ندي 2الاخير

-مراتك القادرة ،الس** مرجعتش البيت لحد دلوقتي دكتور ايه تقعد عنده بالساعات اما متربتش صحيح -ايييييه -شوف مراتك فين ..زمانها دايرة على حل شعرها -ياما بتقولي ايه؟ هي خارجة من امته -خارجة من الساعة ٤ الساعة دلوقتي ١٠ يا سبع ،مراتك فين بقا كانت نسرين قاعدة وقالت بصوت واطي -زمانها طفشت من عمايلكم، جدعة يابت يا جميلة ،بردتي نار قلبي والله كمل أجمد حديثه وقال -اقفلي ياما أما أرن على اهلها يمكن راحت هناك، ولو حصلت يبقا هكسر رجليها ، علشان قولت متهوبش ناحية هناك -شوف يابني ،دا احنا ولايا عاوز الشارع يقول علينا ايه وهيا راجعة في أنصاص الليالي رن على والدها بدا منصور الحديث وقال -الو ، مين !؟ -أنا أمجد ،جوز جميلة سكت منصور عند ذكر اسم ابنته الحبيبة وقال بهدوء -خير يابني كان أمجد يتحدث بنبرة صوت عالية وقال -لا مش خير ،جميلة فين؟؟ وقف منصور عن مقعده وقال بغرابة -يعني ايه جميلة فين !! أنت جاي تسالني أنا ؟ ليه هي بايته في بيتي ولا بيتك -اه شغل اللوع بقا -ولد احترم نفسك ،شكلك متربتش معرفش بنتك حبيتك وجابتك من انهي داهيه ،مراتك فين يا اللي عامل راجل -هجبها ولو طلعت أنت عارف ومش بتقولي صدقوني هتزعلوا مني قفل التلفون وقعد منصور على مقعده وجاءت زينب من المطبخ وهيا بتقول -مالك صوتك عالي ليه ؟ -جميلة دق القلق في قلبها وقالت بخوف -مالها جميلة -جوزها بيرن فاكرها هنا وهيا مش في البيت -يعني اي؟ امال بنتي فين يا منصور رد منصور بهدوء -معرفش، بنت بتعمل فينا كده ليه ؟؟ ها ملعون الحب اللي يعمل كده ،راحت تحب عيل ميسواش ضحك عليها وفي الاخر …اعمل ايه ،شوفيلي مروه بسرعة -حاضر كانت زينب بتترعش وقلبها واقع في رجليها جريت على الأوضة ودورت في الشنطة بتاعتها لحد ما لقت موبايلها ايدها بتخبط في بعض وهي بتدور على رقم مروة. -الو ،ايوه يا طنط تحدثت زينب سريعًا وقالت -مروه، جميلة عندك؟ نظرت مروة لجميلة بتردد وردت -ايوه يا طنط جميلة هنا -جوزها قالب عليها الدنيا وعمك منصور هنا مش عارف هيا فين ردت مروه بقلق -جوزها عرف انها عندي؟؟ -لا لا ، احنا جايين -ماشي يا طنط بس براحه عليها جميلة منهارة يا طنط والله قفلت زينب مع مروه وقالت لمنصور -جميلة عند مروه يلا بينا ،أنا بنتي هترجع بيتها رد باستغراب -يعني اي -يعني هرجعها هنا يا منصور، ومتقسيش قلبك عليها البنت منهاره ،يلا بينا بعد مرور نص ساعة الباب خبط جامد مروة فتحت ولقيت منصور وزينب واقفين ووشهم شايل الدنيا كلها اول ما جميلة سمعت صوت بابا ومامتها، قامت من على السرير وجريت على الصالة جريت وهي بتعيط وبتترمي في حضنهم ماما بابا زينب حضنتها جامد وطبطبت على ضهرها -حبيبتي يا بنتي... مالك بس؟ خوفتينا عليكي منصور كان واقف ساكت في الأول، شايف بنته متبهدلة وعينيها وارمة من العياط قلبه وجعه واتنهد -تعالي جميلة سابت مامتها وجريت على ابوها وحضنته وهي بتنهار -حقك عليا يا بابا والله ما كان قصدي افضحكم بس انا تعبت منصور حط ايده على راسها وبدأ يهديها -خلاص يا حبيبتي... خلاص اهدي أنا اهو معاكي محدش هيقربلك بس قوليلي عمل فيكي ايه؟ جميلة بعدت عنه شوية ومسحت دموعها وقالت بصوت متقطع بس قوي -أنا عاوزه اطلق يا بابا النهاية قربت ،باذن الله تكون عجبتكم وحاجة خفيفة على قلبكم ،دعواتكم بقا ♥️♥️ معلش الفصل صغير بس الوقت اتأخر وكان لازم أنزلكم🫂 -أنا عاوزه اطلق يا بابا رد عليها منصور وقال -طب تعالي نقعد ثم وجهه حديثه لمروه -حبيبه عمو ممكن تعملي لينا كُلنا شفشق ليمون من ايدك الحلوين دول -عنيا يا عمو ثم استطرد منصور وقال -زينب روحي مع مروه حابب اتكلم مع جميلة لوحدنا جاءت زينب لتتحدث لكن قامت مروه بمسك كفيها قائلة -يلا بينا يا طنط دخلت زينب مع مروه ،نظر منصور لجميلة وابتسم ابتسامه بسيطة وقال -مش هلومك على اللي حصل ،لكن مش دا كان اختيارك، مش وقفتي في نص الصالة وقولتي يا هو يا مفيش،واتجوزتي مع غير رضايا ،ليه دلوقتي بتشتكي ظهر التوتر والقلق على ملامح جميلة وبدات تفرك يدها ببعض وترددت في الحديث وقالت -أصل….أصل -مفيش أصل، واحد غيري كان قالك شيلي شيلتك لكن متهونيش يا جميلة ،احكيلي حصل ايه!؟؟ أخذت جميلة نفس عميق وهمت بالحديث -يا بابا، في أول الجواز فهمني إن الحياة وردي وإن هنكون لوحدينا بعيد عن العيلة وكُله تمام، حتى كان قايل إن كام شهر ونستقر بره سوا ،والإجازه كانت شهر ونص، بعد اسبوعين قص التذكرة بُناًء على طلب من والدته إن كفاية هتقعد تعمل ايه، سافر شوف شغلك ،لقيته بدا يتكلم إن كُل حاجة تكون تحت عند والدته ،الأكل والشرب حتى مفيش مصروف للبيت ،لو احتاجت حاجك اطلُب منها، بابا أنا بيتي مفهوش معلقة الشاي حتى، بابا أنا كسرت طبق تحت كُنت خايفة أوي ،بابا حاسة إني اتكسرت وكرامتي انجرحت في البيت دا، حتى شنطة سفر جوزي هيا اللي حضرتها، بتدخل في اي تفصيلة، انهارده وأنا بقولها عاوزه فلوس اروح للدكتور ، كدبت علشان اشوف مروه وعلشان اتحركت لأن معييش فلوس ،حسيت إني انذليت أوي يا بابا ،حاجة جوايا اتكسرت ،خوفت أقول تحسسوني بالفشل ،بس مش هقدر أكمل أنا عاوزه ارجع البيت سكتت جميلة ودموعها بتنزل ،كانها كانت حابسه كل دا بقالها شهور ومستنيه حد يقولها احكي منصور فضل ساكت ثواني، وبعدين قام من مكانه راح جمبها ، طبطب على كتفها وانفجرت في البكاء، شدها لحضنه بقوة وقال -بس يا قلب ابوكي ، خلاص اهدي حضنته جميلة بقوة كأنها رجعت بيتها تاني،كانت بتعيط بصوت مكتوم في حضنه وبدأت تقول -يا بابا…أنا اتكسرت… والله اتكسرت مسح منصور على شعرها زي ما كانت بيعمل وهي صُغيرة وقال -اسمعي يا جميلة أنتِ بنتي، طول ما أنا فيا نفس أنتِ مش هتتهاني ولا هتتذلي في بيت حد كرامتك من كرامتي بعد عنها شوية ومسك وشها بين ايديه وبص في عنيها وقال -أنا عارف إنك خوفتي تيجي تقولي ، فكرتي هقولك أنتِ اختارتي واشربي بقا، صح؟ هزت رأسها وهيا بتعيط بشدة . مسح على شعرها بحنو وقال -لا يا جميلة أنا أبوكي قبل ما أكون اللي كُنت رافض، وأنا لو شايفك مبسوطة كنت هسكت وارضى، لكن أنتِ جاية مكسورة والمكسور ملهوش غير اهله يلمو جروحه خد نفس عميق وقال بهدوء --لو مش قادرة تكملي مش هتكملي، وأنا اللي هقف واطقلك منه واجبلك حقك لحد عندك، أنتِ مش هترجعي تاني حتى لو جه باس راسك شهقت جميلة وقالت -بجد يابابا؟ مش هتقولي فكري تاني؟ -افكر ايه؟ واحده ممعهاش تمن كشف الدكتور وتبقى خايفة تكسر طبق في بيتها، دا مش جواز دا حبس، وأنا مربتكيش حد يزيلك خرجت مروه من المطبخ وهي بتقول -والله الليمون اتعمل ومرر كمان ضحكوا سوا ومر اليوم ومنصور بيفكر هيعمل ايه … بعد مرور يومين كان منصور كلم أمجد بلغه بالطلاق ويعمل حسابه على كده . الجرس رن خرجت جميلة من الأوضه تفتح الباب ،كان في راجل من المحكمة اداها ظرف ومشي … خرج منصور وهو بيقول -في اي يا جميلة -معرفش يا بابا دا ظرف ال المحكمة فتحت الظروف وقالت -ايه!!! -في اي -أمجد طالبني في بيت الطاعة…. # -أمجد طالبني في بيت الطاعة منصور مسك الورقة، لبس نضارته، قرا أول سطرين وشه أحمر -بيت طاعة؟ هو فاكرها سايبة؟ هو لوي دراع ولا ايه! ليه شايف بنتي جاموسة هيسحبها بحبل؟ ده احنا قولنا طلاق بالمعروف! ردت جميلة والغضب مُسيطر عليها -أنا كنت عارفة، كنت عارفة انه مش هيسيبني في حالي! ده عايز يكسرني وخلاص عايز يرجعني غصب عشان يقول للناس انه راجل! رد منصور بغضب - راجل ايه ده اللي يجرجر مراته محاكم عشان ترجع بالعافية! ده لو راجل بجد كان قعد زي الرجالة وسمعنا عايزين ايه! فضلت رايحة جاية في الصالة زي المجنونة، بتشد في طرحتها - أنا مش هرجع! لو فيها موتي مش هرجعله أنا اتخنقت! كل يوم محكمة وكل يوم ورقة هو عايز مني ايه تاني؟ مش كفاية اللي عمله! -اهدي يا بنتي اهدي. القانون في صفك، بيت الطاعة ده كلام فاضي، هنروح للمحامي بتاعنا يبله ويشرب ميته،هطلقك يعني هيطلقك ثوانِ و تليفونها رن وكان أمجد ، بصت لأبوها بخوف، منصور شاورلها افتحي سبيكر اتكلم أمجد بصوت يملئه البرود -طبعا وصلكم الورقة.. - أنت عايز مني ايه يا أمجد؟ أنت اتجننت؟ بيت طاعة؟ - اتجننت لما سبتِ بيت جوزك ومشيتي والقانون بيقول مراتي ترجع البيت بقى، بالذوق بالعافية هترجعي شد منصور التلفون وقال - اسمع يا ابني، أنت بتكلم راجل بنتي مش هترجع بيت متهانة فيه، وجو الورق اللي بتلعب بيه ده مش هياكل معانا، لو ليك حق خده في المحكمة! ضحك أمجد بصوت عالٍ وقال - يا حاج منصور براحة على نفسك، أنا بعمل بالأصول أنا عايز مراتي في بيتي، وانتو اللي هتلفوا حوالين نفسكوا في الآخر وهترجع برضه صرخت جميلة بعلو صوتها - مش هرجع يا أمجد سامع مش هرجع وقفلت في وشه السكة ورمت التليفون على الكنبة وانهارت من العياط بعد أسبوع في مكتب المحامي جميلة قاعدة قدام المحامي، معاها أبوها ، وماسكة بطاقتها في إيديها وإيديهابتترعش بس واخدة قرار -بصي يا مدام جميلة، ق.ضية الخلع في مصر مضمونة ١٠٠٪؜، بس بشرط تتنازلي عن المؤخر والنفقة، موافقة؟ كان ذلك حديث المُحامي -موافقة أنا مش عايزة منه جنيه، أنا عايزة أخلص، أنا عايزة أشوف اسمي من غير اسمه بقى رد منصور وقال -واحنا قدها يا متر اللي تطلبه هنعمله، بس بنتي تخرج من الهم ده -تمام، أنا هرفع الق.ضية النهاردة، وجلستها هتتحدد بسرعة وسيبي موضوع الإنذار بتاع بيت الطاعة ده، أول ما نرفع خلع هو كده كده بيسقط طلعوا من المكتب، والمحامي أول حاجة عملها مسك تليفونه ورن على أمجد -أستاذ أمجد معايا؟ معاك الأستاذ أشرف المحامي، محامي مدام جميلة منصور رد أمجد بإستغراب -خير؟ -خير ان شاء الله أنا بس بكلمك كأخ قبل ما تبقى ق.ضية ومحاكم، جميلة رفعت عليك ق.ضية خلع النهاردة الصبح -خلع؟ هي فاكرة الخلع ده لعبة؟ -لا مش لعبة يا أستاذ أمجد، وانت راجل وفاهم القانون الخلع مفيهوش كلام، الست لو قالت أخاف ألا أقيم حدود الله القاضي بيحكم لها على طول، خصوصاً ان معاها إثباتات انك بتأذيها نفسياً ومعنوياً وشهود رد أمجد بقلق -إثباتات ايه؟ -يا أستاذ أمجد أنا بنصحك لله، بنسبة كبيرة جداً جميلة هتكسبها لأن معاها حق، وأنت عارف أنت عملت ايه فبدل ما نفضل 3 شهور في محاكم وتيجي هي تخلعك غصب عنك وسمعتها تبقى في كل حتة، تعال نخلصها ودي طلقها بالمعروف واحفظ ما بينكم -سكت شوية -يعني هي خلاص مقررة -مقررة ومش هترجع، ولو كملت في سكة بيت الطاعة أنت اللي هتخسر وقت وفلوس على الفاضي، الخلع هيبله فكر كده يومين ورد عليا أمجد قفل، ورزع التليفون في الحيطة، وفي نفس اللحظة جميلة كانت قاعدة في العربيه مع منصور لأول مرة من شهرين تتنفس -تفتكر هيسيبني يا بابا؟ -هيسيبك غصب عنه يا بنتي أنتِ دلوقتي مش جميلة اللي بتعيط، أنت جميلة اللي واقفة في المحكمة بتاخد حقها حتى لو كُنتِ خدتي قرار غلط المهم نعمل الصح بعد مرور أسبوع آخر في بيت أمجد كانت صباح قاعدة وأمجد رجع من السفر ، قالت بصوت عالي -يعني اي هتفضحنا وسط الخلق ولا اي ردت نسرين بصوت واطي وقالت -أحسن جدعه وبنت أبوها دا أنتم عيله وا*طيه رد أمجد -هبعتلها ورقتها على بيت أبوها مش صغير أنا علشان أقف في المحكمه ويترفع ق.ضيه خلع قالت صباح بعصبيه -كان ناقصها ايه يعني رد أمجد -بتشوف نفسها على النعمة -لا كده كتير فاكرين نفسهم في قصر الباشا ولا اي كانت نسرين تحدث نفسها بعيدًا عنهم -هطلقها بعد مرور ثلاث أيام دخل منصور أوضة جميلة وفي إيده ورق وهو بيقول -مبروك الحرية يا جميلة وقفت جميلة عن الفراش وهي بتقول -يعني اي يا بابا مد ايده بالورق وهو بيقول -مستناش المحكمة دا مش راجل أصلا، خاف وطلق ، حتى من غير ما يقول طب أقعد مع مراتي نتفاهم دا طبع جبان أوي يا جميلة مسكت جميلة الورق والدموع تنهمر بشدة من الفرح وهي تقول -الحمدلله.. الحمد لله بدأت تكرر الجُملة "أنتِ طالق … أنتِ طالق …أنتِ طالق…" بعد مرور خمس سنوات كانت جميلة قاعدة في حضن رامي وعلى رجليها ولد يدعى فريد كانت حضناه بحب وبعدين قالت -رامي ابتسم وقال -قولي يا جميلتي -…"اكتشفت إن مش عيب الواحد يغلط العيب إنه يستمر في الغلط …" تمت🤍.

مقالات ذات صلة

رواية روعة ج3

نهله 1

ندم 3

رواية رهيبة ج2

رواية روعة من 1-4

جوزي،رمالي فلوس

اترك تعليقاً إلغاء الرد