التحذير
_ مش عارفة أبني وافق بيكي و ملهوف عليكي على أي، دا أنتِ حتى سمرا
_ قصدك أي يا طنط، مالهم السُمر؟!
_ ما كان عنده بنت خاله البيضا أم عيون عسلي مش فاهمة متمسك بيكي لي
_ الشكل و اللون مش كل حاجة، الحب و القلب هو إللي بيتحكم فينا، وهو ماشفش غيري
_ لا هو اتعمى تقريبًا، مشافش حاجة خالص، رافعه منخيرك في السما و أنتِ ولا جسم ولا لون، دا الله يكون في عونه
حسيت بقلبي بيوجعني من كلامها، هو أنا مش هخلص من التنمر دا طول حياتي!
لي الناس بتبص من برا، مش بتشوف جمال القلب من جوا، رجعت البيت و أنا ساكته، وهو أخد باله
_مالك يا مريم ساكته لي؟!
_ مفيش عادي
_من ساعة ما كنا عند ماما و أنتِ ساكته حد زعلك في حاجة؟!
_ أنت بتحبني؟!
أبتسم و بص ليا بإستغراب
_اكيد بحبك
_ لي أكيد؟!
_ أي دا في أي؟ دا المود أسود و الغربان فوقنا، مالك يا مريم، قولي على طول مالك
_ مامتك قالتلي إني سمرا وهي مش عارفة اخدني على أي!
ضحك وهز راسه كأنه مش مصدق إللي قولته!
_كبيري دماغك يا مريم أنتِ عارفة إن بحبك
_ عارفة… بس كلامها وجعني
_لي؟ أنتِ شاكة في نفسك؟!
_ لو حد جه أتكلم بنفس الطريقة إللي مامتك اتكلمت معايا بيها، أكيد هتحس بزعل، خصوصًا إنها مامتك و شايفاني مش كفاية ليك
_ بس أنا شايف إنك كفاية ليا..
حسيت كلامه طمني شوية، أنا عارفة إنه بيحبني .. لكن في كلام زي السكا.كين بتقطع في القلب، المشكلة إن الناس أو الشخص إللي بيقولها مش مستوعب الضرر إللي بيحصل
عدت أيام و روحنا تجمع عائلي، كنت راحة غصب عني، قلقانة من أي كلمة هتتقال.. مش مستريحة و مقفولة، لكن نوح قال إن دا تجمع مهم .. ولازم نروح
_ ازيك يا مريم عاملة أي؟
_الحمدلله يا طنط
_ أنتِ مش بتستخدمي كريم تفتيح لي؟!
إللي كنت خايفة منه حصل، و كان وسط العيلة كلها، بس نوح المرة دي أتدخل
_ لي تستخدمه مهي زي القمر أهي
_ يعني يفتحها شوية يعني و تحلو
_ مين قال كدا دب مريم أجمل بنت في الدنيا
_ بس البياض حاجة تانية، شايف بنتك خالك بيضة وقمر إزاي ماشاء الله
حسيت بكمية إحراج كبيرة، لكن نوح مسك أيدي
_ ميهمنيش الأبيض ولا غيره، أنا مش شايف حد أحلى و أجمل من مريم
_خليك مدلعها كدا، محدش بيرفع فيها غيرك
