رانيا 8

الحلقة الرابعة و الثلاثين

انهي المكالمة برد واحد : ماشي يا فندم
ثم التفت ينظر الي علاء ببالغ قلقه : ابن عمك عليه توصية كبيرة اوي ، ده غير انه ممسوك و الحاجة في بيته
علاء : يعني ايه ، يعني كريم حيدخل السجن
مروان : اهو بكرة حيتعرض علي النيابة ، بس لو عايز رأيي ابن عمك عايز معجزة عشان يطلع
علاء ببالغ قلقه : لا حول و لاقوة الا بالله ، طب انا حاقولهم ايه دلوقتي
مروان : عموما اصبر و اهو بكرة الصبح حيتعرض علي النيابة و ان شاء الله يكون في امل مع اني عارف انه ضعيف
صمت قليلا ثم سأل : المهم حنعمل اللي اتفقنا عليه
صمت علاء للحظة ثم سأل : هو انا لو مش تبقي قضية شرف
مروان بقلق : لا يا علاء ، احنا حنمسكهم متلبسين كفاية
صمت قليلا ثم نظر لعلاء : ارجوك يا علاء تتصرف بعقل ، ارجوك

….

خرج من الغرفة و خرجت شيرين خلفه ليستوقفه عمرو ببالغ قلقه : خير يا دكتور
نظر الطبيب باتجاه عمرو و رد : خير ان شاء الله يا دكتور عمرو انا لو اعرف انك هنا مكنتش جيت ، انتم بس خلوا بالكم منها و يا ريت بلاش زعل و عموما ، احنا حنحتاج اختبار حمل بردوا نتأكد
عمرو بقلق : هي حامل
ابتسم و رد : غالبا
عمرو بقلق : طيب يا دكتور

اتجهت شيرين الي غرفة علا و نظرت لسعاد و ريم ثم الي علا و التي لاتزال نائمة ، ترددت كثيرا و هي لا تعرف هل تبلغهم ام تصمت ، نظرت ريم لشيرين و سألت : هو الدكتور قال حاجة
شيرين بقلق : خير ، هو بيقول تعمل تحليل حمل
سعاد بقلق ممزوج بفرحة : حامل
شيرين بقلق : بيقول غالبا
سعاد و هي تبكي : يعني مش لو جوزها هنا و في حاجة زي دي كان فرح معانا ، يا حبيبي يا كريم ، يا حبيبي يا ابني
نظرت شيرين لها و الي بكائها و قامت اليها بكل تردد بداخلها ، تفكر للحظة ان توسيها و لا تعرف أتفعل ام انها لاتزال سعاد زوجة ابيها ، بعد لحظات من التردد وضعت شيرين رأس سعادعلي صدرها و قالت مواسية : ان شاء الله يا طنط سعاد الامور كلها حتتصلح ، ان شاء الله البيوت كلها حتتعدل
ثم نظرت لريم الباكية بصمت : انتي قولتي حاجة لماما مديحة
تنهدت بحزن و ردت : لا انا قلت كفاية عليها اللي حصل انهاردة ، بس هي كده او كده حتعرف
طرق عمرو الباب و نظر لهم و سأل : علا عاملة ايه دلوقتي
ردت شيرين : لسه نايمة ، الدكتور ادها حقنة مهدئة و قال تنام لحد ما تصحي لوحدها
وجه عمرو كلامه لسعاد : باقولك ايه يا مرات عمي ، حضري هدومك و هدوم علا و يلا بينا كلنا
ريم باستغراب : ايوة طب و علا
عمرو : متخافيش يا ريم ، احنا حنشيلها لحد العربية
شيرين : بس احنا كده حنضطر نحكي لماما مديحة
عمرو : كده او كده حتعرف ، المهم مينفعش يقعدوا هنا لوحدهم