أدهم ج1

نهال بتردد : طيب ادهم هو بعد كدا انا هنزل لمامتك اساعدهم في شغل البيت ؟ ادهم بتذكار : المتوقع ان شغل البيت هيتقسم بينك وبين نوال يعني انتي يوم وهي يوم نهال بقلق : طيب وانا هعمل ايه في يومي؟ ادهم بستغراب : هتكنسي البيت وتنضفيه وتجهزي الغدا شغل البيت يا نهال اللي اي ست بتعمله في بيتها نهال بتوتر : طيب ادهم لو مامتك عرفت ان مبعرفش اطبخ هتعمل ايه ؟

ادهم مسك ايدها وباسها بكل رقه : مش عايزك تقلقي من حاجه الحياه بيسطه يا نهال متصعبهاش انتي مش داخله تحدي ولازم تقدمي احسن ما عندك قولتلك قبل كدا اغلطي مره واتنين وتلاته المره الرابعه هتتعلمي نهال بصتله وهي حسه براحه من كلامه وقالت بتردد : طيب هو مينفعش نتقسم ونفضل في شقتنا مننزلش تحت ؟

ادهم ضحك وقال بهدوء : اولا انتي لسه مش بتعرفي تطبخي وانا مش احسن حاجه في الطبخ هناكل ازاي بقا ثانيا انا جاي اجازه ٣ شهور فات منهم ٣ اسابيع وانا حابب اقضيهم مع اهلي ومراتي تكون معايا برضو مينفعش اقولهم انا عايز اتقسم ولا ايه نهال ادركت كلامه وعرفت ان معاه حق بس قالت بخوف : ادهم انت لما تسافر انا هعمل ايه ؟ ادهم اتنهد بصوت عالي وقال بصبر : هتقعدي في البيت هنا وهتروحي كليتك وهبعتلك مصاريفك لحد ما ارجع اجازه تاني يا نهال

نهال اتوترت وقالت : طيب هتعامل ازاي وانت مش موجود معايا ؟ ادهم : انا مش هبقي معاكي في البيت اه لكن هبقي معاكي في الفون وهكلمك علطول وهنسهر مع بعض عادي ” ومسك ايدها وقال بحنان ” نهال سواء انا موجود او مش موجود انا مش حابك انك تقلقي انا صابر معاكي لابعد حدود والله العظيم فَ ساعديني وحاولي تتقبلي كل حاجه بسرعه يا قمر نهال هزت راسها وقامت وقفت وقالت ببتسامه : طيب هقوم البس علشان ننزل نقعد معاهم شويه

ادهم بتحذير : تلبسي حاجه واسعه محترمه وطرحه علشان لو لقيت غير كدا هزعلك يا مزتي ” نهال ضحكت وراحت علي الاوضه تشوف هتلبس وبتدعي من قلبها ان تعرف تتعامل مع الكُل وتتعلم كل حاجه بسرعه ”