نرمين من 23-37

رحمه : استنوا خدوني معاكم سميره مسكت اختها ح.ضنتها فرح: انا السبب انا انانيه فكرت في نفسي علي طول كنت بفكر فيها بس المره دي قولت لا سميره: وحدي الله انت مالكيش ذنب تهاني: لا حول ولا قوه الا بالله العلي العظيم نانسي: خدي اشربي اللمون دا يهديكي هي اكيد عملت كده علشان زعلانه لأن المعلم كان قاسي حبتين في الكلام وكمان طلق امها قدامها احمد: استغفر الله العظيم هو دا اللي كنت خايف منه وانت وابنك مش بتسمعوا الكلام

حسنين: دة نصيب يا بني ماحدش بيهرب من نصيبه بنتنا مكتوبه لإبنك بارادتك او من غيرها ربنا كاتبها له إن في الساعه دي هيحصل كده سماح ليها ربنا لو مكتوب ليها تعيش هتعيش مش مكتوب دة قدرها تعددت الأسباب والمو.ت واحد فكريه: ماتقولش الكلام دا انت اصلك ماتعرفش البت و امها حسنين: لمي الدور يا فكريه وادعي البنت تقوم بالسلامه فكريه: خليني اقوم اشوف الولا كريم مش بينطق ليه وساكت طلعت له فكريه كان قاعد على الارض وبيعيط

فكريه: يا حبيبي يا ضنايا اهدا كده ربنا معاها كريم: انا مش راجل ماعرفتش انقذها ولا اشيلها ولا اروح معاهم فكريه: ماتقولش كده ماهو حسنين وحمى اختك معملوش حاجه يبقي مش رجاله الرجوله مش كده وانت راجل من ضهر راجل الصدمه كانت شديده عليك علشان انت اول واحد شوفتها كريم: هي ممكن تمو.ت؟؟ فكريه: بعد الشر تف من بؤك ان شاء الله تبقي كويسه كريم: كله منها انا بكرها سابتها قافله علي نفسها وقعدت تندب علشان طلقها

انا بكرها اوي يا عمتي صحابي بيعايروني بيها بيقولولي يابن الرقاصه امك مالهاش فصل ولا اصل فكريه: امك مالهاش ذنب إنها ماتعرفش أهلها ولو رقاصه كان غصب عنها وبعدين دول هما كام شهر وبعدين دي حافظت علي نفسها وابوك اتجوزها حتي لو انا مش بطيقها بس الحق يتقال ماحدش يقول حاجه في أخلاقها دي هي مش بتعتب باب العماره الا و المعلم معاها هي بس سماويه شويه وقلبها كده اسود ومش بتحب الخير لغيرها كده يعني فيها كل العبر بس شريفه يا ولا وبعدين انت بتجرجرني في الكلام وانا مي.ته في دبا.ديب امك
كريم ضحك فكريه: اضحك يا ولا الدنيا لسه بخير قوم انزل معايا تحت انا مش هسيبك هنا لوحدك وبعدين عيب نسيب الضيوف تحت في المستشفى الكل بيجري ودخلوها العمليات بسرعه نوال: حسبي الله ونعم الوكيل فيكم ضيعتوا بنتي المعلم: إنت لسه ليكي عين تتكلمي كنتي فين لما بنتك عملت كده؟ علي: مش وقته الكلام دا رحمه: يارب ارحمنا برحمتك بعد ساعه وهي في العمليات طلع الدكتور الدكتور: محتاجين نقل دم بسرعه علي: أنا أخوها و فصيلتنا واحده
نوال فضلت تبص عليه واستغربت تصرفه نوال لسه مش مستوعبه إنه اخوها لأنها طول عمرها شايفاه عدو ليها نوال عايشه في دور الضحيه وان الكل بيكرها والكل عايز ينتقم منها علي اتبرع لها بدمه وبعد وقت طلعت سماح من العمليات وطلع الدكتور الدكتور: الحمدلله البنت بقت كويسه وهي في الافاقه و بعدين ننقلها للاوضة بس لازم أبلغ البوليس لانها محاوله انتحار مراد: ممكن يا دكتور عايزك في كلمتين وغمز لعلي انه هيتصرف نوال: الحمدلله يارب
مبسوطه يا رحمه المعلم طلقني وبنتي كانت هتمو.ت وابني خدتيه في ح.ضنك دا حتي مجاش يطمن علي اخته رحمه: لا حول ولاقوة الابالله العلي العظيم ربنا يهدي لك نفسك يا نوال بعد يوم طويل كل واحد رجع بيته الا نوال فضلت مع سماح علي اخد دوش ورجع يتصل بزهره و تليفونها مقفول و مش عارف يعمل إيه اتصلت بيه هايدي وبلغته ان معاد الطياره اتغير ولازم يسافروا الصبح مش بليل زي ما قالت له علي زعل لانه مش هيلحق يشوف زهره ولا يروح عندها في شغلها
أما احمد ابو مراد كان نايم علي السرير وحزين تهاني: مالك بتتقلب ليه ومش عارف تنام ؟ احمد: صدقيني يا تهاني انا حبيت فرح بس في نفس الوقت قلبي مقبوض ومش مطمن العيله دي كلها مشاكل ليه ندخل نفسينا في حوارات مالهاش اول من آخر كل حاجه كانت غريبه الواضح انهم ماكانوش يعرفوا ان المعلم جاي لكتب الكتاب ودا كان باين من تصرفاتهم وكمان الكلام اللي بيتقال في الحاره إبنك طلعت عليه سمعه وحشه انه كان بيشاغل الصغيره وبعدين اتجوز اختها الكبيره
والبنت اللي انتحرت ذنبها في رقبتنا كلنا شكلها بتحب إبنك جدا وليه فرح تبقي عارفه ان اختها بتحب مراد وتوافق تتجوزه دي انانيه منها ازاي هتعيش كويس وهي عارفه ان في وحده بتتعذب بسببها وكمان حاولت تنتحر وذنب امها إيه تطلق ولا كلام المعلم علي الطبقيه وان البنت اللي اختارها علي مش مناسبه ما احنا كمان بنتهم مش مناسبه لينا ليه إبنك يتجوز واحده من الحاره الناس تقول علينا ايه اهلك وأهلي ولما يعمل الفرح حيكون في الشارع زي النهاردة..؟
لا يا تهاني احنا غلطنا جدا تهاني كانت بتسمعه و هي عارفه ان جوزها علي حق تهاني: كلامك صح بس اللي حصل حصل وانت شوفت إبنك هيتجنن عليها نام يا خويا الصباح رباح واللي فيه الخير يقدمه ربنا ************************** زهره فضلت تدور علي موبايلها كثير لحد ما زهقت وطلعت السطح تشم هواء وبتفكر ازاي كان كتب اخت علي ومعزمهاش ولا قال لها حاجه هتعمل ايه في الموبايل وهي مش معاها فلوس تجيب واحد تاني هتكلم علي ازاي
أما محمد وفاطمه قاعدين يخططوا ازاي يقنعوا زهره بالجواز بس فاطمه ضميرها انبها وحاولت تضغط علي محمد انه يوافق علي علي ويخليه هو يواجهه كل المشاكل بس محمد كان اناني في تفكيره كل اللي همه ان امره ما يتفضحش بعد كل السنين دي أبطالنا كل واحد فيهم محتار في مشكلته حتي المعلم قاعد يفكر في موضوع جواز علي من زهره أما نانسي كانت بتفكر ازاي تأمن نفسها تسمع كلام امها وتحمل ولا تطلع من الجوازه دي خفيفه وتأمن مستقبلها و مستقبل عيالها
رحمه كانت في دوامه كبيره حزنها علي سفر علي و على فرحه بنتها اللي اتكسرت لتاني مره ولا علي سماح اللي راقده في المستشفى وخايفه تاخد ذنبها و فعلا هي بتحب مراد ازاي فكرت تنتحر اكيد متعلقه بمراد ومجنونه بيه ولا نوال اللي طلقها المعلم اكيد عملت مصيبه علشان يطلقها طارق كان في مكتبه في الشقه بيراجع اوراق قضيه وافتكر مسك لما كانت بتزعل لما تشوفه سهران علي قضيه وتيجي تقعد قدامه لحد مايخلص سأل نفسه ليه مش قادر ينساها و مش قادر يقرب من اي ست تانيه هو راجل وليه متطلباته ليه نسي نفسه ونسي رغباته
هيفضل عايش علي ذكراها لحد أمتي وعد نفسه انه لازم يزور طبيب نفسي علشان يعالجه او يساعده انه يتخطى الازمه دى هايدي بقي كانت قلقانه وخايفه من السفريه دي وخايفه ان خطتها تفشل هي عايزه علي واتعودت لما تعوز حاجه بتوصل لها ابوها بقي كان في مكتبه ومشغول في اتصالاته شكله عنده قضيه كبيره في دبي علشان كده بعت هايدي وعلي خاصة علي اللي الناس طالبينه بالاسم يا ترى علي هيعرف يقوم بالمهمه دي وهيعمل إيه مع بنته هو مش مفهمها كل حاجه
وكمان خايف عليها من الخطر الفصل 25 هايدي و علي وصلوا دبي وراحوا علي فندق 5 نجوم علي كان مستغرب من كل اللي بيشوفه ودي كانت اول مره يسافر بره مصر وعرف من الي شافه ان صاحب القضيه رجل أعمال كبير و مهم هايدي قالتله يقعد في الاستقبال على ما هي تخلص الإجراءات علي طلع تليفونه حاول يتصل بزهره لسه تليفونها مقفول اتصل بامه يطمن على سماح و فرح جت هايدي هايدي: يلا بينا الحمدلله الجناح بتاعك جنب الجناح بتاعي
وعلى فكره هو صاحب الفندق ده علي: لو سمحتي يا هايدي ممكن افهم ليه انا؟؟ صاحب القضيه مصري ولا خليجي ولا إيه الحكايه؟؟ هايدي: اهدا يا علي مالك قلقان كده ليه نطلع نرتاح و بليل على العشاء هتفهم كل حاجه علي: ماشي ودخل الجناح بتاعه وانبهر بشكل الجناح وكميه الثراء اللي هو شايفه الجناح مجهز على اعلي طراز كانه جناح ملكي أما هايدي دخلت الجناح واخدت تليفونها اللي كان بيرن هايدي: ألو ايوه وصلنا المجهول: كويس كله تمام معاكي؟
هايدي: لحد دلوقتي اه بس هو بيسأل كثير وعايز يعرف كل التفاصيل انت وعدتني ان مافيش حاجه هتأذيه؟ المجهول: لا متخافيش كله تمام احنا مجهزين كل حاجه علي العشاء بقولك في اخبار وصلتني انه خطب حبيبته هايدي : نعم !!! المجهول: ايوه يوم كتب كتاب اخته على مراد هو راح خطبها هايدي: بس أنا ماشفتش في ايده دبله؟ المجهول: هو طلب ايديها بس لسه معملوش حفلة الخطوبه هايدي: اوك طيب ايه المطلوب مني؟ المجهول : ولا حاجه احنا عايزينه يمسك القضيه وبس
هايدي: بس اشمعني علي ؟؟ على فكره هو محامي عادي وانا شايفه انه اصلا مش هيقبل يدافع عن مجرم علي بيحترم مهنته المجهول: آه علشان كده بيشتغل مع ابوكي ما هو كمان بيحترم مهنته هههههه وفضل يضحك كثير هايدي: بابا كان راجل بيحترم مهنته لحد ما انت دخلت حياته الله أعلم ماسكين عليه ايه علشان يقبل بقضاياكم ومن اخر قضيه بابا مابقاش بيترافع في المحكمه بيخلي كل المرافعات للمحاميبن اللي معاه المجهول: مش وقت الكلام دا اسيبك ترتاحي
قفلت معاه وهي سرحانه وخايفه من اللي جاي ************************** في بيت جمالات لما صحيت وعرفت إن ابنها دخل المصحه زعلت جدا عواطف: ياما انت بتعيطي ليه المفروض دا يحصل من زمان جملات: انا سمعتكم امبارح بتتكلموا علي الورث اكيد عايزين تخلصوا منه علشان تورثوا كل حاجه وتدوها لجوازكم دا بعدكم فاطمه: ليه يا ما نيتك وحشه احنا والله مفكرناش في كده خالص هو ليه انتي شايفه ان الموضوع سهل كده انتي عارفه لولا دخلنا في اخر لحظه كان هيحصل فيكي ايه؟؟
استغفر الله ياما افهمي بقي ان دا في مصلحته و مهما كان ده اخونا و لو اتكلمنا علي الورث فدا حقنا انت بتدينا ملاليم وكمان مش متابعه الشغل سايباه كله لعليوه الله أعلم هو بيعمل ايه ليه ما ترجعيش الشغل زي زمان شوفي حالك و رزقك واحنا هنفضل بناتك وتحت طوعك و اجوزانا مش طماعين الحمدلله ومستورين جمالات : ودوني عند ابني عواطف: ياما هما مانعين عنه الزياره و جوزي بيروح له واخد له كل اللي محتاجه
جمالات: آه يا فضيحتك يا جمالات وسط الجيران ولا اجوازكم هيقولوا ايه ؟ كله منها ربنا ياخدها لو كانت سايرته مكانش وصل اللي هو فيه اه ياني عايزه امو.تها وقامت تجري راحت الاوضه اللي كانت نايمه فيها وداد ومسكتها من شعرها جمالات: انت فضحتي ابني ربنا يفضحك انا جوزته علشان يتهني من ساعه ما شوفنا وشك واحنا في المشاكل قومي يابت مابقتش طايقاكي هنا غوري من وشي الساعه دي ادخلت عواطف علشان تبعدها عنها عواطف: ياما ابعدي عنها هي معملتش حاجه
وداد بعد ما فاض بيها اتكلمت بصوت عالي وهي بتعيط وداد : كفايه لحد كده افترا انتي ما بتخافيش ربنا كفايه ضحكتي عليا وجوزتيني إبنك المجنون إعتدي عليا وسكت ورجعت وانت عاملتيني زي الشغاله عندك من غير رحمه ولا شفقه وجايه تلوميني اساير إبنك ازاي ؟ اعمل حاجه حرام علشان يرتاح دا غير اني تعبانه وممنوع يلمسني انا عامله عمليه ولا انا مش مهمه عندك انا بهيمه اشتريتها لابنك منك الله وحسبي الله ونعم الوكيل فيكي
جمالات : بتتحسبني عليا يابنت الشغاله وداد: لما انا بنت الشغاله جوزتيني إبنك ليه علشان تداري علي جنانه ومرضه فاطمه: إنت ازاي تكلمي امي كده؟؟ وداد : وانت عاجبك انها تض.ربني مش كفايه اللي عمله اخوكي فيا و بهدلني جمالات دفعت عواطف ومسكت وداد من شعرها ض.ربتها طلعت كل الغل اللي كان جواها فاطمه و عواطف حاولوا يبعدوها عنها وداد زقت جمالات بكل قوتها وهربت من البيت بجلابيه البيت وحافيه كل اللي يهمها ازاي تطلع من الجحيم ده
وهي بتجري علي السلم كل الجيران كانوا بيبصوا عليها وصعبانه عليهم وداد فضلت تجري في الحاره لحد ماوصلت بيتهم وابتدت تخبط اوى اول ما فتحت لها فاطمه الباب اغمي عليها فاطمه: فيكي إيه يابت الحقوني طلعت زهره شافت اختها واقعه علي الباب جريت عليها بتحاول تفوقها وشافت شكلها مضروب ولابسه عبايه متقطعه وحافيه شالوها بشويش واخدوها الأوضة وفضلت معاها لحد ما فاقت عم محمد رجع البيت لما سمع الناس بتتكلم ودخلوا عنده المحل وهو شغال يقولوا له انهم شافوا بنته وداد بتجري في الشارع
عم محمد: في ايه؟ فاطمه: مش عارفه والله يادوب فتحت الباب وقعت بعد نص ساعه وداد فاقت وبقت مستوعبه إنها في بيتهم وابتدت تعيط زهره: اهدي بقي واحكي لينا لازم نفهم اللي حصل هو اعتدي عليكي تاني ؟ عم محمد : زهره بلاش تلعبي في دماغ اختك انت اللي خليتيها تهرب في ست محترمه تهرب في الشارع كده انت شايفه نفسك و هدومك المتقطعه الناس هتقول ايه علينا مش كفايه فضحيتك زهره: إنت بتقول ايه فضيحه ايه دي هو دا اللي ربنا قدرك عليه؟ هو في ايه ؟ انت مش شايف بنتك متبهدله ازاي ؟ كل اللي يهمك كلام الناس
فاطمه: اسكتي انت احنا في حاره كل الناس بتعرف اللي بيحصل زهره: لا انتوا من امبارح وانتوا مش طبيعين كل اللي يهمكم الناس هوا فين الناس دي واحنا مش لاقيين ناكل ؟ هما فين الناس لما صاحب الشقه بيطردنا هما فين الناس واختي متبهدله وماحدش اخد حقها يا خساره يابابا ضيعت حقها هتقول لربنا ايه؟ . فاطمه مسكتها من شعرها فاطمه: إنتي قليله الربايه وانتي الي هتجيبي اجل ابوكي علي ايديكي انت طلعتي قويه لمين انا و ابوكي طول عمرنا ماشين جنب الحيط اللي احنا فيه ده كله بسببك
زهره : اوعي كده بتتشطري عليا انا ماتروحي لحماة بنتك امسكيها من شعرها واعملي فيها كده لا بتبقوا ساكتين وحطين راسكم في الأرض علشان هما معاهم فلوس وأنتم لا عم محمد كان بيسمع زهره و هو ساكت فاطمه: اسكتي بقي و كفايه كلام ابوكي مش مستحمل
زهره: لا مش هسكت لان أبويا هو السبب في اللي احنا فيه طول عمره موطي راسه للي يسوي و اللي مايسواش ربنا مخلقناش فقراء بس ابويا عاش الدور راجل غلبان و مسكين محاولش يسعي و يوسع رزقه زي كل الناس من ساعة ما جينا هنا هربانين اوعوا تفتكروا إني كنت عيله ومش فاهمه فاكره لما دخل علينا في عز البرد صحانا وخلانا نهرب من البلد وانت كنت لسه والده وداد من كام يوم هربنا وجينا هنا قعدنا في أوضه فوق السطوح
كل ما اسألكم احنا ماعندناش اهل تقولوا لا أهلنا ماتوا وكنت بغير لما اشوف بنات الحاره عندهم اعمامهم و أهلهم واحنا لا فاكره لما ولدتي اخويا الصغير لوحدك علشان مكانش معاه فلوس يديها للدايه ولا يوديكي المستشفي لحد ما مات في بطنك كل اللي أبويا عمله طلع قعد على الكرسي يعيط محاولش يعمل المستحيل ياخدك المستشفي طول عمرك سلبي و بتوطي راسك اهي النتيجه بنتكم جايه متبهدله ولا هتعملوا حاجه مش بعيد تمسكوا ايديها وترجعوها للوليه القرشانه و تبوسوا راسها
انا تعبت منكم ومن سلبيتكم عيشتنا في فقر مالناش ذنب فيه انا مش مسامحاك علي بهدلتنا خلتني اسيب دراستي وانزل اشتغل فاطمه: اسكتي كفايه حرام عليكي وداد: خليها تتكلم عندها حق.. تعرفي امه عملت فيا كده ليه علشان عارفه ان ماليش ضهر اتسند عليه ومافيش راجل يحميني من ساعة مارجعت وهي مبهدلاني وانا تعبانه خلتني اروق الشقه الف مره جوزتوني لواحد مجنون هربان من السرايا الصفرا حاول يعتدي عليا و لما جت امه تبعدني عنه مسك امه عارفين كان عايز يعمل إيه كان عايز يغتصبها قدام الكل مكانش شايف قدامه مين دي دا وحش ومريض
زهره: يا نهار اسود امه!!!!!! وداد: ايوه امه ودلوقتي هو في المصحه بيقولوا حالته خطيره وامه اول ما صحيت قالتلي انا السبب في اللي حصل لابنها وانا اللي فضحته وفضلت تضر.ب فيا ماحستش بنفسي غير وانا بهرب منها ومن الجحيم اللي كنت فيه ايه هترجعوني ليها ابقي شغاله تحت رجليها هي و بناتها ؟؟ فاطمه: غلطانه مكانش ينفع تسيبي شقتك خالص ولا تطلعي كده الناس هتاكل وشنا زهره: هو انت ام بجد ؟؟؟؟ لا بجد احنا بناتكم و لا لاقيينا في الشارع؟؟
عم محمد : اخرسي شكلي دلعتك ومعرفتش اربيكي ولعلمك بكره كتب كتابك جالك عريس وانا وافقت عليه زهره: وافقت عليه علي اساس انت اللي هتتجوزه ولا انا طبعا مش موافقه فاطمه: هتطلعي من طوعنا يا زهره واسجني ابوكي وخلينا ننام في الشارع نشحت احنا سنين ضحينا بكل حاجه علشانكم ابوكم تعبان وشغال حمال علشان يصرف علينا وانا شغاله في البيوت ضحي إنت مره وحده في حياتك والعريس معاه فلوس هيعيشك اميره زهره: الله الله انتوا طابخينها سوا وعايزيني أوافق
لا أنا مش لعبه في ايديكم ومش هتجوز غير اللي علي مزاجي عم محمد : و مين اللي علي مزاجك يا زهره؟ زهرة: علي ابن المعلم سعد وطلب مني اخد معاد علشان يجي يتقدم ليا رسمي وعايز يكتب الكتاب واطمنوا مش عايز منكم اي حاجه هو شقته جاهزه وكمان الحاجه رحمه موافقه عم محمد: علي هو انت ما تعرفيش انه سافر دبي ؟ زهره: سافر ازاي؟ عم محمد : و الله اللي سمعته انه اتجوز بنت المدير بتاعه وسافر يقضي شهر العسل
زهره: اكيد لأ فاطمه: هو دا اللي حصل امبارح كان كتب كتابه هو و صاحبه علي اخته وبعدها سافر زهره فضلت مصدومه و تبصلهم فاطمه: نسيت اديكي موبايليك طلعته من جيب العبايه اول مازهرة مسكته زهره فتحت الواتس اب لاقت رساله من علي كاتب فيها اسف يا زهره انا اتجوزت هايدي بنت المدير بتاعي واحنا في دبي بنقضي شهر العسل وفي صورته وهو في الطياره و هايدي نايمه علي صد.ره و.ح.ضناه زهره حست ان الدنيا بتلف بيها مابقتش حاسه بحاجه
غير جملة علي ليها عمري ما حسيبك يا زهره قلبي ************************* مش قادره اقول حاجه الفصل 26 سماح بقت كويسة والدكتور كتب لها علي خروج من المستشفى نوال فكرت ان المعلم هايجي ياخدها لاقت كريم دخل الأوضه نوال: فين ابوك؟ كريم : مش فاضي عنده شغل نوال: اه ما احنا آخر تفكيره كريم : ماينفعش الكلام ده قدامها نوال: خليها تسمع وتعرف قيمتها عند ابوها كريم بعصبيه كريم : إنت ايه ؟ ليه كده ؟ حرام عليكي انتي عارفه الدكتور قال نبعدها عن أي ضغط عصبي
نوال: قول لابوك الكلام ده مش ليا انا خلصت يلا قومي خلينا نروح انا جتتي نحست من النومه علي الكرسي وفي الآخر تقولوا عليا إني مش ام ساعد اختك تقوم ولا انت شاطر تساعد بس فرح الا صحيح مالها ما جاتش تشوف اختك ولا هي لسه عروسه ممنوع تزور حد في المستشفى سماح: كفايه بقي ارحميني من الصبح وانتي مش سايبه حد في حاله مافيش حاجه بتعجبك لازم تتكلمي علي كل حاجه انا اتخنقت منك ومن اسلوبك وانتي السبب اني عايزه امو.ت
نوال: بقي كده هو دة اللي استاهله منك من ساعة ما اتنيلتي انتحرتي وانا قاعده معاكي تقوليلي كده؟ سماح : انت مش قاعده معايا علشان سواد عيوني ولا خايفه عليا انتي هنا علشان الكل يقول انك ام كويسه ويمكن المعلم بتاعك يرجعك لذمته يلا بينا يا كريم انا تعبت كريم مكانش عاجبه اسلوب امه في الكلام ولا الحاله اللي وصلت ليها اخته اخدوا اوبر وراحوا علي الحاره نزلت سماح وهي مش عايزه تشوف حد طلعت علي طول شقتهم فتح لها كريم الباب وقفت مش عارفه تروح فين
كريم: تعالي ارتاحي في اوضتي أما نوال راحت علي اوضتها وهي متنرفزه ان المعلم معبرهاش ولا سأل فيها رحمه و فكريه طلعوا عندهم و رحمه خبطت علي الباب فتحت لهم الشغاله الشغاله: اهلا وسهلا ياست رحمه يا خطوه عزيزه اتفضلي رحمه: يزيد فضلك نوال فين ؟ الشغاله : من ساعة ما رجعت دخلت اوضتها بتستحمي كريم سمع صوتهم و طلع لهم بره كريم : إزيك يا أمي عامله ايه؟ رحمه: الحمدلله حمدالله علي سلامه اختك
كريم : الله يسلمك إزيك يا عمتو فكريه: الحمدالله يابني اختك فين؟
كريم: نايمه في اوضتي خافت تدخل اوضتها وتفتكر اللي حصل رحمه: طيب شكلنا جينا في وقت مش مناسب خلينا ننزل ونبقي نيجي في وقت تاني فكريه : يلا بينا على مشوارنا رحمه: ابقي قول لامك اننا جينا فتحت الباب نوال وهي لابسه عبايه بيتي ولفه شعرها بفوطه نوال: انا جيت اهه مشوار ايه اللي انتم رايحينه ده؟ فكريه : يا ساتر يارب انت ودانك ايه سمعتينا ازاي؟ نوال: حكمه ربنا بقي بيفضحكم قدامي رحمه: فضيحة ايه يا نوال استهدي بالله