قهرتني 2

كل واحد فينا بيختلف استقباله للصدمه عن غيره في ناس بتنهار نفسيا أو جسديا أو الاتنين وفي الناس بتكتم جواها وفي ناس بتستسلم وفي ناس بتضحك وفي ناس بترفض تصدق

كلهم بيكونوا موجوعين وجع بيحتلهم مره واحده بس تعبرهم عن الوجع ده هو اللي بيختلف

❈-❈-❈

عند منار

استنت لما امير نزل والباب اتقفل وبعتت رساله باسم الدوا بسرعه ومن كتر توترها مخدتش بالها أن تلفون امير رن بصوت رساله الواتس وهو علي السفرة اللي قصادها

طلعت رقم حازم بسرعه واتصلت عليه في نفس الوقت اللي امير كان افتكر أن تلفونة فوق وطلع علشان يجيبه

منار :

_ بقا انت يا حازم بتهددني انا ؟ لا هو انت فاكر انت بس اللي مقطع السمكة وديلها وعرفت بنات كتير وعملي فيها الواد الصايع اللي محدش قدة .. فاكر لما تقولي معلومات عني هخاف واقولك يمي تحت امرك يا سي حازم يلا نتقابل وانفذلك كل رغباتك ؟

انا مش كنت واضحه معاك من الاول وقلت لك ان انا اخري مكالمات وصور وبس ؟ مش قلت لك قبل كده مليون مره انا بحب اكون مبسوطه والاقي راجل يدلعني ويسمعني كلمتين حلوين وانا كمان ادلعه واسمعه كلمتين حلوين وده اخري ؟ بس مش عاجبك مش كده؟ طب اسمع بقا اللي عندي الاسم حازم عبد السلام عزمي المحمدي العنوان ١٣ ش معتز النمر الدرب الأحمر متجوز من هاله محمد صبحي اكبر منك ب ١٦ سنة وبتغفلها وساحب منها شيء وشويات ومرافق هايدي العناني مرات خليل محمود الشرقاوي صاحب معرض سيارات كبير اوي في وسط البلد وكل بلاويك معايا ممكن توصل صوت وصورة ومعاهم عنوانك وصورة بطاقتك ل خليل باشا وهو يتصرف بقا ها قلت ايه يا حيلتها ؟

حازم بصدمة :

_ انتي انتي عرفتي كل ده ازاي ؟ انتي جبتي المعلومات دي منين ؟ منار اوعي تكوني بعتي حاجه فعلا لحد دا انا اروح في 60 داهيه

منار ضحكت جامد:

_ لا يا قلب منار ما قلتش المعلومات دي لحد بس لو فضلت في قله الادب اللي انت فيها دي هبعتها وعليا وعلي اعدائي بقا وقتها والبادي اظلم يا حزومة

حازم بتوتر :

_ لا لا لا خلاص خلاص انا مش هعمل اي حاجه خلاص انا اسف

منار بقوة :

_ ما انا عارفه ان انت اسف وواثقه كمان ان انت اسف عموما يا حازم انا زهقت الموضوع خلاص بقى مقرف اوي اي وقت هتفكر تاذيني هكون مدمراك وانت كده اخذت وقتك معايا قلت لك قبل كده انا لما بزهق ما عنديش اسهل من البلوك والشات مليان رجاله يتمنوا بس كلمه مني انت ولا اول راجل اكلمه ولا هتبقى اخر راجل اكلمه يلا من غير سلام