جيلان 1
ـ بس أنت قُلت ….
قاطعتها ـ وانا عند نفس الكلام اللي قُلته يا سكر وبعدين ده مش غلط ولا حرام أنك تبقي معايا في نفس الاوضه ف ياريت نستحمل بعض الحبه اللي هنقعدهم مع بعض
اتنهد بضيق وسكت لقيته قعد تاني واتكلم ـ جهزي نفسك علشان هننزل نجيب شويه حجات ليكي
بصتله بفرحة ـ هنعمل شوبينج
ابتسم ـ اه يا ستي هنعمل شوبينج يلا اجهزي انا اخدت الفستان والطرحه دول من اختي البسيهم
ـ بس انا مش محجبه
ـ اللهم طولك يا روح
لقيته قام مره تانيه وقرب مال عليا واتكلم ـ أنتِ كنتي مش محجبه قبل ما تكوني حرم تيّم الجارحي لكن دلوقتي أنتِ بقيتي حرمي وانا مش راجل يعني لمؤاخذه بقرون علشان اعرض جمال مراتي للخلق
كنت هتكلم بس لقيته وقفني ـ هتقولي الجواز ده مش حقيقي
قلدني وانا بتكلم وكمل ـ بس حتى لو لفترة مؤقتة أنتِ مراتي ف ياريت منتعبش بعض بقى وروحي اجهزي
بعد عني ورجع قعد وفتح الاب واشتغل عليه من تاني بصيت بعيد عنه ـ مستفز وبارد
بعدها ابتسمت ـ بس جنتل أوي وقمر
خبط على جبهتي بخفه وقُلت لنفسي إيه اللي انا بقوله ده..كنت رايحه علشان اجهز بس افتكرت حاجه
ـ تيّم هو احنا كتبنا الكتاب ازاي من غير يعني ازاي قدرت تتسخرجلي بطاقه
اتكلم بسخرية ـ ودي حاجه تفوتني
اتكلمت بغيظ منه ـ ايوه يعني جبتهم ازاي في الوقت القصير ده
ـ الظاهر إنك لسه متعرفيش أنتِ متجوزه مين ….روحي اجهزي يا جيلان متشغليش بالك بالحاجات دي
سكت و روحت علشان اجهز
خلصت لبس و روحت وقفت قدامه ـ أنا خلصت
بصتلها ……سُبحان الخالق العظيم بجد….حتى بالحجاب كده طب اعمل فيها ايه…اخفيها ولا واوديها فين
ـ تيّم
حمحمت بإحراج ـ يلا طيب
ـ طب مقولتليش ايه رأيك ..شكلي حلو بالحجاب
ـ غزالة
ـ نعم؟!
قرب مني ـ شكلك تحفة مش حلو بس محلياه اوي
ابتسمت بكسوف ، لقيته بيمسك ايدي وبيمشيني معاه استسلمت ومشيت معاه
نزلنا وشوفت نيره جت سلمت عليا ـ مُبارك يا حبيبتي إيه الحلاوه دي
ابتسمت ـ شكراً يا قمر
ـ لا بس ده احنا طلعنا حلوين من غير الحجاب وبيه كمان يا بختك يا تيّم والله
بصيت عليه لقيته بيبصلي ومبتسم بعدت نظري عنه تاني بكسوف
ـ تيّم انا هروح مع ماما النادي هي بتجهز فوق
ـ غريبة يعني مش عوايدك
ـ والله أنت عارف سميرة هانم و أوامرها بقى ….أصرت ف هضطر اروح
ـ هتروحي فين ؟!
كان كِنان اللي دخل واللي سمع اخر جملة نيرة قالتها
