الاول _ مع الأسف يا شيخ حسن مراتك ملح"دة. بصله حسن بجمود وكأنه بيستوعب الكلام اللي اتقال قبل ما ينفجر في الضحك ويقول وهو بيخبط على كتف صاحبه: _ طول عمرك دمك خفيف يا وائل. بصله وائل بضيق وقال بهدوء: _ على فكرة أنا مش بهزر، فريدة مراتك فعلاً كانت مل"حدة، مش هي الست اللي أنت اتهوست بتدينها. صرخ حسن بغضب خفيف: _ احترم نفسك يا وائل اللي بتتكلم عنها دي مراتي، فاهم يعني ايه؟ يعني مش هسمحلك تقول عليها كلمة غلط، أنت أصلا مينفعش تتكلم عنها لا بالحلو ولا بالوحش، وكلمة تاني عنها هنخسر بعض. نطق كلامه الأخير بإشارة تحذير من إيده، عقد وائل حواجبه بضيق وقام من مكانه وهو بيقول بغيظ: _ وعلى ايه الزعل يا شيخ حسن، عمومًا أنا مش هتكلم الصور اللي هتوصلك على فونك هي اللي هتوضح كل حاجة. بمجرد خروج وائل من باب المسجد صدرت رنات متتالية من فون حسن اللي تردد قبل ما يشوف المرسل ولما شاف اسم وائل بدأ قلبه يدق جامد وحس بمغص خفيف في معدته وكأن الخوف بيسيطر عليه، وبالفعل خاف يفتح الصور، مش معقول يعني هيصدق اي كلام يتقال على مراته حتى لو كانت الأدلة صور بردو مش كافي عنده، هو بيثق في فريدة ثقة عمياء. رجع حسن لشقته وهو بيحاول يداري التوتر اللي على وشه وخصوصًا لون وشه المصبوغ تعبيرًا عن خوفه وتفكيره في كلام وائل. استقبلته فريدة اللي كانت لابسة الزي الشرعي ولابسة النقاب لكن رافعاه عن وشها، وأول ما شافت حسن عبثت زي الاطفال وقالت بعتاب: _ كل دا تأخير يا حسن؟ رنيت عليك كتير مش بترد ليه؟؟ ابتسم لها حسن بهدوء وقال: _ معلش يا حبيبتي أنا بس قعدت مع وائل صاحبي شوية بعد الصلاة. حركت فريدة دماغها بخفة وابتسمت بتكلف وهي بتبلع ريقها بتوتر لما سمعت اسم وائل، وراحت قعدت قدام الكوتش بتاعها عشان تلبسه لكنها شردت بتفكيرها في حياة العزوبية قبل ما تقابل حسن وتحبه، أو خلينا نقول الشيخ حسن زي ما تعرفت عليه فريدة. قطع وصلت شرودها نداء حسن المتكرر فشرعت بدماغها وقامت عشان تمشي معاه، فتكلم حسن باستغراب: _ هتخرجي حافية؟ بصت فريدة تجاه الكوتش وابتسمت بارتباك ورجعت لبسته بسرعة وايدها بتتحرك بعشوائية فسألها حسن بقلق: _ انتي كويسة؟ شكلك تعبانة. ابتسمت فريدة وقالت وهي بتعدل نقابها: _ لاء كويسة، يلا عشان منتأخرش. ********* وقف التاكس قدام بيت والد فريدة اللي اول ما خرجت من التاكس سمعت صوت واحدة من الجيران بتنده عليها، فسبقها حسن خطوتين لكنه راقبهم بنظره وسمع كلام الست اللي قالت: _ خدي يا فريدة، دا رقم دكتورة نسا شاطرة، تابعي معاها وإن شاء الله ربنا هيكرمك. أخدت فريدة ورقة مطوية من جارتهم قبل ما تمشي مع حسن لبيت والدها، وهي بتداري حزنها لأنها متزوجة من خمس سنين ولحد الآن لم تُرزق بأطفال مع إن كل الدكاترة اللي زارتهم مع حسن أكدوا لها أن هما الاتنين صحتهم كويسة والموضوع كله بإرادة ربنا. خرجت نغم من اوضتها ومعاها لاب توب حطته على الركنة جنب حسن وقالت: _ من فضلك يا أبيه تشوف برنامج الإكسل ده مش شغال ليه، وفي شوية حاجات مش راضية تشتغل. تدخلت فريدة في الحوار وقالت: _ اللاب دا كتر خيره يا نغم، اشتري واحد جديد احسنلك. قعدت نغم جنبها وقالت بحب: _ زي ما انتي اشتغلتي عليه في الكلية أنا كمان هشتغل عليه لحد ما اجيب امتياز زيك، وبعدين أشتري واحد لما اتخرج واشتغل. في الوقت ده كان حسن بيحاول يشوف المشكلة اللي في اللاب وبالصدفة فتح ملف بالغلط وكانت المفاجأة هي صور لفريدة مراته بلبس مكشوف وفي أماكن سهر!!! بلع ريقه بصعوبة وهو مركز جامد في الصور، وتلقائيًا بدأ يغير بين الصور اللي مكنتش بتخلص وكلهم بلبس أسوأ من بعضه!!! شرع بنظره تجاه فريدة اللي قاعدة تتكلم وتضحك مع والدها، معقول الكلام اللي قاله وائل حقيقي! يعني البنت اللي اتجوزها وحبها عشان تدينها وقربها من ربنا تطلع كدابة واخفت عنه ماضيها!! للدرجة دي هو كان مغفل واتخدع ببرائتها؟!!! التلاتة تفاجأوا بحسن اللي وقف فجأة وقال........ يتبع............. حاولت تقرب خطوتين من المسجد عشان تتأكد من هوية الشخص اللي خارج وفجأة شهقت فريدة بفزع وبدأت الرؤية تتشوش قدام عيونها. انتبه ماهر لوجودها والاختلال اللي حصل في توازنها، قرب منها وسألها باهتمام: _ حضرتك كويسة؟؟ شرعت فريدة بعيونها البنية اللي سرعت من ضربات قلب ماهر، فردد اسمها بخفوت، بنبرة تساؤل: _ فريدة!! هزت دماغها بتأكيد وقالت بتفاجؤ: _ مكنتش اتوقع إنك تعرفني بالنقاب! ابتسم ماهر بحزن وتمنى لو كان له الحق عشان يعرفها إن قلبه هو اللي ميزها مش عيونه، الحقيقة إن ماهر عمره ما قدر يميز حد منتقب، حتي زوجات أخواته المنتقبات بيتلغبط بينهم لحد ما يتكلموا، إنما فريدة مميزة ومحفوظة بالنسبة لقلبه، وازاي يتوه عن العيون اللي اتعلقت به قبل خمس سنين زي غريق بيتمنى النجاة!!! قطعت فريدة الصمت اللي بينهم وسألته بجدية: _ هو حضرتك بتصلي هنا علطول؟؟ نقل ماهر نظره بينها وبين المسجد وقال: _ أيوه، أنا إمام المسجد هنا. اتخضت فريدة فسألته بصوت مرتعش: _ يعني أنت صاحب حسن جوزي؟؟ هز دماغه بتأكيد، فهي سألته بترقب: _ قولت له حاجة عني؟ _ لاء طبعًا مستحيل اعمل حاجة زي كدا...... بعد إذنك. التفت ماهر عشان يمشي، فاتحركت فريدة واعترضت طريقه وسألته بصوت مخنوق: _ حسن سايب البيت بقاله أسبوع، متعرفش عنه حاجة؟؟ اتنهد ماهر وقال: _ معرفش عنه حاجة، دا حتي مجاش المسجد بقاله أسبوع. مصدرش رد من فريدة، فاتحرك ماهر عشان يرجع بيته، لكنه ثبت في مكانه لما سمع صوت ارتطام بالأرض، ولما لف وشاف فريدة واقعة على الأرض قلبه وقع معاها وجري عليها عشان يطمن، لكنها كانت فقدت الوعي، وقف يتلفت حواليه زي التايه ومش عارف يتصرف وأخيرًا شالها عن الأرض وأخدها للمستشفى. لما وصل المستشفى كان موجود دكتور في الاستقبال لكن ماهر أصر إن اللي تكشف عليها تكون دكتورة، وبالفعل استجاب الدكتور لطلبه بدون ما يجادل، ووقف ماهر ينتظر الدكتورة قدام أوضة الكشف بعد ما عرفها ان فريدة فقدت الوعى فجأة وساب لها معلومة إنها متزوجة. كان واقف يعد الثواني وقلبه بيدق بسرعة من كتر الخوف، ونسي تمامًا موضوع أخته اللي منتظراه عشان يزوروا عمتهم، خرجت الدكتورة وابتسمت بعملية وقالت: _ مبروك المدام حامل، هتبقى بابا. ابتسم ماهر بفرحة وعيونه دمعت وقال: _ بجد حامل؟؟ حركت الدكتورة دماغها بتأكيد: _ ايوه حامل، بس لازم حضرتك تخلي بالك منها ومن صحتها، أنا ركبت لها محلول وشوية كدا وتفوق بإذن الله. فضل واقف مكانه ومدخلش يشوفها عشان لو رافعة النقاب، كان مستغرب جدًا من نفسه، متوقعش إنه يكون مبسوط أوي كدا بالرغم من الألم اللي بيعيشه كل يوم وكل دقيقة وكل لحظة بيفتكر فيها انها ضاعت من ايده. كان عارف من عمته إنها مخلفتش لحد دلوقت وعارف قد ايه كانت حزينة بسبب الموضوع ده، وعشان كدا فرح جدًا لما تخيل فرحتها بخبر حملها، بالنسبة له مش مهم يكون معاها، المهم تكون مبسوطة ومرتاحة في حياتها. فاقت فريدة ودخلت الممرضة تفك المحلول، فقالت بود: _ زوج حضرتك واقف برا، كان قلقان عليكي جدًا. فريدة بحماس: _ واقف برا ليه، خليه يدخل، هو اللي جابني هنا؟ ردت الممرضة بإعجاب: _ ايوه هو اللي أسعفك، باين عليه إنه بيحبك جدًا لدرجة إنه رفض دكتور يفحصك، وأصر تكون دكتورة ربنا يسعدكم. ابتسمت فريدة بفرحة، وطلبت من الممرضة تخليه يدخل، على اعتقاد إنه حسن، لكنها استغربت لما شافت ماهر، فنزلت نقابها بسرعة في نفس اللحظة اللي لف ماهر وقال بإحراج: _ أنا آسف جدًا بس الممرضة قالت إنك عايزة تشوفيني. ساد الصمت بينهم لحد ما سألته فريدة بحزن: _ هو حضرتك اللي جبتني هنا؟؟ _ ايوه أنا. اتنهدت فريدة بحزن وحاولت تسيطر على دموعها لكنها فشلت، فقامت من مكانها واتحركت عشان تخرج وهي بتقول بصوت مخنوق: _ متشكرة جدًا لحضرتك، كان ممكن تمشي عشان متتأخرش علي البيت. _ مكنتش اقدر أسيبك وأنتي فاقدة الوعي. مردتش عليه فريدة، في حين سألها ماهر بشك: _ هو أنتي بتعيطي ليه؟ مسحت دموعها بسرعة وتظاهرت بالجدية: _ لاء مش بعيط ولا حاجة، بس تعبانة شوية، خلينا نمشي. وقف ماهر عشان يوقف عربية، وهي وقفت وراه بكام خطوة، فالتفت ماهر وقال: _ ألف مبروك. _ على إيه؟ _ مبروك على الحمل، لازم تخلي بالك من صحتك بعد كدا. شرعت فريدة بدماغها ونظرها اللي دايمًا في الأرض وسألته بصدمة: _ قولت ايه؟؟؟ استغرب ماهر من رد فعلها لأنه فكرها عرفت بحملها، فسألها بترقب: _ انتي متعرفيش إنك حامل؟ حركت دماغها بنفي وشاورت على نفسها بتفاجؤ شديد: _ أنا حامل بجد؟؟ ابتسم ماهر، وقال: _ الدكتورة قالت إنك حامل في الشهر التالت. المرة دي مقدرتش تسيطر على عيونها، وبدأت تضحك بتقطع وهي بتشاور على نفسها، وقالت بشك: _ احلف بالله إني حامل. _ والله حامل يا فريدة. بدأت تحمد ربنا طول ما هي واقفة وهو كان سامعها ومبسوط عشانها وغصب عنه عيونه دمعت وتمني لو كان هو الشخص اللي يشاركها فرحتها. ★★★★★ لما رجع ماهر البيت كانت أخته متعصبة واستقبلته بلوم شديد عشان قافل فونه وخلف بوعده إنه يروح معاهم عند عمتهم، فاتحرك ماهر وقعد جنب والدته اللي سألته بهدوء: _ اتأخرت ليه ماهر. رد ماهر بجدية: _ والله يا أمي غصب عني، حصلت مشكلة كدا كان لازم احلها قبل ما ارجع. قربت شهد وقالت بضيق: _ في حاجة اسمها فون يا ماهر، على الأقل كنت تتصل تطمنا عليك عشان نبقى عارفين أنت فين، إنما لا رنيت وقفلت فونك كمان!! حط ماهر ايده على جيبه وقال بصدمة: _ تليفوني!! بدأ يفتش في جيوبه قبل ما يقول: _ دا أنا شكلي نسيته في التاكس! ابتسمت شهد بسخرية وقعدت وهي بتقول: _ يعوض عليك ربنا بقى، حلال على صاحب نصيبه يا شيخنا. اتنقل من مكانه وقعد جنب أخته وحضن كتافها وقال بحنان: _ وعد مني هنروح بكرا نزور عمتي، حقك عليا يا شوشو. ابتسمت شهد وقالت: _ خلاص مش زعلانة، بس قلقنا عليك جدًا لأنك مش متعود تقفل فونك. ★★★★★★★★ على الطرف التاني الخبر اللي بتحلم تسمعه من خمس سنين وأخيرًا بقى حقيقة، لكن مع الأسف في الوقت اللي المفروض تحتفل فيه مع حسن إن هيبقى عندهم طفل، هي أصلا متعرفش حاجة عن حسن!! فتحت باب الشقة بضعف، لكنها استغربت لما شافت الإضاءة شغالة، ونظرًا لأنها كانت قافلة الإضاءة فتأكدت إن حسن أكيد رجع، فدخلت بسرعة وهي بتنادي إسمه بفرحة. وبالفعل خرج حسن على صوتها من أوضة النوم ووقف في نص الصالة بجمود، فجريت عليه فريدة وحضنته وقالت بعتاب: _ كنت فين دا كله يا حسن، قلقتني عليك. واقف في مكانه زي الصنم مش بيتحرك، بعدت فريدة ورفعت نقابها وهي بتسألها باهتمام: _ أنت كويس يا حسن؟؟ في الوقت اللي فريدة مستنية فيه رد حسن، سمعت صوت بنت من أوضة نومها بتنادي حسن. اتصدمت فريدة وبعدت أيدها عن حسن، واتحركت لأوضة النوم عشان تاخد صدمتها الأولى في زوجها الشيخ حسن. يتبع...................... لما سمعت صوت أنثوي خارج من أوضة نومها، اتحركت بسرعة للأوضة عشان تاخد صدمتها الأولى في زوجها حسن، أو خلينا نقول الشخص اللي بيدعي إنه شيخ وهو أصلا ميعرفش حاجة عن دينه. لما شافت المنظر قدامها اتخشبت في مكانها، كانت علياء بنت خالة حسن، استغربت فريدة وجودها وخصوصًا إنها بتلم هدوم فريدة!! نقلت نظرها بين علياء وحسن اللي قرب منها قبل ما تسأله بصدمة: _ هو في ايه؟ بتعبوا هدومي ليه؟؟ رد عليها حسن ببرود: _ عشان تمشي من البيت يا فريدة، أنتي طالق. رعشة مزعجة سرت في جسمها وكأنه دلق عليها دلو من التلج بدون سابق إنذار، عيونها وسعت ومقدرتش تنطق كأن الكلمات ماتت على لسانها، كل ثانية كانت بتستوعب فيها كلامه كانت بتحس نفسها بيتقل، وأخيرًا انتبهت إنها المفروض ترد لما قالت علياء بزهق: _ تعالي يا فريدة شوفي هدومك وحاجتك عشان متنسيش حاجة وتتحجي عشان ترجعي البيت تاني. دموعها نزلت في نفس اللحظة اللي ابتسمت فيها بسخرية: _ هو أنا بحلم ولا ايه؟؟ اتحرك حسن وجاب الشنط لعندها: _ لاء مش بتحلمي، أنا وأنتي مينفعش نكمل مع بعض. صرخت فريدة بوجع: _ ليه؟ ايه اللي حصل لكدا!!! رد عليها حسن بنبرة غضب: _ اللي حصل إنك طلعتي كدابة، وأنا عمري ما هكمل حياتي مع واحدة كدابة زيك. بلعت ريقها بصعوبة، قبل ما تسأله بضياع: _ كدابة ليه؟ كدبت عليك في ايه؟ استخدم حسن فونه وحطه على مستوي نظرها وقال بغضب: _ انتي اللي في الصور ولا مش انتي؟ غمضت فريدة عيونها بيأس قبل ما تقول برجاء: _ من فضلك تسمعني يا حسن. قفل فونه وبعد عنها وقال ببرود: _ مش حابب اسمع حاجة، من فضلك انتي تمشي ومتورنيش وشك تاني. جريت عليه فريدة ومسكت ايده: _ أرجوك يا حسن تسمعني، اعطيني فرصة اشرحلك. نفض أيدها بعيد بعنف: _ مش عايز اسمع حاجة، أنا عرفت ماضيكي المهبب، الله اعلم أنت عملتي ايه تاني، مش بعيد إنك وقتها كنتي على تواصل مع شباب ودا أنا متأكد منه. حركت فريدة دماغها برفض: _ أبدًا والله يا حسن، انا بس كنت مكتئبة شوية وكان إيماني ضعيف بس الحمدلله ربنا هداني وعرفت غلطي. تدخلت علياء وقالت بغيظ: _ متكدبيش يا فريدة، دا إحنا شايفينك وأنتي واقفة مع شاب قرب المسجد، طب حتى أبقى داري نفسك عن عيون الناس. حاولت تبرر موقفها فقالت: _ دا الشيخ ماهر يا حسن، والله كنت بسأله عليك عشان كنت قلقانة. تدخلت علياء وقالت بخبث: _ عايزة تعرفيني إنك اول مرة تتكلمي مع ماهر؟ سكتت فريدة لثواني وهي بتفكر في الرد اللي هتقوله، وقبل ما تنطق شدها حسن من أيدها واخد شنطها في الوقت اللي هي بتطلب منه يسامحها لكنه مهتمش لدموعها ولا لإهانتها قدام بنت خالته، وفتح الباب وزقها بحقد وقال بتحذير: _ مش عايز اسمع صوتك ولا اشوفك تاني، ورقة طلاقك هتوصلك على بيت أبوكي. خلص كلامه ورزع الباب في وشها، فجريت فريدة تخبط على الباب وهي بتتحايل عليه: _ افتح يا حسن ارجوك، انا عارفة إني غلطانة بس والله ندمت، افتح يا حسن أرجوك. ************* أخدت شنطها ونزلت الشارع وهي بتفكر هتروح فين! الوقت متأخر ولو رجعت بيت والدها مستحيل يخليها ترجع لحسن تاني، فقررت إنها تروح لمدام وردة الست اللي كانت بتحفظها قرآن هي عارفة ومتأكدة إنها هترحب بوجودها لأنها كانت بتحبها جدًا وأصلا زوجها وابنها مسافرين وعايشة لوحدها بالإضافة لأنها الوحيدة اللي تقدر تساعدها عشان ترجع تاني لحسن ودا لأنها تبقى مرات عمه. وبالفعل راحت لها فريدة ورحبت بوجودها بدون ما تسأل عن أي حاجة، لأنه باين على شكل فريدة إنها في مشكلة كبيرة، فحاولت تهديها وطلبت منها تدخل ترتاح والصبح يتكلموا، وبالفعل دخلت فريدة عشان تنام لكنها مقدرتش تنام من كتر البكا، فخرجت من الأوضة وخبطت على أوضة وردة اللي سمحت لها تدخل، ففتحت فريدة الباب وقالت بحزن: _ كلمي حسن خليه يردني يا طنط. سألتها وردة بشك: _ هو حسن عرف الماضي؟ هزت فريدة دماغها بحزن وانكسار وخجل، فطلبت منها وردة تقرب وتقعد جنبها، وبالفعل عملت كدا فريدة، فمسكت وردة أيدها وبدأت تتكلم بحنان: _ أنا هتكلم معاه يا فريدة، بس انتي بطلي عايط يا حبيبتي، حرام عليكي نفسك. مسحت فريدة دموعها وسألتها بخوف: _ تعتقدي ممكن يسامحني يا طنط؟ ابتسمت وردة وحاولت تطمنها: _ كل شيء جايز يا حبيبتي، وبعدين ربنا عز وچل بيسامح، فمين حسن بقى عشان يرفض يسامحك! ردت فريدة بعفوية: _ حسن جوزي، معاه حق يزعل، أنا اللي غلطانة. ابتسمت وردة بعطف وحضنتها بحنان وهي بتمسح على شعرها وحاولت تطمنها إنها هتصلح العلاقة بينهم، مع إنها متأكدة إن حسن دماغه ناشفة وزعله صعب جدًا، بس مع ذلك قررت تحاول عشان خاطر فريدة. ************* مر ساعتين وهو بيتقلب على سريره وبيحاول ينام لكنه مقدرش من كتر ما فريدة شاغلة تفكيره، نظرة واحدة في لحظة عابرة كانت كفيلة عشان يكتشف قد ايه هي حزينة ومش مبسوطة. اتنهد بألم وقعد مكانه وهو بيحاوط وشه بين كفوفه، الألم اللي كان بيكتمه طول السنين اللي فاتت جت فريدة وزادته أضعاف مضاعفة في سويعات!!! «فلاش باك» كان قاعد على جانب الطريق مستني أخته، وبيرتل ما تيسر من سورة الفرقان، وصل لسمعه صوت شهقات مكتومة، تفقد المكان بعيونه لكنه مشافش حد بيعيط، فرجع يكمل تاني والمرة دي بخشوع أكبر لحد ما وصل لآية............. بسم الله الرحمن الرحيم ﴿ إِلَّا مَن تَابَ وَآمَنَ وَعَمِلَ عَمَلًا صَالِحًا فَأُولَٰئِكَ يُبَدِّلُ اللَّهُ سَيِّئَاتِهِمْ حَسَنَاتٍ ۗ وَكَانَ اللَّهُ غَفُورًا رَّحِيمًا ﴿٧٠﴾ وَمَن تَابَ وَآمَنَ وَعَمِلَ صَالِحًا فَإِنَّهُ يَتُوبُ إِلَى اللَّهِ مَتَابًا ﴿٧١﴾ وَالَّذِينَ لَا يَشْهَدُونَ الزُّورَ وَإِذَا مَرُّوا بِاللَّغْوِ مَرُّوا كِرَامًا ﴿٧٢﴾ ﴾ صدق الله العظيم. وقتها ارتفعت صوت الشهقات وقربت منه بنوتة في أول العشرين لابسة بنطالون جينز واسع مع بلوزة هاي وسط، وشعرها البني منسدل لأول كتفها، غض ماهر بصره لما شاف هيئتها، فسألته البنت من بين شقاتها: _ ينفع اقعد؟ سمح لها تقعد مع احتفاظهم بمسافة مناسبة بينهم، فسألها ماهر بقلق ونظره بعيد عنها: _ أنتي كويسة يا آنسة؟؟ تغاضت فريدة عن سؤاله وقالت بحزن: _ أنا ملحدة، ينفع ارجع للإسلام تاني؟؟ بصلها ماهر تلقائياً وابتسم: _ طبعًا ينفع. مسحت فريدة دموعها وقالت بخوف: _ هو ممكن ربنا ميقبلنيش؟ رد عليها بهدوء وهو بيتأمل نجوم السما: _ ربنا عز وچل رحمته واسعة، غفار للذنوب أيًا كان الذنب اللي عملتيه، بس بشرط.... سألته فريدة بترقب: _ ايه هو؟؟ _ إنك تتوبي بجد يعني تسيبي الذنب اللي كنتي بتعمليه وتتوجهي للأعمال اللي ترضي ربنا، ويكون عندك يقين في رحمة ربنا ومغفرته. عيطت فريدة اكتر وقالت بتقطع: _ أنا والله ندمانة، بس خايفة ربنا يكون مش بيحبني. ابتسم ماهر بخفة ووجه نظره للطريق: _ وضعك الحالي أكبر دليل إن ربنا بيحبك، عشان كدا أنتي راجعة ندمانة وطالبة رحمة ربنا. بلعت ريقها وردت عليه بحماس: _ أنا أصلا كنت مسلمة وكنت بصلي وبصوم واي حاجة كنت أعرف إن فيها ثواب كنت بعملها، وانتقبت من لما دخلت أولى ثانوي، لكن من سنة أنا هديت الدنيا على دماغي. نطقت جملتها الأخيرة بحزن، فسألها ماهر بفضول: _ ايه اللي حصل؟؟ شدت فريدة على إيدها بحزن وبصت لماهر بتردد وخجل قبل ما تقول......... يتبع.............. ابتسم ماهر بخفة ووجه نظره للطريق: _ وضعك الحالي أكبر دليل إن ربنا بيحبك، عشان كدا أنتي راجعة ندمانة وطالبة رحمة ربنا. بلعت ريقها وردت عليه بحماس: _ أنا أصلا كنت مسلمة وكنت بصلي وبصوم واي حاجة كنت أعرف إن فيها ثواب كنت بعملها، وانتقبت من لما دخلت أولى ثانوي، لكن من سنة أنا هديت الدنيا على دماغي. نطقت جملتها الأخيرة بحزن، فسألها ماهر بفضول: _ ايه اللي حصل؟؟ شدت فريدة على إيدها بحزن وبصت لماهر بتردد وخجل قبل ما تقول: _في الحقيقة أنا في حاجات كتير اوي كنت عايزاها ومتحققتش بالرغم من دعائي المتكرر وبعد كدا ماما تعبت ودخلت المستشفى ساعتها أنا مكنتش بعمل حاجة حرفيًا غير اني بدعي مفيش حاجة سمعت إن فيها استجابة للدعاء إلا وعملتها، كنت بصلي كل الفروض والسنن وبقيم الليل لحد الفجر صلاة ودعاء وذكر، وكل يوم كنت بصلي صلاة الحاجة والصلاة الإبراهيمية حتى سمعت عن صلاة الزوال وصليتها ودعيت واتذللت وبكيت وفي الآخر ماما ماتت. كان بيفكر ماهر في رد مناسب يقوله لأنه لسه بيدرس ومعندوش الخبرة الكافية اللي تخليه يتعمق اوي في الرد عليها، فكان بيرتب كلامه عشان ميقولش حاجة هو مش متأكد منها، لكن فريدة فسرت صمته استخفاف بكلامها فابتسمت بحزن وقالت: _ أنا عارفة إنها أسباب تافهة، بس أنا والله دخلت في حالة اكتئاب شديدة وقتها. اتنهد ماهر وقال بتوضيح: _ بصي أنا لا أملك الحق عشان أقلل من الحاجات اللي تزعلك لأن دي أمور نسبية بتختلف من شخص لآخر، بس بالنسبة لي شايف إن إيمانك بربنا عز وچل ضعيف. _ معاك حق، بابا بردو قال كدا. في اللحظة دي رن فون ماهر، فحطه على الوضع الصامت، وكمل كلامه بجدية: _ لازم تعرفي إننا في الدنيا عشان نعبد ربنا ونتجهز للآخرة، مش بنعبده عشان مطالبنا في الدنيا، انا معاكي إن كلنا عندنا احلام ودعوات محتاجين إنها تتحقق في الدنيا عشان نكون مبسوطين بس دا مش معناه إننا نصلي وندعي ولما مناخدش اللي احنا عايزينه نبطل نصلي!! كدا نبقى بنتعامل مع الله عز وچل بشروط ودا مينفعش! وبعدين ما يمكن الحاجة اللي انتي عايزاها مش خير ليكي! أو يمكن الوقت اللي انتي عايزة دعوتك تتحقق فيه مش هو الوقت المناسب اللي هتبقى مبسوطة فيه!!! أنتي لو عرفتي فضل دعواتك الدنياوية المؤجلة في الآخرة هتتمني إن ولا دعوة تستجاب لك في الدنيا. وزي ما والدتك توفت دا هيبقى مصير الجميع كلنا جنائز مؤجلة فموت حد من أحبابك مش سبب عشان تفقدي إيمانك بربنا، وانتي دلوقت بعد ما ارتديتي عن الإسلام بقيتي مبسوطة في حياتك؟؟ _ لاء، بالعكس بقيت تعيسة أكتر. _ السعادة الحقيقية قي القرب من ربنا، احنا هنا في اختبار ولازم تعرفي إن المؤمن مبتلى وصبرنا على البلاء في حياتنا دا بناخد عليه ثواب. مسحت فريدة دموعها وسألته بترقب: _ يعني لسه في فرصة؟ ابتسم ماهر وقال بتأكيد: _ طبعًا لسه فرصة. وقفت فريدة وقالت بحماس: _ طيب أنا عايزة اكون مسلمة حالًا زي ما مكتوب في بطاقتي. _ الموضوع سهل جدًا، انطقي الشهادة، "أشهد أن لا إله إلا الله وأشهد أن محمدًا رسول الله". رددت فريدة وراه وبعدين قالت بفرحة: _ بس كدا!! حرك ماهر دماغه بتأكيد وقال: _ أنا فهمت منك إنه لعدم استجابت دعواتك انتي انكرتي وجود الله عز وچل، وبنطقك الشهادة فدا اعتراف منك إن ربنا موجود، كل اللي عليكي بقى إنك تثبتي ندمك فعلاً وترجعي تصلي وتصومي وتزكي وتتصدقي وتتقربي من ربنا. ضحكت فريدة بسعادة وهي حاسة إن حمل تقيل انزاح عن كتافها وشكرت ماهر بحرارة والتفتت عشان تمشي لكنها رجعت تاني لما نده عليها ماهر وقال بتذكر: _ في حاجة كمان سمعت شيخ قالها قبل كدا، أنا هقول وانتي ترددي ورايا............تُبت إلى الله، تُبت إلي الله، تُبت إلى الله، ورجعت إلى الله وندمت على ما فعلت، وعزمت على أنني لا أعود إلى المعاصي أبدًا، وبرئت من كل دين يخالف دين الإسلام، ورضيت بالله ربًا وبالإسلام دينًا وبسيدنا محمد صل الله عليه وسلم نبيًا ورسولًا، وأشهد أن لا إله إلا الله وأن محمدًا رسول الله. أنهى كلامه ومد لها ايده بورقة فيها رقم وقال: _ دا رقم عمتي بتعطي دروس في المسجد كلميها وشوفيها بتكون موجودة امتى وأحضري دروسها وإن شاء الله تساعدك تقربي من ربنا وتفهمي الدين أكتر. «نهاية الفلاش باك» بالنسبة لماهر دا كان لقاء عابر ومش مهم، لكن عمته كان لها رأي تاني لما بدأت تكلمه عن فريدة في كل مرة يتقابلوا فيها وكانت بتوصل له سلامها، وقد ايه كانت بتمدح فيه وممتنة جدًا للنصيب اللي جمعهم صدفة عشان يشجعها ترجع من تاني لطريقها الصحيح، وفي المقابل كانت عمته بتمدح فيها وقد ايه هي ذكية وبتتعلم بسرعة وشغوفة بدينها وعندها معلومات كتير عن الدين بشكل أكبر من اللي توقعته العمة، وبذلك بدأ تفكيره ينشغل بها ثم قلبه اللي شاف فيها فتاة أحلامه وصفات الزوجة اللي بيدور عليها، فكرة إن الاتنين هيشجعوا بعض وياخدوا بإيد بعض للجنة كانت بتحببه فيها اكتر وأكتر، وبالفعل فتح الموضوع مع والده اللي طلب منه يتخرج الأول ويشتغل وبعدين يخطب له البنت اللي يختارها. وبقت فريدة دعوة متكررة في سجود ماهر اللي عشقها من كلام عمته عنها، وبمرور شهور بسيطة اتصدم ماهر بخبر زواجها من حسن. فاق ماهر من شروده على صوت آذان الفجر، فاتنهد وقام عشان يصلي. ************ راحت وردة عشان تتكلم مع حسن لكنه قفل الباب في وشها بمجرد ما شافها، ولما فضلت ترن الجرس فتح لها تاني وقال بتعجرف: _ أنا عارف سبب وجودك يا مرات عمي، وبعد إذنك تمشي من هنا عشان مغلطش فيكي. ابتسمت وردة بسخرية وقالت: _ تغلط فيا! هي وصلت لكدا يا حسن ؟! رد حسن باستفزاز: _ ايوه وصلت لكدا يا مرات عمي، لما تخبي عني حقيقة فريدة وتدبسيني في الجواز من واحدة زيها يبقى من حقي اغلط، أنتي كمان متجيش هنا تاني. _ وايه لازمتها مرات عمي بقى!! تصدق بالله انت عمرك ما هتتغير وأنا لو اعرف إنك هترجع لطبيعتك السيئة دي كنت منعت فريدة تتجوزك، مش عشانك وإنما عشانها هي، فريدة تستاهل حد أحسن منك. مشيت وردة بعد ما عصبت حسن وخلت عيونه تحمر وكأنهم بيطقوا شرار. ************ كانت رايحة جاية في الصالة وكل شوية تتفقد تليفونها على أمل إن حسن يتصل، أو وردة تكلمها تطمنها إنها حلت الموضوع لحد ما الباب خبط فجريت فريدة تفتح وتهللت ملامحها بالفرحة لما شافت قدامها شاب واقف وماسك بوكيه ورد مداري وشه، فنزلت دموعها وخرج صوتها مهزوز: _ كنت عارفة إني مش ههون عليك، وهتسامحني. صوتها كان كافي عشان يرفع نبضات قلبه، فأزاح بوكيه الورد بعيد عشان تظهر ملامح ماهر اللينة، فهمس باسمها، قبل ما ينتبه لعيونها المليانة دموع: _ هو حسن لسه مرجعش؟؟ من شدة حزنها مقدرتش ترد عليه أو خلينا نقول منتبهتش لسؤال ماهر، وصلت شهد اللي طالعة تجري على السلم وبتسأل أخوها مدخلش ليها، ولما شافت قدامها سيدة منتقبة وجهت سؤال لماهر: _ مش دي بردو شقة عمتي!! أشاح ماهر نظره بعيد عن فريدة ورد على أخته بخفوت: _ ايوه شقتها. بصت شهد لفريدة وسألتها عن هويتها، فعرفت فريدة نفسها، فابتسمت شهد وحضنتها وقالت بحماس: _ أيوه عرفتك، أنا حضرت فرحك أنتي وحسن بس معلش النقاب بقى وكدا فمأخدتش بالي. قعدت شهد مع فريدة واتكلمت معاها في مواضيع كتير كأنهم صحاب من زمان، ونوعًا ما قدرت تخرج فريدة من حزنها، أما ماهر ففضل يستني حضور عمته ويطلع معاها. كان قاعد على اول درجة في مدخل العمارة، دماغه هتنفجر من كتر التفكير، عايز يعرف ايه الخلاف بين فريدة وحسن لدرجة إنها تبقى موجودة في شقة عمته لوحدها، ودا معناه إن الخلاف اكيد كبير بينهم..... وأخيرًا قدر يستنتج من كلامها معاه قدام المسجد إن حسن عرف عن فترة اكتئابها. هب من مكانه لما شاف عمته داخلة العمارة، وبدون مقدمات سألها عن الشك اللي في دماغه وأكدت له وردة إن استنتاجه صح، فطلب منها تطلع لفريدة وتطمنها وهو هيحل الموضوع مع حسن. وبالفعل توجه ماهر لبيت حسن اللي اول ما شافه ابتسم بسخرية وقال: _ لاء مستوى البجاحة عندكم واصل للقمة! رد عليه ماهر بضيق: _ بجاحة ايه! ما تتكلم حلو يا حسن. بعد حسن عن الباب وقال باستفزاز: _ هو أنت كمان ليك عين تيجي لحد هنا يا ماهر؟؟ دخل ماهر وسأله بتعجب: _ ومجيش ليه؟؟ _ يعني لما تبقى مصاحب مراتي ويحصل بينا خلاف وتيجي انت وعايز تقنعني أصالحها! تبقى دي بجاحة! ابتسم ماهر بسخرية: _ ومين قالك إني جايلك عشان تصالحها؟ أنا جايلك عشان تطلقها رسمي!! الجملة دي كانت كفيلة عشان حسن يفقد السيطرة على أعصابه. ************* كانت شهد بتدق كف عمتها من كتر الضحك، لما سمعت رنة الفون حاولت تتكلم بجدية لكنها مقدرتش، بس الخبر اللي سمعته كتم ضحكتها مرة واحدة بشكل سرب القلق لقلوب فريدة ووردة اللي سألتها بترقب: _ خير يا شهد؟ بعدت شهد الفون عن ودنها وهي بتلقط نفسها بصعوبة، وقالت بتقطع: _ حسن.....حسن اتقبض عليه عشان ماهر...ماهر. نطقت اسم أخوها وفقدت الوعي بدون ما تكمل كلامها. يتبع................ كانت واقفة علياء مع المحامي بيتأفف بضيق، وقال: _ طيب أنا ذنبي ايه! انتي وحسن كلامكم مختلف فكان باين جدًا انكم بتحورا! علياء بضيق: _ حتى لو كلامنا مختلف بردو مفيش دليل إن ماهر قال الحقيقة!! وبعدين دا الظابط قابض عليه من بيت حسن يعني هو اللي غلطان! المحامي بتوضيح: _ ما حظكم الطين إن الظابط دخل في اللحظة اللي ماهر كان بينضرب فيها وكمان لما الظابط حاول يفصلهم عن بعض حسن متحكمش في أعصابه وزق ماهر واتسبب له في إصابة وماهر قال اللي حصل وبما إن حسن مفيش ولا إصابة في وشه يبقى ماهر على حق، يعني قدام القانون حسن هو الغلطان حتى وإن كان ماهر في بيتكم دا مش إثبات إن هو الغلطان. علياء بغيظ: _ بس حسن غير كلامه تاني. المحامي بجدية: _ ما هو حسن بعد ما غير أقواله بردو كان مختلف عن كلامك يعني حد فيكم بيكذب!! اتنهدت بزهق وقالت: _ يعني الحل ايه دلوقت؟؟ _ الحل انكم تقنعوا الطرف التاني يتنازل عن المحضر اللي فتحه ضدنا. وقفت علياء تبص على فريدة اللي بتتكلم مع شهد ووردة وهما منتظرين خروج ماهر، فقالت شهد بهدوء: _ انا لما سمعت من علياء اللي حصل كنت هموت من الخضة. ردت عليها وردة: _ الحمدلله عدت على خير يا حبيبتي. انتبهوا الاتنين لفريدة اللي بتنزل دموعها في صمت، فمسحت وردة على ضهرها بحنان وقالت: _ رب الخير لا يأتي إلا بالخير يا فريدة، صدقيني انتي تستاهلي حد أفضل من حسن، اهو شفتي بنفسك هو شخص همجي قد ايه! خرجت فريدة عن صمتها وقالت بحزن: _ حسن مش وحش يا طنط، هو بس متعصب شوية وكلنا بنتعصب وبننفعل. شهقت شهد وقالت بصدمة: _ انتي بجد شخصية غريبة، كان المفروض يعني ماهر يموت عشان حضرتك تقتنعي إن حسن مش كويس!! ردت فريدة باندفاع: _ بعد الشر عليه يا شهد، أنا مقصدش كدا والله، بس احنا منعرفش اللي حصل بينهم فبلاش تحكمي على حسن إنه وحش. استغفرت شهد قبل ما تقول بنفاذ صبر: _ على فكرة احنا نعرف حسن اكتر منك، انتي متعرفيش عنه حاجة، قبل ما يتج........ قاطعت وردة كلام شهد وقالت بحدة: _ واحد ومراته ملكيش تتدخلي بينهم يا شهد، اسكتي انتي. قربت منهم علياء وقالت بحزن مصطنع: _ ألف سلامة على شيخ ماهر يا شهد. بصت لها شهد بطرف عينها وقالت بنفور: _ هيكون بخير بس ابعدي عنه انتي وقريبك ده، وامسحي رقمي من عندك، كانت صحوبيتك سودا. اعتذرت منهم علياء وطلبت من فريدة تدخل تقابل حسن عشان طالبها بالاسم والمحامي جاب لها إذن تشوفه، قبل ما تتحرك فريدة قبضت شهد على معصمها عشان تمنعها فقالت فريدة بخفوت: _ هشوف جوزي يا شهد. نهت كلامها وسحبت أيدها ومشيت مع علياء في نفس لحظة خروج ماهر مع المحامي بتاعه وكانت رقبته عليها بلاستر طبي ووشه فيه بعض الكدمات. انتبه لها ماهر لكنه تغاضي عنها وكمل طريقه لأخته وعمته، بينما فريدة مرفعتش عينها من الأرض وهي بتسمع كلام علياء اللي بتلومها لأنها تسببت في المشاكل لحسن وبدل ما تصلح غلطها وتعتذر بعتت له ماهر عشان يهدده ويتخانق معاه!! ************* رفض ماهر يرجع البيت قبل ما يشوف فريدة هتروح فين، حاولت شهد تقنعه إنها مش هتسيب زوجها محبوس وتمشي معاهم بس هو مهتمش لكلامها وراح سند بضهره على عربية الشرطة فحركت وردة دماغها بيأس ووقفت جنبه وقالت بهمس: _ الحب يعمل اكتر من كدا يا شيخنا. اتنهد ماهر بحزن وقال: _ انا مش هرجع النهاردة بيتي غير وفريدة متصالحة مع حسن. اتصدمت وردة من كلامه وقبل ما تنطق قربت منهم فريدة اللي احتفظت بمسافة مناسبة بينها وبين ماهر وقالت بإحراج: _ هو انا ممكن اطلب منك طلب يا أستاذ ماهر؟؟ ابتسم ماهر بخفة: _ اتفضلي. فردت أيدها بتوتر واضح قبل ما تقول بخفوت: _ ممكن تتنازل عن المحضر؟ _ انتي عايزة كدا!! هتبقى مبسوطة!! رفعت عيونها لما سمعت سؤاله الأخير وقالت بلهفة: _ تبقى عملت ليا معروف ميتنسيش العمر كله. تدخلت شهد اللي وقفت جنب عمتها وقالت بضيق: _ انتي اكيد بتهزري! حسن دا واحد معفن أصلا سيبه مسجون يا ماهر. فريدة بحدة: _ من فضلك يا شهد اللي بتغلطي فيه دا جوزي، واصلا معتقدش إنه غلط في حقك. شهد باندفاع: _ بس غلط في حقك يا فريدة وميستهلش حبك. فريدة بهدوء: _ انا مطلبتش رأيك يا شهد، وبعدين عرفتي ازاي إنه غلط في حقي!! هو انتي تعرفي احنا متخانقين ليه؟ هزت شهد دماغها بنفي فقالت فريدة: _ يبقى من فضلك خليكي برا الموضوع. زفرت شهد بضيق وشاورت على ماهر: _ انتي حرة في اللي يخصك، بس اللي يخص اخويا احنا هنعاقب حسن عليه، ولا حضرتك مش شايفة الجرح اللي في رقبته. انتبهت فريدة للزق الطبي على رقبة ماهر، وتأملت كدمات وشه لثواني قبل ما تقول بإحراج: _ عارفة إنه مش من حقي اطلب منك تتنازل، بس انت قولت لطنط إنك هتحاول تصلح العلاقة بينا واهو حسن وافق يردني لو انت تنازلت عن المحضر. اندفعت شهد بغيظ: _ ازاي قابلة على نفسك تعيشي مع واحد بيساومك! انتي بجد غبية!!! تدخل ماهر بحدة: _ شهد! احترمي نفسك ومسمعش صوتك لحد ما نرجع البيت. وبالفعل نده ماهر على المحامي بتاعه اللي كان بيتكلم في الفون بعيد عنهم، ودخل تنازل عن المحضر، خرج ماهر مع المحامي بتاعه فجريت عليه شهد وقالت بعتاب: _ انا بجد زعلانة منك يا ماهر، ازاي تعمل فيها كدا!! اتنهد ماهر بحزن: _ هي كدا هتبقى مبسوطة. _ لاء يا ماهر، دي هتبقى حزينة اكتر انت مش عارف شخصية حسن؟ مش عارف إنه شخص مش كويس؟ اتنهد ماهر وسكت، فكملت شهد وهي بتبص لعمتها: _ اللي زي حسن عمره ما هيتغير يا عمتي، نسيتوا حسن كان ايه قبل ما يتجوز؟ ولا تحبوا افكركم؟؟ في اللحظة دي خرجت فريدة مع حسن وعلياء اللي اتعلقت في دراع حسن، فابتسمت شهد وقالت بسخرية: _ اقسم بالله ما هيتغير، شوف سايب بنت خالته تقرب منه ازاي! وعامل فيها شيخ. عدوا من جنبهم فشكرت فريدة ماهر بعيونها ومكلمتش وردة ولا شهد، فبصت شهد على ملامح اخوها الحزينة وقالت بغيظ وتحفز: _ طب والله هقول لفريدة حقيقته. حاول ماهر يمنعها لكنها ندهت على فريدة اللي التفتت وقالت باستغراب: _ نعم! وقفت شهد قدامها وقالت بضيق: _ هحكيلك حاجة عن ماضي حسن، عشان تشوفي انتي قد اي مخدوعة فيه. تدخل حسن وقال بغضب: _ انتي مالك بيا، يخصك فيه إنها تعرف! ضحكت شهد بسخرية وقالت: _ الأستاذ حسن قبل ما يتجوزك بشهرين............ يتبع............... _ الأستاذ حسن قبل ما يتجوزك بشهرين كان شخصية تانية مختلفة تمامًا عن المثالية اللي بيحاول يظهرها دلوقت. صرخ حسن موجه كلامه لوردة: _ لمي بنت أخوكي يا مرات عمي بدل ما هتعصب وازعلكم. ردت عليه شهد باستهزاز: _ هتضربني زي ما عملت في ماهر!! دا احنا حتى لسه قدام مركز الشرطة! نطقت جملتها الأخيرة بسخرية وتحدى، فشد حسن على ايده بغضب في حين قرب ماهر ومسك أخته من أيدها وقال بحدة: _ بلاش تتدخلي في حاجات متخصكيش. نقلت نظرها بين فريدة وأخوها قبل ما تقول بحزن: _ دي واحدة طيبة زيادة عن اللزوم وحسن خسارة فيها، لازم تعرف حقيقته وهي تقرر بنفسها. قبل ما ينطق ماهر سبقته فريدة اللي قالت بهدوء: _ مش عايزة اعرف حاجة يا شهد. حاولت شهد تقنعها فقالت: _ يا فريدة ماضي حسن كان منيل بستين نيلة. فريدة بحدة: _ قولتلك مش عايزة اعرف! الماضي انا مكنتش موجودة فيه يبقى ميخصنيش يا شهد. اتنهد ماهر وسحب شهد بعد ما قال: _ قولتلك اسكتي. التفتت فريدة لحسن ومسكت ايده بحب وابتسمت من تحت النقاب وقالت: _ ممكن تيجي معايا يا حسن اجيب شنط هدومي من بيت عمك؟ عقد ما بين حواجبه بانزعاج وقال بحدة: _ روحي لوحدك، انا تعبان وعايز ارتاح. استغربت فريدة طريقته المتعجرفة معاها على عكس الحنية اللي تظاهر بها وهو بيقنعها تخلي ماهر يتنازل عن المحضر، فاتنهدت بحزن وحاولت تقنع نفسها إن من حقه يزعل بس مش مشكلة يعاقبها عشان خبت عليه طالما هيخليها جنبه! وقفت وردة تدور على مفتاح الشقة في شنطتها اليدوية وجنبها ماهر ووراه أخته اللي قالت بانزعاج: _ هو الحيوان اللي اسمه حسن ده ضربك ليه؟ وأصلًا ازاي تسكت له دا انت بجسمك ده كنت فرمته. ابتسم ماهر وقال بمرح: _ هتؤري عليا عينيك عينك كدا! شهد بضيق: _ مبهزرش يا ماهر، هو ضربك ليه؟ اتنهد ماهر وقال بجدية: _ أنا اللي استفزيته يا شهد، واحد رايح يطلب منه يطلق مراته رسمي هيكون رد فعله ايه! لو مكانه أكيد كنت هخرج عن شعوري. سابت وردة المفتاح في الباب وقالت بصدمة: _ طلبت منه يطلقها؟؟! المفروض انك رايح تصلح العلاقة بينهم! ماهر بجدية: _ حسن فاهم إن في حاجة بيني وبين مراته، عشان كدا حبيت اوريه إنه لو طلقها انا هبقى مستفيد عشان كدا خرج عن شعوره وضربني. شهد باندفاع: _ ايوه بردو سيبتوا يضربك ليه؟ كان المفروض تعجنه ولا يعني فلوس الچيم بتروح على الأرض؟!!! رد ماهر بهدوء: _ ببساطة جدًا انا اللي استفزيته يا شهد ومن وجهة نظره اللي شايف الموضوع منها فحقه يضربني ، وكمان انا مش بحب أمد إيدي على حد وملتمس له العذر. استغفرت شهد وقالت بضيق: _ انا مش فاهمة! انتي دلوقت تقول من حقه وفريدة تقولك جوزي ومن حقه يزعل! هي المشكلة ايه بالظبط؟؟ ماهر بجدية: _ اللي بين واحد ومراته ميخصناش؟ انتبه ماهر لنظرات عمته المصدومة، فقال باستغراب: _ بتبصي كدا ليه يا عمتى؟؟ ردت وردة بعتاب: _ انا متوقعتش منك كدا يا ماهر، اللي انت عملته غلط وستين غلط كمان. استغفرت شهد وفتحت الباب ودخلت فوجهت وردة كلامها لماهر بعتاب: _ ادخل هنتكلم جوا يا شيخ. رد ماهر بضيق: _ لقب شيخ دا كبير اوي عليا يا عمتي، وبعدين أنا كنت عايزه يردها بأي طريقة. وردة باستنكار: _ أنت بجد غريب يا ماهر، دا انت المفروض تتبسط وتبقى عايزه يطلقها! _ وطلاقي يبسط ماهر ليه؟؟ نطقت فريدة سؤالها بحدة واستغراب، وهي بتطلع درجات السلم الأخيرة فنقلت وردة نظراتها بينهم بارتباك وتغاضت عن الإجابة وردت بسؤال مختلف: _ مش المفروض دلوقت تكوني مع حسن؟ فريدة بجدية: _ أنا جيت أخد شنطي. بعد ماهر وشاور لها تدخل: _ اتفضلي يا فريدة. فريدة بجدية: _ مش قبل ما تقول هتنبسط من طلاقي ليه؟؟ بص ماهر بعيد عنها وهو بيحاول يشوف إجابة مقنعة وفي نفس الوقت ميكذبش عليها، لأن هو ولا بيحب الكذب ولا بيعرف يكذب ويختلق أعذار، قطعت شهد الصمت اللي بينهم وهي بتقول بتذمر: _ هتفضلوا برا كدا كتير!! خرجت وردة من شرودها على صوت شهد وقالت بتذكر: _ادخلي خدي الشنط عشان حسن ميستناش تحت كتير، أو خليه يطلع. دخلت فريدة عشان تاخد شنطها بعد ما قالت بجدية: _ هو رجع البيت، هتكلم معاكي بعدين يا طنط عشان متأخرش عليه. دخلت سحبت شنطها، قابلها ماهر وحاول ياخدهم منها فرجعت خطوة لورا وقالت باستغراب: _ في ايه؟؟ ماهر بجدية: _ الوقت متأخر يا فريدة، خليني أوصلك. خرجت شهد وراها وهي بتقول: _ راجعي نفسك يا فريدة والله حسن دا........ صرخ ماهر بحدة: _ اسكتي يا شهد. تغاضت فريدة عن شهد وقالت بجدية: _ متشكرة يا ماهر، انا هعرف ارجع البيت لوحدي. تدخلت وردة وقالت: _ الوقت متأخر يا فريدة، كان المفروض حسن جه معاكي. نطقت شهد بسخرية: _ دا واحد ميعرفش حاجة عن الرجولة والنخوة، مش عارفة بجد انتي متمسكة به ليه!؟ فريدة بحدة: _ الزمي حدودك وانتي بتتكلمي عن جوزي يا شهد! مسمحش تغلطي فيه! نفخت شهد بضيق ودخلت شقة عمتها فأخد ماهر شنطة من فريدة اللي مقدرتش تنزل باالشنط على السلم، وقف قدام العمارة يتابع الاوبر اللي ركبته فريدة بيبعد عنه، اتنهد بحزن وطلع لعمته. ************* وصلت فريدة البيت كان حسن قاعد مع علياء في الصالون وبيتكلموا ولما شافوها قفلوا موضوعهم وقامت علياء واتحركت لأوضة الأطفال وهي بتقول باستفزاز: _ هنام عندكم النهاردة بقى عشان الوقت تأخر. حركت فريدة دماغها بموافقة، واتبعت حسن اللي دخل اوضتهم متغاضي عن وجودها. أخدت شاور ولبست بيجامة ستان وفردت شعرها زي ما بيحبه حسن وشجعت نفسها عشان تقوله عن حملها. كان نايم وحاطط ايده على عيونه، فقربت فريدة وقعدت جنبه ومسحت على شعره بحنان: _ ممكن نتكلم شوية يا حسن؟؟ رد باقتضاب: _ لاء مش ممكن. _ خمس دقايق بس. نفخ حسن وقال بعصبية: _ قولتلك لاء يبقى تتخمدي وانتي ساكته. كل مرة بتشوف منه تصرف اغرب من التصرف اللي قبله، لكنها مقتنعة إن الغلط منها، فابتسمت بحب وقالت: _ خبر هيفرحك اوي. تمثل رد حسن في إزاحة ايدها عن شعره بتعجرف وقال: _ كلمة كمان وهطردك تاني، أنا مش طايقك أصلًا. مسحت دمعة هربانة من عيونها وطفت النور ونامت بدون ما تنطق بحرف واحد. ************** كانت واقفة في المطبخ بتجهز الفطار وعلياء بتاكل من طبق الخير ومتابعة حركة فريدة بابتسامة خبيثة، وسألتها بترقب: _ ألا صحيح يا فريدة هو وائل يعرفك منين؟؟ انزعجت فريدة من سؤالها، فقالت بحزن: _ ممكن يا علياء منتكلمش في الموضوع ده! ابتسمت علياء وقالت باستفزاز اكبر: _ كان مصاحبك ولا ايه؟ احكي لي احكي مش هقول لحسن متخافيش. أنهت كلامها بضحكة ساخرة، فصرخت فريدة بحدة: _ احترمي نفسك يا علياء، اللي يحصل في حياتي حاجة متخصكيش. اتغاظت علياء من ردها فقالت بحقد: _ الله يرحم ايام ما كنتي روشة وبتسهري في ملاهي..... فريدة بصرامة: _ علياء! علياء بضيق: _ مش دي الحقيقة!! مزعلة نفسك ليه!! قاطعهم صوت حسن الغضبان وهو بينادي على فريدة، فجريت على اوضتهم وهي بتسأله بقلق: _ حصل ايه؟ أنت كويس؟؟ حسن بغضب: _ طول ما انتي موجودة في حياتي لا أنا هبقى كويس ولا زفت على دماغك، دا ايه؟ بلعت ريقها بصعوبة واتجمعت الدموع في عيونها وهي بتحاول تتكلم، فصرخ بعصبية: _ لسه ايه تاني مغفلتنيش فيه؟! كل يوم بعرف عنك حاجة أسوأ من اللي قبلها! يتبع.............. _ والله العظيم انا اول مرة اشوف شريط الحبوب ده. صرخ حسن بعصبية اكبر: _ الشريط موجود على رف هدومك فبلاش تتعاملي معايا وكأني غبي يا فريدة. فريدة بدموع: _ مقصدش كدا يا حسن والله، بس أنا ايه اللي هيخليني آخد حبوب منع الحمل؟! حدف الشريط بعيد وقال باستنكار: _ انا اللي بسألك يعني تردي عليا بإجابة، مش بسؤال! مسحت دموعها وقالت بشجاعة لأول مرة: _ الإجابة هي إن أنا حامل. ابتسم بسخرية وقال: _ ودا اللي هو ازاي بقى! فجأة كدا حامل بعد خمس سنين كشف ومحدش عارف يعالجنا! ردت فريدة باستنكار: _ هنتعالج من ايه! ما كل دكتور يشوفنا يقول إنها مسألة وقت، وبعدين الخلفة دي رزق من عند ربنا! بصلها حسن بشك، قبل ما تدخل علياء وتقول: _ والله لو مش مصدقها روح اكشف عليها يا حسن، وإن طلعت كدابة طلقها. بصت لها فريدة بحدة وقالت: _ وأنتي مالك؟! بتتدخلي بين واحد ومراته ليه؟؟ حد طلب رأيك؟ تصنعت علياء الحزن، ووجهت كلامها لحسن: _ يرضيك اتهان في بيتك يا حسن؟ زفر حسن بضيق: _ من فضلك يا علياء خلينا نحل مشاكلنا بنفسنا، دي مش إهانة ولا حاجة. تحولت نظرة فريدة من الغضب للانتصار، دبت علياء رجلها بغيظ ورجعت لأوضة الأطفال، فبادر حسن بسؤاله الهادي: _ الحمل دا من أمته؟ _ في الشهر التالت حاليًا. حسن بحدة: _ مخبية عني لحد دلوقت ليه؟؟ اتنهدت فريدة وقالت: _ عشان أنا معرفتش غير من كام يوم، وحاولت اقولك بس مكنتش بتعطيني فرصة. فطروا التلاتة سوا وعلياء عيونها مش بتبعد عن فريدة اللي لاحظت حقد واضح في عيونها وبدأت تشك إن ليها علاقة بشريط منع الحمل، لكنها استغفرت وقررت تتجاهل الموضوع. أخدها حسن عشان يوصلها لبيت اهلها اللي ساكنة فيه مع أختها بعد وفاة والدتها وسفر والدها، انتهزت علياء الفرصة وقررت تبخ سمها في افكار حسن، فقالت بمكر: _ هو أنت عايز تخلف عادي من فريدة يا حسن؟؟ ابتسم حسن بسخرية وهو بيدفع الأجرة للسواق: _ وايه المانع! ما هي مراتي!! سكتت لثواني قبل ما تكمل بقلق مصطنع: _ يعني أنا خايفة إنها تكون عملت أخطاء تانية في الماضي وعيالك يتظلموا بسببها. بصلها باستغراب: _ تقصدي ايه؟ علياء بتوضيح: _ يعني مثلًا لو اكتشفت عنها أسرار تانية هتكمل معاها؟ ما يمكن تنفصلوا ساعتها أولادكم هيتربوا بين أهل مطلقين ودا هيبقى ظلم ليهم. زفر حسن بضيق: _ انتي بتقلقيني منها ليه يا علياء! امال لو مش انتي اللي اقنعتيني اردها! علياء بضيق: _ انا طلبت منك تردها عشان ماهر يتنازل عن المحضر، ولا كنت عايز تتسجن؟! وبعدين مخطرش في بالك تفكر في العلاقة اللي بينها وبين ماهر لدرجة إنه تنازل عن المحضر عشان خاطرها؟ مع إنك كنت هتموته فيها!! تغاضي حسن عن كلامها: _ غيري الموضوع يا علياء لاني مشوش ومش محتاج تدخل من حد خليني أقرر بنفسي. هزت دماغها بضيق وسكتت. ***************** قعدت شهد جنب ماهر ومدت له كوباية الشاي بالنعناع وهي بتقول: _ احلي كوباية شاي لشيخنا ماهر، مع اني زعلانة منك أصلًا. اخد منها الشاي وسألها باستنكار: _ هو انا عملت حاجه يا بنتي، دا أنا بسايس فيكي زي الأطفال. ضحكت شهد وقالت بمرح: _ أنا اصلًا طفلة بس دا مش موضوعنا. ابتسم ماهر باستغراب: _ امال ايه موضوعنا؟؟ شهد بجدية: _ فريدة! فريدة موضوعنا يا ماهر بتظلموها لبه؟ رد ماهر بسخرية: _ يعني أنا طلعت مزعلك مني وظالم فريدة ومعنديش علم!!! شهد بتوضيح: _ لما تخبي عنها حقيقة الحيوان حسن يبقى كدا مش ظلم لفريدة؟؟ خبطها ماهر بخفة على جبهتها وقال: _ اولًا حرام عليكي تشتمي حد ومتعوديش نفسك على كدا، ثانيًا بقى أنا مش شايف إن دا ظلم لفريدة لأن حسن تاب عن الغلط اللي كان بيعمله وحاليًا بقى شخص كويس، وطالما هو ماشي صح من اول ما فريدة دخلت حياته يبقى ملناش الحق نتكلم، طالما هو مش بيؤذيها. شهد بضيق: _ من شب علي شيء شاب عليه يا ماهر، وبعدين دا واحد ساومها عشان يردها يعني بتاع مصلحته وملهوش أمان عشان كدا عايزاها تعرف حقيقته. اتنهد ماهر وقال بهدوء: _ ربنا سبحانه وتعالى ستر حسن قدام فريدة فنيجي إحنا بقى ونكشف لها ماضيه!! نوعًا ما اقتنعت بكلامه، فقال ماهر بإقناع أكتر: _ وبعدين يا شوشو عن عبد الله بن عمر رضي الله عنهما: قال رسول الله ﷺ: «المسلمُ أخو المسلمِ لا يظلمُه ولا يُسلِمُه، ومَن كان في حاجةِ أخيه كان اللهُ في حاجَتِه، ومَن فرَّج عن مسلمٍ كُربةً فرَّج اللهُ عنه بها كُربةً مِن كُرَبِ يومِ القيامةِ، ومَن سَتَرَ مسلمًا سَتَرَهُ اللهُ يومَ القيامةِ». يعني شوفي سترك على معصية غيرك ثوابها كبير ازاي عند ربنا. اتنهدت شهد وقالت أنا اكيد احب الثواب بس في نفس الوقت خايفة يكون حسن متغيرش، وفريدة شكلها طيبة مش هتستحمل تتصدم فيه. ابتسم ماهر بهدوء: _ إن شاء الله الموضوع مش هيوصل للنقطة اللي في دماغك، وربنا موجود معاها واحنا جنبها. سألته شهد بترقب: _ يعني لو حسن عمل حاجة تزعلها هتتدخل؟؟ ماهر بتحفز: _ اكيد هتدخل، مش هسمح له أصلًا يزعلها. حركت حواجبها بمشاكسة وسألته بفضول: _ في ريحة غيرة في كلامك! حرك دماغه وهو بيبتسم بسخرية وتوجه لشرب الشاي وهو بيفكر في فريدة وكلام أخته، هو أصلًا ملهوش الحق عشان يغير! بالنسبة له الغيرة دي مرحلة في بداية الحب لكن هو دلوقت تخطي مرحلة الهيام أصلًا حبه لفريدة نوعه غريب على قد ما هو حزين إنها نصيب راجل غيره لكن قلبه بيصبره إنها كدا مبسوطة ومرتاحة. ***************** مقدرش يكمل شغله من كتر التفكير في كلام علياء اللي سيطر عليه، فاتحرك بسرعة للبيت واول ما دخل قرب على فريدة اللي بتنضف الأرضية بمكنسة الكهربا، شال الفيشة ووجه لها كلامه باستعجال: _ ادخلي بسرعة غيري هدومك عشان خارجين. سألته فريدة باستغراب: _ هنروح فين؟ حسن بجدية: _ هنروح المستشفى، يلا انجزي. فريدة بقلق: _ حد تعبان ولا ايه؟ تأفف حسن بانزعاج وقال: _ هنفتح تحقيق ولا ايه! ما تنجزي خلينا نخرج. خافت فريدة من نبرته، واتحركت بسرعة تنفذ كلامه فاخدها للمستشفى وهناك تفاجأت به بيسأل عن دكتور نسا فاعتقدت فريدة إنه مفكرها بتكذب عليها ومش حامل. عيونها دمعت لأنها أدركت خسارتها لثقة حسن واللي هتعاني معاه كتير لحد ما يرجع يثق فيها تاني، خرجت عن صمتها وطلبت منه يطلب دكتورة بدل الدكتور لكنه رد عليها بحدة: _ دكتور من دكتورة مش هتفرق، المهم حد يكشف عليكي ونخلص. هزت دماغها باستسلام مع انها كانت مخنوقة من فكرة الدكتور إلا إنها مقدرتش تتكلم عشان ميحصلش بينهم مشاكل، جه دورهم في الكشف ولما دخلوا كشف عليها الدكتور سونار وسألها كام سؤال ولما قعدت جنب حسن عشان تسمع إرشادات الدكتور تفاجأت بحسن اللي قال: _ احنا مش عايزين حاجة تحافظ على الحمل، احنا محتاجين علاج يخلصنا منه في اسرع وقت. عيونها وسعت بصدمة، قبل ما تنطق بخفوت: _ بتقول ايه يا حسن؟!! دا ابننا اللي بنتمناه وبنطلبه من ربنا بقالنا خمس سنين!! بصلها حسن بحدة وقال: _ انا اكيد مش هخلف منك بعد ما عرفت ماضيكي المهبب، دا الحل الوحيد لو عايزة تكملي معايا. دموعها نزلت كالعادة ونقلت نظرها بينه وبين الدكتورة قبل ما تقول برجاء: _ عشان خاطري يا حسن بلاش تخسرني حد فيكم. صرخ حسن في وشها بضيق: _ ملكيش خاطر عندي، ولازم تعرفي انك هتنزليه سواء برضاكي أو غصب عنك، فلو عايزاني يبقى توافقي من سكات، وعايز الرد دلوقت..... بلعت ريقها بصعوبة وغمضت عيونها بوجع وقالت بنبرة حاسمة....... يتبع............. _ لو فعلاً عايزة جوازنا يكمل يبقى لازم تجهضي الجنين، وسواء وافقتي أو لاء أنا مستحيل اسمح له يتولد. خانتها دموعها زي ما خانتها فكرتها عن حسن، هو ازاي بقى قاسي كدا! هو دا حسن اللي كان بيعاملها بالمعروف! هو دا زوجها الحنون اللي كان دايمًا يعبر لها عن حبه لدرجة إنها كانت تشك إن جوازهم صالونات!!! غمضت عيونها بوجع وبلعت ريقها بصعوبة وقبل ما تتكلم تدخل الدكتور وقال بحدة: _ هو حضرتك لسه هتفكري يا مدام!! ارفضي طبعًا! رد عليه حسن بغضب مكتوم: _ وحضرتك بتتدخل ليه يا دكتور؟ إحنا اللي نقرر لانه ابننا مش ابنك! الدكتور بسخرية: _ حضرتك!! لهجة كلامك دي ميتقالش فيها حضرتك!! وبعدين اللي انت بتعمله دا ج*ريمة وانا اكيد مش هشارك فيها. بدأ صوت حسن يرتفع وقال: _ وانت مالك؟ وبعدين ايه المشكلة في الإجهاض يعني؟ أكيد مش هنخلف بالعافية؟! وقف الدكتور وقال بغيظ: _ المدام كويسة والجنين كويس يبقى مفيش سبب للإجهاض، وبعدين المدام شكلها عايزة الجنين يبقى أنت مش هتجبرنا نق*تل روح عشان مش مستعد تشيل مسؤولية. اندفع حسن بعصبية مفرطة: _ ما تحترم نفسك يا جدع انت! انت كدا بتغلط فيا وأنا مسمحش بكدا. الدكتور بلامبالة: _ تسمح ولا متسمحش مش مهم، خد بعضك واتفضل من غير مطرود. شدها حسن بعصبية واتحرك بعد ما قال: _ انت هتطردنا من الجنة يعني! قومي جبتلنا الكلام. حاولت فريدة تفك قبضته عن معصمها فقالت: _ ايدي يا حسن أنت بتوجعني. ضغط على أيدها اكتر وقال بتحفز: _ اللي في بطنك ده مستحيل يتولد يا فريدة انتي فاهمة؟؟ حاولت تبعد ايده ومردتش على كلامه فشدها عليه اكتر وهو بيزعق: _ ردي عليا، فاهمة ولا مش فاهمة؟!! حركت دماغها بتأكيد وقالت بخفوت: _ فاهمة يا حسن، فاهمة. ساب ايدها بتعجرف وقال: _ دلوقت هنشوف دكتور تاني وهناك تقولي انك موافقة، وبطلي دموع التماسيح دي. تغاضت عن كلامه وسألته بحسرة: _ انت عايز تق*تل ابننا يا حسن؟ مش دا اللي كنا بنتمناه من ربنا؟ دلوقت نق*تله بإيدنا؟!! دا ابننا يا حسن! حسن بسخرية لاذعة: _ ابننا ده كنت مستنيه على أحر من الجمر قبل ما أعرف حقيقتك، إنما دلوقت خلاص مش عايز اخلف منك، الله اعلم انتي هببتي ايه تاني في الماضي ومخبية عني. كانت مصدومة من أسلوبه اللي اتحول ١٨٠ درجة لمجرد إنها أخطأت في ماضي هو مكنش موجود فيه!! عجز لسانها عن الرد فقال حسن ببرود: _ متبصليش كدا، واتحركي قدامي خلينا نخلص من المصيبة اللي في بطنك ده. _ مصيبة؟! أنت بتقول على نعمة ربنا مصيبة؟؟! كان دا صوت ماهر اللي طل من ورا حسن اللي تأفف بضيق لما شافه وقال: _ كنت ناقصك بقى! خطف نظرة تجاه فريدة اللي كانت بتبصله وكأنه طوق النجاة، قد ايه كانت عيونها حزينة لدرجة أنه حس بقلبه بيتحرك من مكانه!!! شد على إيده كمحاولة لكتم انفعاله وقال بجدية: _ عايز تجهض الجنين ليه يا حسن؟ حسن ببرود: _ وانت مالك انت؟! ولا هي اي محاولة عشان تلفت نظرها يعني! ماهر بهدوء: _ المفروض اننا صحاب يا حسن وأنا عايز مصلحتك مش اكتر. ضحك حسن وقال بسخرية: _ عايز مصلحتي! عيل صغير أنا بقى واقتنعت بكلامك! استغفر ماهر اكتر من مرة وتوجه بنظره لعربية عابرة، هو فعلًا كذب دلوقت، هو مش عايز مصلحة حسن هو يهمه مصلحة فريدة وإنها تكون مبسوطة والباقي يعمل اللي يعجبه. اتنهد ماهر وقال بجدية: _ انت مش كنت طالب مني اشرحلك عن الدين؟ اهو النهاردة اول درس ولازم تعرف إن اللي انت عايز تعمله دا حرام ربنا سبحانه وتعالى قال بسم الله الرحمن الرحيم﴿وَلَا تَقْ*تُلُوا أَوْلَادَكُمْ خَشْيَةَ إِمْلَاقٍ ۖ نَّحْنُ نَرْزُقُهُمْ وَإِيَّاكُمْ ۚ إِنَّ قَ*تْلَهُمْ كَانَ خِطْئًا كَبِيرًا﴾. صدق الله العظيم. وقال كمان بسم الله الرحمن الرحيم ﴿وَلَا تَقْتُ*لُوا النَّفْسَ الَّتِي حَرَّمَ اللَّهُ إِلَّا بِالْحَقِّ﴾ صدق الله العظيم. حسن بسخرية: _ طب ما تشوفلنا حاجة كدا تحرم العلاقة اللي بينك وبين مراتي. عند الجملة دي ومقدرتش فريدة تتحكم في إحساس الغضب اللي غطى على حزنها وصدمتها وبحركة سريعة نزلت على وشه بكف صاعق. حط ايده على خده بصدمة وعروقه بتتنفخ في حين قالت فريدة بتحذير: _ توصل إنك تغلط في أخلاقي وتتهمني بحاجة محصلتش يبقى مش هسكتلك، وأنا لو كنت ساكتة وبحايل فيك فدا مش ضعف مني وإنما عشان غلاوتك عندي، بس بعد كلامك ده أنا اللي مش عايزة أكمل معاك يا حسن. الكف اللي جرح كبرياء حسن كان صدمة أكبر بالنسبة لماهر اللي متكلمش وكأنه بيستوعب شجاعتها وتمردها، انتبه لحسن اللي رفع ايده عشان يرد لها الكف فمنعه ماهر لما مسك ايده واتحرك بخفة عشان يفصل بينهم وقال بتحذير: _ هتمد ايدك على بنت يا حسن! شد حسن ايده وقال بغيظ: _ يعني ينفع تضربني! واحدة زبالة متسواش زي دي تمد أيدها عليا!! ماهر بحدة: _ لم لسانك واحفظ ألفاظك يا حسن، مش معنى إني ساكت يبقى انت صح!! ضحك حسن بخسرية: _ ما انت لازم هتقف جنبها، هتوقع منك ايه يعني! المرة اللي فاتت بعتتك عشان تطلب مني أطلقها و النهاردة كلمتك عشان تيجي وتلحقها. مش معقول كمية الاتهامات اللي بيرميها عليها حسن، هي ازاي كانت واثقة فيه وشايفة فيه الأمان!! اتحركت فريدة من ورا ماهر وقالت بحدة: _ اللي فيه داء يا حسن مفكر الناس كلهم زيه. حسن بثقة: _ انتم فعلًا مطبخينها سوا! طب وحياة امك ما هخليكم تتهنوا ومش هطلقك وهتنزلي اللي في بطنك يعني هينزل ......تعالي. نطق كلامه بتوعد وسحبها من أيدها ومهتمش باعتراضها ولا بالناس اللي واقفين يتفرجوا عليهم قدام المستشفى، وهنا بقى مقدرش ماهر يتحكم في غضبه اكتر من كدا وبحركة سريعة اعترض طريق حسن ولكمه بقوة وقال: _ مش قالتلك سيبها! يبقى تسيبها. تزامنًا مع الجملة الأخيرة شد ايد حسن عن فريدة اللي رجعت تبكي وهي بتقول: _ من فضلك يا ماهر متكبرش الموضوع، الناس بتتفرج علينا. ماهر بغضب: _ انا لو كنت ساكت اليومين اللي فاتوا فده عشان فكرتك اتغيرت، لكن من دلوقت مش هسمحلك تضايقها أو تزعلها. وقف تاكس وطلب منها تركب، فحاول حسن إنه يمنعها لكن ماهر سكته بلكمة تانية وقعته على الأرض ومقارنة بلياقة ماهر البدينة لو اشتبكوا الاتنين فحسن هيطبق من ضربات ماهر. **************** التفتت فريدة على صوت ماهر اللي نده عليها بعد ما حاسب التاكس وقال بجدية: _ بلاش ترجعي لحسن، انتي تستاهلي حد أحسن. قربت منه خطوتين مع احتفاظها بمسافة مناسبة بينهم وقالت بترقب: _ والحد ده يبقى أنت؟؟ ارتبك ماهر من كلامها فحمحم وقال بتوتر واضح: _ أنا مقصدش كدا. فريدة بفضول: _ لما اتخانقت انت وحسن من يومين، كنت رايح تطلب منه يطلقني ليه؟ وليه سمعت من طنط وردة إن طلاقي هيبسطك؟ وليه حسن مفكر ان في بينا حاجة؟؟؟! لو هيسمع كلام قلبه كان هيعترف حالًا بمشاعره، لكن العقل كان عارف إن دا لا وقته ولا أوانه ولا يصح إنه يعبرلها عن مشاعره وهي أجنبية عنه، فحاول يبرر موقفه لما قال بجدية: _ انا لما زورت حسن في بيتكم اول حاجة فهمتها من كلامه إنه شاكك فينا احنا الاتنين، وانا عارف حسن كويس وعارف إنه من النوع اللي ميحبش حد يتحكم فيه، يعني لو طلبتي منه حاجة بيعمل عكسها، عشان كدا طلبت منه يطلقك لكني استغربت لما مد ايده عليا ووقتها كان بيقول إنه هيطلقك و......... قطع كلامه فجأة لأنه لو حكي لها الكلام الي قاله يبقى هيحكي عن ماضي حسن ودي حاجة متنفعش بالنسبة له عشان كدا فضل الانسحاب وقال: _ أنا لازم امشي عشان العصر قرب. فريدة بهدوء: _ عمومًا شكرًا على مساعدتك من شوية، ومش عايزة اعرف اللي حصل بينك وبين حسن ومهمًا كانت شكوكه فيا مبقاش يهم لأني عارفة نفسي كويس وعارفة اني مش بحبك ومفيش بينا اي تجاوزات. جملتها الأخيرة كانت زي السهم اللي رشق في قلبه، هو عارف إن مشاعرها تجاهه معدومة بس فكرة إنه يسمع منها الكلام ده كان مؤلم بطريقة هو نفسه استغربها!!! يتبع.............. _ مش عايزة اعرف اللي حصل بينك وبين حسن ومهمًا كانت شكوكه فيا مبقاش يهم لأني عارفة نفسي كويس وعارفة اني مش بحبك ومفيش بينا اي تجاوزات. جملتها الأخيرة كانت زي السهم اللي رشق في قلبه، هو عارف إن مشاعرها تجاهه معدومة بس فكرة إنه يسمع منها الكلام ده كان مؤلم بطريقة هو نفسه استغربها!!! *********** اترمت فريدة في حضن وردة وهي بتحكى لها اللي حصل، فطبطبت عليها قبل ما تبعدها وتمسح دموعها بحنان: _ كفاية دموع يا فريدة عشان خاطر ابنك، حسن أصلا ميتزعلش عليه. حطت فريدة أيدها على بطنها البارز بخفة وقالت: _ أنا مقهورة على ابني يا طنط، هيتولد يلاقي عنده أب قاسي، وأهل منفصلين. ابتسمت لها وردة بود وقالت: _ بس هيلاقي عنده أم فيها حنية الدنيا كلها، وهيلاقي جد يحبه ويعلمه وخالة تدلعه وتيتا تهتم به لو الماما مشغولة، مش أنا بردو هبقى اكيد تيتا ولا ايه؟ هزت فريدة دماغها بتأكيد وقالت: _ اكيد يا طنط، لولا أني بشوف فيكي حنان أمي مكنش زماني بشتكيلك دلوقت بدل ما احكي لبابا، يارب بس مكونش بتقل عليكي. وردة بحنان: _ وطول ما أنا عايشة يا فريدة هفضل حضنك الدافي والركن الهادي اللي هيسمعك وعمره ما هيمل منك أبدًا. *************** صمت تام في المسجد، مفيش غير ماهر اللي قاعد سرحان وكأنه مغيب عن الواقع، مش شايف قدامه غير صورة فريدة وجملة أنا مش بحبك بتتردد على سمعه. اول دمعة هربت من عيونه كانت كفيلة عشان تفوقه، مرر ايده على خده باستغراب من نفسه، معقول جملة بسيطة تهزه كدا!!! دمعة جابت التانية وبدأ يحس بتقل على قلبه وشعور بالضيق بيتملك منه وكأنه هيخنقه، اتنهد بحزن ورجع يصلي من تاني واول دعوة في سجوده طلب من ربنا يريح قلبه، دي الدعوة الوحيدة اللي كانت من نصيبه وتلقائي اندرج لسانه في الدعاء لفريدة ومع ذلك متمنهاش لنفسه في ولا دعوة منهم. بعد ما انتهى تفاجأ بمكالمات فائتة من حسن، وقبل ما يرن عليه رجع حسن اتصل تاني فرد ماهر بزهق: _ خير يا حسن. حسن بحزن: _ انا عارف انك مش طايقني دلوقت ودا حقك، بس عايز نتقابل دلوقت. ماهر ببرود: _ ونتقابل ليه؟ _ انا عارف اني تماديت وغلطت جامد في حقك وفي حق فريدة وعشان كدا عايز اعتذر منكم انا لما فكرت مع نفسي وحسيت اني هخسر فريدة ندمت على اللي عملته، فعشان خاطر الصداقة اللي بينا تعالى قابلني عند عمتك أنا مستنيك. فصل ماهر الخط بدون ما يرد، بينما على الجهة التانية ابتسم حسن بخبث وبص على العمارة اللي ساكن فيها والد فريدة، واتحرك يكمل خطته بعد ما همس لنفسه: _ والله لتعيشوا أيام سودا عشان تعرفو انكم غفلتوا الشخص الغلط. استقبله والد فريدة بترحيب شديد، فدخل حسن وقال بحزن: _ ممكن تطلب من فريدة ترجع لبيتها يا عمي، انا بجد مش عارف اعيش من غيرها. عقد الوالد حواجبه باستغراب: _ هي فريدة مش عندك في البيت؟؟! حرك حسن دماغه برفض وقال بحزن مصطنع: _ فريدة سابتني وسابت البيت عشان خاطر ماهر، بس أنا متأكد إن ماهر هو اللي ضحك عليها وعارف إنها بتحبني. اتصدم الوالد من اللي سمعه وعيونه وسعت وقال: _ فريدة عملت كدا!! هتسيبك ليه دي بتحبك. _ هو حضرتك مستغرب ليه يا عمي؟ هي فريدة مجتش عندك؟ دي سايبة البيت من أربع أيام!!! من صدمته مقدرش ينطق، فكمل حسن بخبث: _ معقول تكون عند ماهر في شقته؟! صرخ الوالد بغضب: _ انت بتقول ايه يا حسن! ما تحافظ على كلامك! وقف حسن وقال بتحفز: _ أنا رايح اشوفها، هبقى اطمنك يا عمي. وقف الوالد وقال: _ تطمني ايه وزفت إيه بعد اللي قولته ده، انا جاي معاك. وبالفعل اتحركوا سوا واترسمت ابتسامة خفيفة على شفايف حسن وبدون ما ينتبه والد فريدة فتح حسن فونه وبعت رسالة لعلياء مكتوب فيها"دورك دلوقت، نص ساعة تكوني خلصتي" على الطرف التاني وصل ماهر لبيت عمته اللي اول ما فتحت الباب وشافته قالت بمرح: _ شكلنا هنفرح بيك قريب. ابتسم ماهر بسخرية وقال: _ ومالو يا عمتي، بس احب اصححها شكلك هتفرحي فيا مش ليا. بصت له وردة باستغراب، فكمل ماهر بتوضيح: _ حسن جاي ورايا عشان يصالح فريدة. في اللحظة دي كانت خارجة فريدة من الحمام بعد ما غسلت وشها، وسمعت جملة ماهر الأخيرة فقالت بضيق: _ انا مستحيل ارجع له تاني، متخلهوش يجي لو سمحت، ولا اقولك أنا أصلًا ماشية يجي براحته بقى. سألها ماهر بترقب: _ يعني مش عايزة تشوفيه؟ فريدة باستنكار: _ حضرتك تعتقد بعد اللي عمله فيا من شوية ممكن اثق فيه وأكمل حياتي معاه! أنا مستحيل أكمل معاه وهطلب الطلاق ولو رفض هرفع عليه قض*ية خلع. * _ ليه يا فريدة؟؟ دا كان سؤال والدها اللي وصل مع حسن، فردت عليه وردة: _ اتفضل جوا يا حاج ميصحش نتكلم على الباب كدا. دخلوا كلهم في الصالون، وكانت فريدة واقفة على الباب ومرتبكة فشاور لها والدها بحنان عشان تقرب وتقعد جنبه، وبالفعل قعدت جنبه، فحاوطها من كتفها وشاور على حسن وقال: _ قبل خمس سنين انا نصحتك كتير عشان ترفضي الجواز من حسن، و النهاردة كنت هطلب منك تنفصلي عنه عشان كدا أنا جنبك ومش هتخلى عنك أبدًا اهم حاجة تكوني مرتاحة ومبسوطة يا فريدة. اتصدم حسن لانه كان مستني تعنيف من والدها، كان متوقع رد فعل تاني غيره ده تمامًا بس اللي حصل إن ابوها ضرب بكلام حسن عرض الحائط واحتوى بنته!!! بدأ والدها يحكي الحوار اللي حصل بينه وبين حسن من شوية، وبعد ما خلص كلامه قال بهدوء: _ عرفتي بقى يا حبيبة بابا إن الطبع مع طلوع الروح! حركت دماغها بخفة وقالت: _ عرفت يا بابا، بس محدش بيتعلم ببلاش وحسن دا اكبر درس أنا اخدته في حياتي. هب حسن من مكانه وقال بغضب: _ انت بتشجعها تسيب جوزها وتبقى واحدة خاينة! ماهر بغضب: _ احترم نفسك يا حسن. والد فريدة بتكشيرة: _ أخرس، قطع لسان اللي يقول على بنتي كلمة مش كويسة، فريدة اشرف منك وكانت كتيرة عليك، ولعلمك هي كانت عارفة ماضيك كله وفضلت تعطيك فرصة تانية. حسن بتهكم: _ دا على أساس إن ماضيها ورقة بيضا بتلمع! ما انتم كمان خدعتوني وكذبتوا عليا ودبستوني فيها. بصت له فريدة وقالت بثقة: _ شرف ليك إن أنا في يوم كنت مراتك، انت مفكر نفسك مين!! أنا اخدتك بمزاجي وبردو هنفصل عنك بمزاجي. حسن بعناد: _ دا في أحلامك يا بت، دا أنا هطلبك في بيت الطاعة. ابتسم ماهر بسخرية: _ مش هتلحق يا حسن. بصله حسن باستغراب فقال ماهر بهدوء ساخر: _ خمس دقايق بالظبط وهيبقى المأذون هنا عشان تطلقها يا حسن. حسن برفض: _ دا علي ج*ثتي. ماهر بسخرية: _ لاء مش على ج*ثتك، وإنما على سجنك يا حسن. تدخل والد فريدة: _ معانا شهادة الدكتور وأمن المستشفى إنك حاولت تجبرها على الإجهاض، يعني لو رفعنا عليك ق*ضية هنجيبك الأرض وبردو هتخلعك وهتاخد حقوقها كاملة فاللي هيزيد عليها بقى انك ممكن تتسجن، فليه تجيب لنفسك المرمطة!! طلقها بالمعروف زي ما اتجوزتها بالمعروف. كانت فريدة مستغربة التوافق اللي بين ابوها وماهر في الكلام وكأنهم متفقين سوا، دي هي يا دوب طلبت الطلاق من حسن الضهر يطلقوها فعليًا قبل العشا!! ومع ذلك هي فضلت السكوت لأن ابوها كدا كدا مش هيعمل حاجة إلا لمصلحتها!!! اتقابلت عيونها مع عيون حسن ولأول مرة من فترة طويلة تشوف في عيونه نفس النظرة الحنونة وكأنه خايف يخسرها، أما هي فكانت نظرتها باردة، دورت جواها على مشاعر تخليها تتمسك بحسن ملقتش غير مشاعر النفور والقرف. خرج حسن عن صمته وقال: _ عايز اتكلم مع فريدة شوية على انفراد. رد ابوها برفض قاطع: _ لاء. طبطبت فريدة على ايد والدها وقالت: _ متقلقش يا بابا هنتكلم على باب الأوضة هنا. اتنهد والدها وحرك دماغه بموافقة. همس لها حسن بصوت مش مسموع: _ يعني انتي موافقة على الطلاق. _ اكيد. قرب دماغه منها وقال بخبث: _ عايزة تعيشي عمرك كله بسمعة سيئة وتبقى الزوجة اللي خانت ابن البلد الشهم المتدين المحترم اللي زي!! رددت بسخرية: _ أنت محترم!! كمل حسن بغيظ: _ علياء و وائل حاليًا في الحارة بتاعتكم بينشروا إشاعات عن فريدة المنتقبة اللي تعرف واحد على جوزها. صعقت من كلامه ومقدرتش ترد، فابتسم بانتصار وقال: _ تحبي بقى ترجعي بيت جوزك معززة مكرمة ولا ترجعي بيت أبوكي مطلقة وخاينة!!! يتبع............ _ عايزة تعيشي عمرك كله بسمعة سيئة وتبقى الزوجة اللي خانت ابن البلد الشهم المتدين المحترم اللي زي!! رددت بسخرية: _ أنت محترم!! كمل حسن بغيظ: _ علياء و وائل حاليًا في الحي السكني بتاعكم بينشروا إشاعات عن فريدة المنتقبة اللي تعرف واحد على جوزها. صعقت من كلامه ومقدرتش ترد، فابتسم بانتصار وقال: _ تحبي بقى ترجعي بيت جوزك معززة مكرمة ولا ترجعي بيت أبوكي مطلقة وخاينة!!! ثواني معدودة قبل ما تلفت فريدة نظر الجميع وهي بتعلم على خد حسن لتاني مرة بكف غير متوقع، في اللحظة دي رن فون والدها برقم اختها فاضطر يرد، في حين اتحرك ماهر تجاه حسن اللي شد فريدة من شعرها. بعده ماهر بغضب وتني دراعه ورا ضهره وهو بيحذره يمد ايده عليها، فتدخلت وردة وقالت بحدة: _ سيبه يا ماهر، مش هنحلها بلطجة!! تغاضي ماهر عن كلام عمته وسأل فريدة بترقب: _ قالك ايه؟؟ كررت فريدة كلام حسن بصوت عالي، فقال ماهر باستنكار: _ وضربتيه كف واحد بس؟! وردة بحدة: _ ماهر، قولتلك مش بالعنف. نظرات ماهر ووجود ابوها شجعوها عشان تاخد حقها بعد ما دمر سمعتها، وبدل الكف ضربته تلاتة وماهر مكتفه، ولأول مرة تظهر شخصية فريدة المتمردة العنيدة قدام حسن لما قالت: _ مش انا اللي هخاف من المجتمع، أنت كدا عمرك ما فهمتني، ودا كويس عشان أنا أصلًا أعلى من مستواك، ورجوع مش هرجع يا حسن، وهترمي عليا اليمين. صرخ حسن بغضب شديد: _ بتمدي ايدك عليا يا بنت ال*** قرب والدها ومسك رقبته وقال بتوعد: _ بتغلط فيا وأنا موجود!!! حاولت وردة تدافع عن حسن: _ مينفعش كدا يا ابو فريدة! لما احنا نحل المشكلة بالهمجية دي سيبنا ايه للأطفال!! والد فريدة بضيق: _ الكلام اللي الحيوان ده قاله حصل فعلًا ومش مجرد تهديد، نغم بنتي لسه قافلة معايا وبتقول إن خبر طلاق فريدة انتشر في الحي بصورة مش كويسة، تعتقدي لما يجي على سمعتنا هنسكت له!!! بصت وردة لحسن بيأس: _ خيبت املى فيك يا حسن، فكرتك اتغيرت بس مع الأسف خذلتني. وصل المأذون، وماهر هدد حسن أنهم هيرفعوا عليه قض*ية ومع ذلك رفض حسن إنه يطلقها وسابهم ومشي، ومحدش قدر يضغط عليه لأن الطلاق الإجباري باطل
