فريدة 1

كانوا كلهم قاعدين ف الجنينه ف الشمس..و بيفطروا مع بعض…

محمد بفرح:كل سنه و انتوا طيبين ي ولاد..

الكل:و انت طيب ي حاج..

إسعاد فرحانه بلمه ولادها حواليها و بدعاء:يارب ما تقطعها عاده يارب…

كنزي بطفوله:نناه..عاوزه مايه..

إسعاد باست ايد كنزي اللي علي حجرها:عيون نناه..

دنيا:خلاص بقي ي كوكي متتعبيش تيتا معاكي..

إسعاد باست كنزي:بس ي بت انتي تعب ايه…

دنيا بضحك:هههه الحق عليا ي ماما..دلعك ده هيودينا ف داهيه..

إسعاد بفرحه:و ماله تدلع اومال لو متدلعتش مين يدلع يعني…

شريف:تعيشي و تدلعيها ي حاجه…

إسعاد:تسلملي يبني…

و بصت ليحي:كل يبني كويس و بطل التليفون اللي عمال تبص فيه ده…

يحي بصلها و ابتسم…

محمد:سبيه معادش عيل صغير ي ام يحي..

إسعاد:ف نظري انا صغير…كل يبني…و بقت تحطله اكل ف طبقه.

يحي بابتسامه:تسلميلي ي أمي..

كل ده بيحصل و فريده قاعده ساكته…

إسعاد لهجتها اتغيرت:مالها مراتك ساكته ليه..

يحي بص لفريده…

فريده بهدوء:ابدا ي طنت مركزه ف الاكل بس…

محمد:الف هنا يبنتي!

إسعاد:هي فين شمس..قالت دقيقه وجايه بقالها ساعه..

و بنداء:شمس..ي شمس..

شمس:انا اهو ي ماما…

إسعاد:تعالي افطري..و خطيبك فين…

شمس:نادر هيجي علي الغدا بأذن الله..

إسعاد:بأذن الله…يلا اقعدي..

محمد:بعد الفطار ندخل جوا الا الشمس بدأت تزيد اها..

………………………………………..

خلصوا فطار و كله دخل جوا الفيلا…و بدأت إسعاد تجهز ف الاكل…معهاش حد يساعدها..مش بتسمح اصلا لحد أنه يعمل حاجه….
شمس طلعت ليهم ف الصالون:ي بابا شوف حل مع ماما مينفعش تفضل واقفه ف المطبخ كتير كده..
محمد:و الله ي بنتي غلبت معاها..بس انتي عارفه امك بقي لما تنشف دماغها…
دنيا:انا هقوم اساعد ماما يلا ي شمس معايا..اهو نعمل اي حاجه…
و قاموا كلهم و فضلت فريده هي اللي قاعده مع يحي و محمد و شريف…
محمد:ابوك و امك فين يبني!!
شريف:جايين ف السكه ي حاج…
محمد:ابراهيم من يومه و مواعيده بايظه…
و قعدوا يضحكوا مع بعض….
……………………………………………
دنيا بصوت واطي:ي ماما بس ارجوكي كفايه مش عاوزين مشاكل…
إسعاد بعصبيه:مشاااكل..ده المشاكل لسه جايه أما تقوموا تساعدوني و هي قاعده حاطه رجل علي رجل زي البرنسيسه ليه علي أيدها نقش الحنه…
شمس:ي ماما منقدرش نطلب منها كده هي لو عاوزه كانت قامت لوحدها…
إسعاد علت صوتها:و تقوم غصب عنها…شغل المرقعه ده مش عندي…صحيح اه معنديش حد يساعدني لكن هي مرات ابني..
دنيا برجاء:ي ماما يرضيكي يحي يزعل و يمشي من دلوقتي..اهدي بس بالله عليكي مش عاوزين مشاكل..و خلاص الاكل خلص…
إسعاد بدأت تهدي:اما نشوف اخرتها معاكي ي بت مروه.
…………………………………………….
جه الحاج ابراهيم اخو الحاج محمد و مراته الحاجه زينب..و نادر خطيب شمس..و معاد الغدا جه….و زينب قامت ساعدت ف غرف الاكل…و فريده برضه لسه قاعده جمب يحي…و إسعاد ماسكه نفسها بالعافيه..عشان ابنها…
و الكل اتلم ع السفره و بدأوا يتغدوا..
و الاكل فريده مكانتش بتحبه و تقيل علي معدتها…ف مش عارفه تأكل…
يحي حاسس ب اللي بيحصل مع فريده بس مش عارف يعمل ايه..بيحاول يعدي الساعتين دول و خلاص…
إسعاد:ايه الاكل مش عاجب مراتك ي يحي..
دنيا بلمت لجوزها و بصت لابوها بسرعه تنبهه للي هيحصل..
فريده بصت ليحي…و بعدين لإسعاد:ابدا ي طنت بس انا مش بحب الاكل ده..و كمان تقيل علي معدتي…
إسعاد:و ماله ي حبيبتي كنتي قومي اعملي الاكل اللي انتي عاوزاه..
يحي:خلاص ي جماعه حصل خير..انا هطلب لها دليفري…
فريده:خلاص انا اكلت…
شمس بتحاول تخفف الجو:غلطتي دي ي ديدا معلش زودت ف السمنه بتاعه الرز…
فريده بابتسامه:و لا يهمك ي شمس..
إسعاد:و تطلب دليفري ليه..المطبخ عندها اهو و الاكل جوه تقوم تعمل اللي عاوزاه ده من الصبح قاعده…
الكل سكت و خلاص عرفوا أن فيه خناقه هتحصل…
و فريده فضلت ساكته مش عارفه ترد ب ايه..و بصت ليحي و بعدين لإسعاد:و علي ايه ي طنت…اروح اطبخ ف بيتي….
و قامت وقفت و الكل قام…
زينب:ي جماعه استهدوا بالله..
إسعاد:شايفين عمايلها..شايف عمايل مراتك ي يحي…
دنيا قامت مسكت ف فريده:فريده استني بس..
فريده:و الله ابدا..وسعي ي دنيا…
محمد بحده:اي اللي انتي هببتيه ده…
إسعاد بعصبيه و صوت عالي وصل لفريده ونيا بره:عملت اي ي حاج..انا برضه..و الا سكوت ابنك ليها واحد غيره كان اداها قلمين يفوقوها..لكن سكوته ده هيخليها تركب و تدلدل رجليها…
شمس أتصدمت و انحرجت جدا ادام خطيبها من اللي حصل بس نادر عارف ان لازم ده يحصل..و كل تجمع بينهم بينتهي ب ده…
محمد بعصبية: إسعاد زودتيها اووي…
ابراهيم:بس ي محمد خلاص و انت ي يحي ي ابني اطلع شوف مراتك…
خرج يحي و كانت فريده واقفه علي اخرها مع دنيا اللي بتحاول تدخلها…
و صوت إسعاد محمد علي هو كمان و اكنهم بيتخانقوا…
فريده:انا ف بيت بابا..
دنيا:لالا..بس بقي ي فريده كده انتي بتستهبلي ما تتكلم ي يحي..
يحي بصوت عالي:اتنيل اقول انا ايه دلوقتي..أطلقها يعني علشان امك ترتاح و الا اقاطع امك و امشي و هي ترتاح…انا اتخنقت اقسم بالله وسعوا…
و مشي يحي و الكل خرج من الفيلا علي صوته…و فريده هي كمان طلبت اوبر و راحت علي بيت أبوها…
.
الفصل الثاني:
إسعاد بعصبيه: عجبكم كده اهو البت خليته يمشي..
محمد بحده: البنت برده ولا انت روحي الهي منك لله ست ما بتحبش الا النكد..
………………………………..
دنيا بجديه:ي فريده رايحه فين بس…كفايه هو كمان مشي مش عارفين راح فين…
و بنداء:شررريف ي شررريف تعالي بالله عليك الحقه قبل ما يبعد..
و شريف طلع فعلا يلحقه…
فريده بجديه:دنيا سيبيني خليني اروح بيت اهلي..انا مش هيبقي و لا دقيقه هنا…
دنيا علت صوتها شويه:ما تستني نعرف هو فين…
فريده بعصبيه:يوووه..سيبيني بقي…هلاقيها منك و الا من والدتك…
و زقت ايد دنيا و خرجت من الفيلا ماشيه علي رجلها و مستنيه الاوبر يوصل..
……………………………………….
ابراهيم بجديه:ي جماعه اهدوا شويه بلاش كده.
إسعاد بعصبيه:لا يهدي ازاي..انا سيبهاله مخدره…يقعد فيها هو بقي…
و مشت علي اوضتها..
شمس بصوت عالي:يالهوي..ي ماما…
و طلعت اجري وراها و كذلك زينب…
و دخلت من بره دنيا….
دنيا:اومال فين ماما؟
ابراهيم:الحقيها يبنتي بتلم هدومها…
دنيا بجديه:و الله انا تعبت بقي كل ما نتجمع ده يحصل..
محمد بعصبيه:عشان امك ترتاح…
شريف دخل من بره:ملقيتهوش ي جماعه…و قافل تليفونه…
محمد:و مراته راحت فين..
دنيا:زعقت و مشيت..بتقول رايحه لبيت ابوها…
و سمعوا صوت إسعاد و هي بتزعق و شمس و زينب بيحاولوا يسكتوها….لحد ما نزلوا لعندهم..
إسعاد:اقعد فيها انت بقي ي محمد..انا سيبهالك و ماشيه…
محمد قام وقف و بحده:يلا و ورقتك هتجيلك…
نادر:ي عمي اهدي..اهدوا ي جماعه مش كده..متخلوش الشيطان يلعب بيكم اكتر…
إسعاد بعصبيه:انا رايحه عند اختي…
شريف بيحاول يهدي الدنيا:خلاص ي عمي انا هاخد حماتي و اوديها يومين اهو ترتاح شويه من اللي حصل عشان ضغطها…
محمد قعد مكانه: تروح!!ده راحه ليا انا..
…………………………………….
فريده راحت علي بيتها هي و يحي…و زي ما اتوقعت مكانش هناك…و طلعت علي أوضتهم..و بدأت تلم ف هدومها….و مسكت تليفونها..و اتصلت علي ابوها…و فتحت الاسبيكر عشان تتكلم و هي بتلم هدومها…
نصر:الو ايوا ي ديدا…
فريده:الو ي بابا..بقولك انا اقل من نص ساعه و هكون عندكم…
أنور سكت شويه و بعدين اتكلم:حصل حاجه؟!
فريده بملل:العادي…
أنور:طب خليكي عندك و انا هاجي اخدك..
فريده قفلت الشنطه:انا خلاص خلصت و العربيه مستنياني تحت مش هغيب.. باي..
و قفلت مع ابوها…و شالت الشنطه و نزلت…
……………………………………..
شمس هاتفياً:معلش ي نادر مش عارفه اقولك اي و الله..انا محرجه منك اوي..
نادر:بس يبت بطلي هبل..بس فعلا خناقه المرادي جامده اوي و خصوصا أن يحي مشي..صحيح عرفتها هو فين…
شمس بحزن:لا و شريف و بابا و عمي لسه بيدورا عليه..
نادر:الصراحه الله يكون في عونه..أمه و مراته..
شمس:مش عارفه ماما كويسه مع الكل و بتيجي مع فريده و تقلب…
نادر:عشان مامتك بتغير علي يحي..
شمس:يمكن ليه لا..و سكتت شويه و كملت:بس مش للدرجادي لو كان كده كانت جابته قعد معانا هنا ف البيت…
نادر:ما انتي بتقولي أنها طلبت ده فعلا قبل كده..و يحي رفض..
شمس:دي ماما و انا عارفاها لما بتعوز تعمل حاجه بتعملها…
و بحزن اتنهدت :يا تري انت فين ي يحي؟!!
………………………………………..
رن جرس الباب…
أنور:استني انتي ي مروه انا اللي هفتح…
و قام…و راح فتح الباب..و كانت فريده..دخلت سلمت عليه عادي و لا أكن فيه خناقه أو حاجه…
أنور:حبيبة بابا عامله ايه؟
فريده:الحمد لله ي بابا بخير.
و دخلوا لمكان مروه..
مروه بخضه:اي يبنتي هو انتي اتخانقتي تاني مع حماتك…
فريده قعدت جمبها:و يحي مشي و مش عارفين راح فين…
مروه بخضه:يالهوي حصل ايه لكل ده…
فريده اتاوبت:العادي ي ماما..ما انتي عارفاها مش بتطيقني..
مروه بجديه:ايوا مش بتطيقك اه لكن دي اول مره يحي يمشي..و ده الغريب..
فريده:كل حاجه هتبان بكره..
أنور:كلتي يبنتي..
فريده ضحكت بسخريه:اه الحمد لله اكلتني فته مليانه توم و سمنه و لحمه محمره ف السمنه!!تقريبا كانت عاوزه تمـ,ـوتني…
مروه:بعد الشر..خمس دقائق و تأكلي..عامله رقاق و كوسه بالبشاميل عارفه انك بتحبيها..
فريده:لا ي ماما بجد مليش نفس..
أنور:يلا ي مروه حضري الاكل..
و لفريده:بت انتي انا لسه راجع من بره و مامتك مكالتش برضه..ف هتقعدي تأكلي معانا.. ماشي؟
فريده ضحكت؛ماشي!
………………………………………..
دنيا بغيظ:يعني ي شريف ملقتش الا خالتي دولت اللي تقول عليها..
شريف بجديه: اعمل اي يعني ف اللي كنتي شايفاه..
دنيا بتطبق هدوم:كنت قول تيجي عندنا..لكن خالتي دولت هتشعلل الدنيا..ما انت عارف..
شريف بغيظ:و مقولتيش كده ليه ي اذكي اخواتك..
دنيا اتنهدت:انا كنت علي اخري اصلا بسبب اللي حصل و اللي فريده عملته…
و قامت تحط الهدوم ف الدولاب..
شريف:عملت ايه فريده!
دنيا مركزه ف ترتيب الهدوم:اتعصبنا علي بعض و زقتني و مشيت…
و راحت قعدت جمب شريف علي السرير:انا مش مضايقه منها اوي..كفايه اللي امي عملته..انا بس اللي صعبان عليا ف الليله دي كلها يحي..
شريف بجديه:ربنا يعينه.
الفصل الثالث:
دولت ضـ,ـربت علي صدرها: يالهوووي..بقي عملت كل ده و يحي ابنك مقالش حاجه..
إسعاد بقهر:لا و لا اي حاجه..و ف الآخر مشي و مش عارفين راح فين..
دولت:الا تكون سحراله..
إسعاد بغل:ما هي فعلا سحراله بت مروه..ده ولا الخاتم ف صباعها..
دولت بخبث:و لا تقلقي بعد الغدا اخدك و نروح لشيخ كويس اعرفه يخليه يبطل السحر اللي المنيله دي عملتهوله..
إسعاد بخبث:ده انت هخليه يسود عيشتها..و يصبحها بعلقه و يمسيها بعلقه..
دولت بتبخ سمها:متخافيش الشيخ مسعد هيعملك كل اللي انتي عاوزاه..ده ليه خدامه..اللهم احفظنا..
إسعاد بفرحه:حقه لو حصلت ي دولت يختي لأحلي بوءك..
…………………………………………….
شمس هاتفياً:لا ي نادر ملهوش أثر دوروا عليه ف كل مكان تبعنا..مش لاقينه..و بدأت تعيط..
نادر اتنهد بحزن:طب بالله عليكي بلاش عياط..و بعدين ما ممكن يكون سافر مكان تاني و الا نزل ف فندق..
شمس هدت شويه:احتمال فعلا…
نادر:متخافيش هو أول ما يهدي هيرجع..بس حاولوا بس تهدوا فريده عشان لما يرجع ميلاقيش مشاكل..
شمس:بابا و دنيا هيروحولها النهارده..عشان ترجع..
……………………………………………..
كانت فريده بتساعد مامتها ف المطبخ..و بتجهز السلطه…و مروه أمها جات و قعدت جمبها علي ترابيزه ف نص المطبخ..عشان تقطف الملوخيه..
مروه بابتسامه حزينه:معرفوش اي حاجه عن يحي..
فريده ببرود:معرفش و الله ي ماما..
مروه سابت عود الملوخيه بصدمه:يبنتي حرام عليكي ده جوزك..
فريده بصتلها:طب اعمل اي ي ماما ما انا مكلمتش حد منهم من ساعه اللي حصل..
مروه بجديه:اه ف تقومي مطنشه جوزك و متتصليش حتي تشوفي فتح تليفونه و الا لا..
و رجعت تكمل تقطيف:انا هكلم ابوكي يتصرف..
و سابت العود تاني من ايديها:انتي يبنت طالعه بارده لمين كده..
فريده بعدت السلطه اللي خلصتها و اخدت من اعواد الملوخيه تقطفها و بهدوء:مين قال اني بارده بس..كل الموضوع ان مفيش وسيله اقدر اعرف بيها ايه اللي حصل أو هو فين..
مروه بجديه:يعني ابوكي اللوا أنور نصر..و بتقولي مفيش حاجه تقدر توصلني ليه..
فريده:ما اتعودش اطلب حاجه من بابا..
مروه:ما تطلبيش ي حبيبتي بس انا هطلب.
فريده بجديه:ي ماما بل….
أنور قاطع كلامهم بدخوله للمطبخ:اي ي جماعه أتاخرتوا ليه كده ف الاكل..انا جعان..
فريده بابتسامه:نص ساعه و الاكل هيكون جاهز..
أنور: أما نشوف..
و جه يخرج بس وقف لانه افتكر حاجه:اه صحيح ي ديدا الحاج محمد و دنيا جايين النهارده بعد المغرب..
فريده:ليه!
مروه بحده:هو ايه اللي ليه؟
أنور ببرود:هنشوف لما يجوا..
مروه بجديه:يارب صبرني هتجنن منهم .
أنور ابتسم بخبث و خرج من المطبخ..
………………………………………………….
دنيا قاعده ع السفره مع جوزها و ادامهم الاكل..
دنيا بجديه:يلا ي كنزي خلصي اكلك عشان تروحي تقعدي مع خالتو شمس..
كنزي بفرحه: شموسه.
شريف: الصراحه شايف أن مرواحكم ملوش لازمه..
دنيا:اومال نعمل ايه ي شريف..نفضل سايبنها هناك كده..اهو حتي نحل اللي حصل..
شريف بجديه:مش هترجع ي دنيا..
كنزي:مامي عاوزه مايه..
دنيا بتحط لبنتها مايه:ليه بس حرام عليك..
شريف: مجرد توقع و كمان ابوها مش هيسمح بعد اللي حصل..
دنيا:ما بيحصل كل مره ي شريف..
شريف بهدوء:و لازم حل نهائي ل ده..
دنيا سابت المعلقه و بصتله:قصدك ايه!!!
شريف بجديه:اللي فهمتيه..
و قام:الحمد لله انا شبعت..و راح ع الحمام..و دنيا حطت أيدها علي خدها..بتفكر ف كلامه…
…………………………………………………….
كان يحي ف مرسي مطروح قاعد علي الكورنيش و الشمس ادامه بتغرب… بيفكر ف اللي كل اللي حصل من ساعه جوازهم..لحد اللحظه اللي هو قاعد فيها..بيراجع كل حدث..كل ذكري..سواء سعيده أو حزينه..و فضل كده سرحان ف تفكيره لحد ما فاق علي صوت موجه قويه وصله منها نقط مايه و الدنيا بقت ليل…
…………………………………………………………..
كانت شمس قاعده بتلعب مع كنزي…
كنزي:شموسه عاوزه تتجوزي عمو نادر ليه..
شمس استغربت سؤال كنزي بس قررت انها ترد عليها:عشان بحبه ي كوكي..و بعدين ايه مش نفسك لما تكبري تلبسي الفستان الابيض المنفوش…
شمس:عاوزه البس الفستان بس مش عاوزه اتجوز و مش عاوزاكي انتي كمان تتجوزي ي شموسه..
شمس باستغراب:ليه ي كوكي..
كنزي ببراءه: عشان طنت سحر مامت عمو نادر هتعاملك وحش زي ما تيتا بتعامل طنت فريده مرات خالو يحي..
شمس أتصدمت من اللي كنزي قالته..و بلعت ريقها…و مبقتش عارفه ترد عليها تقول ايه..
شمس بتحاول تغير الموضوع:تيجي معايا نعمل كيكه شوكولاته عشان لما يجوا نقعد نأكلها..
كنزي سقفت بفرحه:هيييه..يلا ي شموسه….
الفصل الرابع:
إسعاد هاتفياً بخضه:يعني ايه جايين؟!
دنيا اتنهدت:يعني بابا و انا هنيجي عشان ترجعي البيت ي ماما..
إسعاد بتوتر:لالا..ان..انا لسه ناري مبردتش من اللي حصل..
دنيا بجديه:ماما بالله عليكي بلاش كده بابا و الله حالف يمين طلاق..ابقي تعالي و كمان يومين خالتو تيجي عندنا..
إسعاد بنفاذ صبر:و مقولتيش ليه امبارح!
دنيا:بابا اصلا قرر ده بليل علي الساعه ١١..هعرفك امتي بقي و انتوا بتناموا بدري..
إسعاد بقله حيله:هتيجوا امتي؟!
دنيا:علي ١ ونص ٢ كده…
إسعاد:ماشي سلام…
و قفلت…و بصوت عالي:دولت..دولت….
دولت من بره:نعم ي إسعاد…
إسعاد قعدت و بقهر:تعالي الحقي الخيبه اللي اختك فيها…
دولت جات من بره بسرعه و قعدت جمب إسعاد علي السرير:فيه ايه خيبه ايه بس..
إسعاد:محمد و دنيا جايين النهارده علشان يرجعوني..لا و ايه الساعه ١ونص او ٢..و حالف يمين طلاق..
دولت بتفكير:طب خلاص..هكلم الشيخ مسعد يجيلنا بدري شويه…
……………………………………………………….
كان يحي ف الفندق بيجهز لنزوله القاهره..و هينزل ف باص مش بالعربيه بتاعته لانه سابها ف القاهره ف فيلا ابوه من ساعه اللي حصل…و باقي ساعه علي الباص…
……………………………………………………………..
قاعدين بيفطروا سوا…و خرجت أميره و هي لابسه و مستعجله..
دولت:ي بنتي تعالي كلي لقمه هتنزلي و انتي كده علي لحم بطنك..
أميره:معلش ي ماما..حصلت مشكله ف فرع الصيدليه ف المهندسين..يلا باي..
دولت بصوت عالي:ابقي طمنينا…
و لإسعاد:حياتها كده..كل شويه مشكله ف فرع المهندسين..
إسعاد بابتسامه: أميره يعتمد عليها ي أم أميره متخافيش عليها دي ب ١٠٠ راجل..
و اتنهدت:ي بخت اللي هيكون من نصيبها..
دولت بخبث:مش لو كان ابنك يختي مفسخش الخطوبه و كسر بقلب البت كان زمانك مرتاحه دلوقتي..
إسعاد:بت مروه سحراله ي دولت يختي..و انتي عارفه ده…و يجي بس الشيخ النهارده..هو اتاخر ليه كده..
دولت:و لا تقلقي نكون خلصنا فطار و نلاقيه ادامنا.
………………………………………………………………..
كان الشيخ مسعد قاعد علي الكنبه ف النص بين إسعاد و دولت و التانين مش سايبينه..
إسعاد بغل:سحراله ي شيخنا..و تعمل كل بلوه و التانيه و ميقولهاش بم حتي..راجل ف مكانه يرزعها قلمين و يطلقها بعد اللي عملته..لكن بيفضل ساكت..
دولت بنفس الطريقه:و بتعامله بطريقه وحشه اوي ي شيخنا..ممكن تكسفه و احنا قاعدين أو تتجاهله و ميعملهاش اي حاجه..
إسعاد اتكلمت:ده غير أنها كل شويه تدب معاه خناقه أو تسيب البيت من غير سبب..و تروح تقعد عند ابوها…ده خلته ي شيخنا يسيب بنت خالته اللي زي الورد دكتوره كبيره و ليها اسمها…
دولت بفخر:بنتي أميره ست البنات..
إسعاد:ده غير أن المخفيه فريده دي متجوزه ابني من ٣ سنين و غابت سنه ف حملها و اول ما حملت سقطت تحمل تسقط تحمل تسقط..أصلها يخويا بتلبس كعب عالي اد كدهو ده غير أنها مهندسه و سقالات و الشغل بتاعهم ده و طلوع و نزول ف ضهرها خفيف مش شايل حته اللحمه ف بتسقط و سقطت ٣ مرات..