قصة جديدة
اكتشفت إن جوزى كان متجوز ومخلف من مراته التانيه بنت
ومراته دى ماتت فاضطر إنه يواجهنى وجاب البنت عشان اربيهت مع اختها
بصيت للبنت وهي واقفة ورا ضهره، مكسورة وخايفة، ملامحها فيها حتة منه مقدرتش أنكرها. الدنيا لفت بيا وكنت عايزة أصرخ في وشه وأقوله خد بنتك وامشي مش عايزة أشوفكم، بس سكتت.. سكتت لما بصيت لبنتي وهي ماسكة في إيدي، وفكرت لو أنا اللي كنت مكان الست اللي ماتت دي، كنت هرضى بنتي تترمي في الشارع؟
بلعت ريقي بصعوبة، وحسيت بنار في قلبي بس طفيتها بكلمة يا رب. قربت منه وهو عينه في الأرض، مش قادر يرفعها في عيني من كتر الخزي، وقلتله بصوت مخنوق بس ثابت
دخلها يا أحمد.. البنت مالهاش ذنب في كدبتك ولا في اللي عملته. البيت ده هيفضل مفتوح، ومش أنا اللي أخرب بيتي بإيدي وأشرد عيالي عشان غلطة أنت اللي حاسب عليها.
بص لي بذهول وكأنه مش مصدق إني عديتها، بس أنا مكنتش بعديها عشانه هو.. أنا كنت بشتري كرامتي وبيت
سهرت الليالي عشان أبنيه. أخدت نفس طويل وقلت للبنت بابتسامة باهتة
تعالي يا حبيبتي، تعالي سلمي على أختك.. من النهاردة أنتم مالكمش غير بعض.
مرت الأيام، والوجع اللي كان في قلبي بدأ يتحول لذهول من اللي بشوفه. كنت فاكرة إن أحمد هيشيل جميلي فوق راسه ويحاول يعوضني، لكن اللي حصل كان العكس تماماً. بدأ قلبه يميل ل هبة بشكل مش طبيعي، وكأنه بيصالح فيها ذنبه تجاه أمها اللي ماتت.
في يوم، دخل البيت وشايل شنط لبس ماركات غالية، نادى على هبة وقعد يقيس لها الهدوم وهو بيضحك وفرحان، و رباب بنتنا واقفة بعيد، عينيها بتلمع بالدموع وهي شايفة أبوها نسيها تماماً، ولا حتى جابلها توكة صغيرة تجبر خاطرها.
مقدرتش أسكت، رحت وقفت قدامه وقلتله بصوت واطي ومنفعل
إيه يا أحمد؟ واللبس ده بمناسبة إيه؟ و رباب اللي واقفة مكسورة دي ملهاش نصيب من فرحتك؟
بص لي ببرود وقال وهو بيكمل تقليب في الهدوم
يا ستي هبة يتيمة، لازم أعوضها عن حرمانها، بنتنا رباب عندها أم وأب وبتاخد كل حاجة، لكن دي غلبانة.
مكتفاش بكده، ده بقى يلبس ويخرج ويقولي أنا هاخد هبة أفسحها شوية عشان نفسيتها، ويسيب رباب تعيط وتطلب تروح معاهم وهو يتحجج بأي حجة عشان ينفرد ب هبة.
بقيت واقفة في نص الصالة، أبص للبنتين وأسأل نفسي هو أنا جيت على نفسي عشان ألم الشمل، ولا عشان أتفرج على بنتي وهي بتتحسر في بيتها؟ الصبر اللي صبرته بدأ ينفد، والبيت اللي قلت مش ههده، بقى هو نفسه اللي بيخنقني بتصرفات أحمد اللي مبيعملش حساب لمشاعر حد.
