رواية رومانسية ج1

الفصل الأول

في مدينة الإسكندرية عروس البحر المتوسط
مشت بثقة نحو الممر المؤدي لغرفة مدير الجريدة
وقفت أمام الباب، وتنهدت بعمق….فكانت تعلم أنها على وشك الدخول في مشاجرة جديدة معه، كما اعتادت يوميًا

سمح لها بالدخول، وما إن دخلت حتى بادرها بغضب قائلاً الجملة المعتادة التي حفظتها عن ظهر قلب، وكانت تعي ان اليوم سيكون ناقصًا إذا لم تحدث تلك المشاجرة وتسمع تلك الكلمات :
أهلاً باللي ربنا بعتها ليا عشان تكفر عن ذنوبي

كتمت ضحكتها بصعوبة، وقالت بمشاكسة :
صباح النور يا أستاذ مدحت

رد عليها مدحت بغضب :
صباح زفت ومنيل على دماغك ودماغ اللي شغلك عنده !!!

ثم تابع بلهجة مليئة بالغضب والغيظ :
أنتي مش هترتاحي غير لما تقفلي الجريدة دي، وقبل كل ده مش هتسكتي غير لما تنهي حياتك بإيدك

ردت عليه بجدية وقوة :
سبق وقلت لحضرتك إني مش هسكت غير لما أكشف حامد صفوان للكل…أنا مش بعمل حاجة غلط، أنا بكشف حقايق للناس

رد عليها مدحت بحدة قائلاً :
أنتي بتتعاملي مع الموضوع كأنه انتقام للي حصل من حوالي كام شهر، مش على أساس إنه راجل فاسد عاوزة تكشفيه وتبيني حقيقته للناس

أجابته جيانا بغضب وبلهجة مليئة بالعزم :
مش فارقة، الاتنين بيوصلوا لنفس النتيجة، قولتهالك قبل كده وهقولهالك تاني يا جوز خالتي يا أنا يا حامد صفوان…هفضل وراه ومش هسيبه غير لما أخد حقي… يا أنا يا هو !!!!!

غادرت المكتب بوجه مكفهر، وقلبها مشتعل من الغضب كلما تذكرت ما فعله ذلك الحقير بها والحادث الذي تعرضت له، اشتعلت نار الانتقام في قلبها و أقسمت أنها ستجعل حسابه عسيرًا، ولكنها تعلم أن الصبر هو المفتاح، فكل شيء يأتي في وقته جميل

…….
في أحد القصور الضخمة، جلس ذلك الرجل يقرأ المقال الذي كُتب عنه في إحدى الصحف الشهيرة، وعيناه تشتعلان بالغضب الشديد

صرخ بغل وحقد بعد أن انتهى من القراءة :
البت دي مش ناوية تريحنا وتجيبها لبر ولا ايه !!

رد عليه ذراعه الأيمن “حسين” :
يا حامد باشا، من ساعة ما قرصنا ودنها من كام شهر، وهي مش بتسكت، بتدور ورانا أكتر من الأول

حامد بنبرة تهديد وشر :
تبقى هي السبب في اللي هيجرى ليها ، دبور زن على خراب عشه !!!

سأل حسين بجدية :
تأمر بإيه يا باشا

أجابه حامد بلهجة حازمة :
عينك تفضل عليها 24 ساعة، ما تغيبش عنها لحظة، وأنا هتصرف بطريقتي !!!!