الماضي 3
خرجت بسرعه وندهتله وهو راح معاها بلهفه وخوف … دخل بسرعه كانت بتغيب عن الوعي والدم بينزل منها كتير وبطريقه مش طبيعيه … خبط على خدودها بقلق وخوف بس غابت عن الوعي … شالها بسرعه ونزل بيها وسلمى وراهم … راح على أقرب مستشفى ونقلوها على العمليات بسرعه وهو قلقان جدا … فضل رايح جاي وانتبه لسلمى اللي قاعده متوتره وسألها ” ايه اللي حصل ؟”
” معرفش … كنت قاعده معاها مره واحده لقينا دم نازل منها ”
” طب ايه السبب يعني ”
” معرفش … هيا اصلا رنت عليا عشان كانت متضايقه ”
” ليه ؟”
” مقالتش سبب معين … بس يمكن متضايقه لانك زعلان منها … انا عارفه أن هيا خبت عليك امبارح كانت فين … بس انا هقولك عشان امحي اي شك جواك ”
” انا مش بشك فيها اصلا … انا قلقت عليها وكنت عايز اعرف راحت فين وليه كدبت اصلا ”
” راحت مقاــ,,ـــــبر باباها ومامتها … هيا لما بتروح هناك بتروح لوحدها ومش بتحب تعرف حد … وطبعا هما مدفونين في اسكندريه فكان طبيعي تتأخر ”
” لو كانت قالتلي كنت هوديها بنفسي وهكون متطمن عليها … كنت برضو هسيبها لوحدها … بس هيا مقالتش ”
” هيا مش بتعرف حد اصلا … بتروح دايما لوحدها ”
” يارب بس تكون كويسه وانا مش هزعلها ابدا ”
بعد شويه خرج الدكتور وهما راحو ليه بسرعه
” طمني يا دكتور هيا كويسه ؟”
” قدرنا نوقف النزيف بس للاسف الرحم لازم ينضف لأن الحمل نزل ”
” يعني مبقتش حامل ؟”
” للاسف … اول ما الحاله تكون مستقره هنبدأ بتنظيف الرحم … بس هيا واخده حبوب اجهاض اصلا ”
اتصدم وقال ” مستحيل … اكيد لاء ”
ردت سلمى بسرعه وقالت ” لاء مخدتش … هيا بطنها كانت بتوجعها انهارده فأخدت برشام مسكن بس مخدتش اجهاض ”
” من غير استشارة طبيب ؟”
هزت راسها فالدكتور قال ” في حاجات مينفعش تتاخد في الحمل لأن تأثيرها بيكون مختلف في أيام الحمل بالذات … هيا الصبح هتكون كويسه إن شاء الله … ربنا يعوضك ”
سابهم ومشي وهو حس أنه مش قادر يقف … قعد على أقرب كرسي وهو مصدوم … قعدت جنبه وقالت ” إن شاء الله ربنا هيعوضك ”
” أنا كنت مستنيه بفارغ الصبر … أنا كنت بدأت اشتريله حاجات ”
” قضاء وقدر ربنا … اكيد ربنا شايلكوا خير قدام ”
اتنهد بحزن وقال ” المهم انها كويسه … هيا اغلى حاجه عندي ”
” ربنا يقومهالك بالسلامه ”
سكت شويه وقال ” وانتي روحي الوقت اتأخر ”
” تمام … همشي دلوقتي وهاجي الصبح ”
