مقدمات قبل يد حنان فسحبتها بسرعه وقالت : استغفر الله
واما دهب فاصابتها الصدمه وقالت : في ايه ياحج؟!، احنا عندنا مش زي عندكم عادي كده
شعر عامر بالاحراج الشديد وقال : اعزروني انا مكنتش اقصد بحكم العاده مش اكتر
زمت دهب شفتيها ومالت علي اذن امها وقالت : بيقولك بحكم العاده شكل البوس ده عندهم زي صباح الخير عندنا
عامر : انتوا شكلكوا اخوات مش كده
ردت حنان بابتسامه عريضه وقالت : يعني
عامر : والله انا قولت كده نظرتي متخيبش ابدا
ابتسمت دهب ابتسامه مصطنعه :يعني ! ونظرتي متخيبش !! لا مش اخوات للاسف دي امي ياحج عامر
________
طيله هذا الوقت كان سليم يقف مع البواب يشرح له الوضع وفي نهايه الحديث قال له : زي ما اتفقنا الشقه دي صاحبها بيسافر كتير وهو مسافر حاليا وانه بيحب اعمال الخير دايما وانه موكلني انا عن المواضيع دي اتصرف فيها ..وايجارها ٤٠٠ جنيه ها فهمت ولا اعيد من الاول
وجدي : لا فهمت خلاص انما ليه الحوار ده كله متقولهم ان انت اللي صاحب الشقه وبتعمل الخير
رد عليه بضيق : اعمل اللي بقولك عليه وبس الموضوع مش محتاج فزلكه
وجدي : ماشي يا استاذ سليم
دق سليم الباب علي والده وفتح له بعدما دق كثيرا وقال : ايه يابني كل ده خبط زهقتني
سليم : الشقه جاهزه دلوقتي تقدروا تدخلوها
عامر : خلصت بسرعه كده مش معقول روح شيك عليها تاني
سحبت دهب امها بسرعه وقالت: طيب ياجماعه نستأذن احنا بقي
عامر : ليه ياجماعه كده ملحقناش نقعد مع بعض ولا نتعرف علي بعض
دهب : تتعوض الايام جايه كتير تصبحوا علي خير بقي
سليم : وانتي من اهله
وبعد ان خرجا قال عامر بضيق : مشتهم ليه كان ممكن يقعدوا شويه كمان
رد ضاحكا : شكل السناره غمزت ولا ايه
عامر : لا غمزت ولا حاجه ده انا بس تعبت ياسليم من الوحده
سليم : ما قولتلك يا تطلع عندي فوق وتعيش معايا يا انزل انا واهو اتنين عزاب نونس بعض
عامر : انا عند قراري انا كده مرتاح
سليم بابتسامه : براحتك بس علي الله متندمش في الاخر
عامر : متخفش عليا انا صحتي بومب
سليم : ربنا يديمها عليك
عامر : وعليك يا حبيبي
________
افرغت دهب الحقائب ثم جلست علي المقعد وقالت بضيق :
ممكن افهم بقي ايه الرقه دي كلها اللي نزلت عليكي واحنا قاعدين مع الراجل جوه دي
ردت متلجلجه : رقه!!! رقه ايه يادهب حرام عليكي هو عشان كنت بتكلم بذوق مع الراجل خلاص بقيت بتكلم برقه ، انتي اكيد بيتهيقلك
ردت بعدم اقتناع : يمكن
_________
في صباح اليوم التالي
استيقظت دهب بنشاط وحماسه وارتدت ملابسها بسرعه وفتحت الباب لتخرج وجدت سليم امامها مباشره فشعرت بالفزع وعادت خطوه للخلف وقالت :
خضتني مش كنت تقول احم ولا دستور ولا اي حاجه كده
رد عليها وهو مبتسما : لا سلامتك من الخضه .. متأخره ليه بقي
دهب : لا مش متأخره ولا حاجه دول هما خمس دقايق بس
سليم : طيب يلا عشان هتركبي معايا ونروح سوا
ردت بسرعه : لا شكرا انا هعرف اروح لوحدي والطريق سهل جدا
رد عليها بصرامه : مش بحب اعيد كلامي مرتين .. بقولك يلا عشان منتأخرش اكتر
ردت بضيق : طيب
بعد حوالي نصف ساعه وصلا الي المكتب فدخل هو الي غرفته وجلست هي علي مكتبها لتنجز اعمالها الكثيره …..
وفي منتصف اليوم اثناء ما كانت تأكل دهب وجبتها في الاستراحه
وهي تنظر للاسفل وجدت ظل امرأه فنظرت للاعلي وجدتها امرأه غايه في الجمال وكثيره المنحنيات فقد كانت شقراء وخصلاتها ناعمه وقصيره وقالت لها برقه :
سليم هون
ردت عليها بعدم اهتمام : خلع ولا اداب ؟
ردت الاخري بحنق : ولا شي من هدول انا بدي ياه في موضوع خاص
قامت دهب من مكانها واطبقت يديها معا علي صدرها وقالت : وهو ايه بقي الموضوع الخاص اللي مش هتقدري تقوليلي عليه ؟!
ردت بعصبيه : لك شو انتي شو خصك بالموضوع انتي خبريه اني هون وبس ….. بدك تعملي معي تحقيق ولا شو
وضعت يدها علي خصرها وقبل ان ترد خرج سليم وقال :
في ايه ؟ ايه الصوت العالي ده؟!
ردت دهب : مش عارفه والله بلاوي بتتحدف علينا
رد سليم بضيق وقال : لمي لسانك يادهب دي لارا عميله قديمه وكانت بتجيلي مكتبي القديم
ردت لارا بسرعه : من وين جبت هالمخلوقه لتعمل معك ..كنت قلي انك بدك سكرتيره وكنت بجيبلك الف في يوم واحد
دهب بضيق: شوف بقي بتغلط
اهي !
سليم : لارا..دهب دي من اكفأ اللي شغالين معايا ومعتقدش رأيك صح ، علي العموم يلا ندخل
لارا : اوكي
نظر الي دهب وقال لها : دهب بقولك هتلنا اتنين قهوه بسرعه
دهب : طيب
بعد دقائق دخلت اليهم دهب وفي يدها صنيه بها فنجانين من القهوه وقدمت فنجان سليم ووضعته امامه وقالت : اتفضل
سليم : شكرا