جيلان 1

اتكلمت تاني بكسوف بعد انا شافت نظارته ليها ـ كِنان

نزل عيونه بإحراج ـ نيره هانم …احم تيّم بيه عنده ضيفه جوا

اضيقت نيرة من كلمة “هانم” كانت بتحاول ديما تقولها بطريقة غير مباشرة أنها مش عايزه كلمة هانم دي او أنه يناديها بإسمها عادي لكن لا حياه لمن تُنادي كأن كلامها بيدخل من ودن ويخرج من الودن التانيه

ـ ضيفه مين دي

اتكلم بعصبية طفيفة ـ واحده كانت موجودة في الجنينة الخلفية مسكنَها ادخلها جوه واقوله هي دي البنت اللي كنّا بندور عليها الاقي مش معايا اصلا ومبحلق فيها

ضحكت نيره عليه وعلى أسلوبه ف شرح اللي حصل

كِنان بعد نظارته عنها علشان ما يبتسمش على ضحكتها

ـ وبعدين

ـ ولا قبلين قالي اطلع بره وانا هتصرف واديني واقف معاكي اهو مستنيه يتصرف

كانت هتتكلم بس رنة تليفونها منعتها ـ الو ايوه يا سلمى…..ايوه خلاص انا خارجه اهو ….يا ستي لا والله جهزت هخرج من البيت اهو ..طب يلا سلام….سلام يا ستي

بصت لكِنان ـ انا هخرج دلوقتي ابقى عرّف تيّم اني خرجت

ـ رايحه فين

بصتله بطرف عينها ـ تيّم عارف انا رايحه فين ابقى قوله بس اني خرجت

ومشيت من غير ولا كلمه زيادة بصلها كِنان بقلة حيلة ـ ما هو أنت عايز ايه يعني بكمية الرسمية اللي بتكلمها بيها دي منك لله يا تيّم مش كان زماني متجوز دلوقتي وعايش حياتي اهو انت السبب منك لله

اما في المكتب

ـ يا صبر ايوب يا بنتي بقالنا ساعة قاعدين على الحالة دي انا صبري بدأ ينفذ

بصتلي بغيظ ـ كل ده وبدأ ينفذ وبعدين ما هو انتوا اللي خضتوني يعني

ـ خضناكي في ايه مش فاهم انا كل ده وبتكلم معاكي براحه يا اما تصرفي بعد كده مش هيعجبك

بقالها رُبع ساعه قاعدة بتنزل في دموع وانا خلاص صبري نفذ أو بالأحرى انا مش قادر اشوف دموعها وهي مش عايزه تتكلم

اتكلمت بتهديد علشان اخوفها ـ خلاص براحتك انا هتصرف بطريقتي

كُنت بمثل اني قايم أو اني هروح انفذ تهديدي

إلا انها مسكت ايدي وهي بتقوم وبتبصلي في عيني … يخربيت عيونك يا شيخه ـ استنى خلاص هتكلم والله مش هعمل كده تاني ممكن تقعد

قعدت وانا مسحور في عيونها اللي جبوني الأرض خلاص

ـ بص انا هتكلم بس söz مش هتقول لحد ماشي

ـ söz ؟!! أنتِ من تركيا

هزت راسها بمعني اه

ـ انا زي ما بتقوله كده هربانه

اتنهدت وكملت ـ انا هربت من بلدي بسبب عيلة بابا كانوا عايزين يقتلوني مهما حاولت اهرب منهم في تركيا كانوا بيجبوني تاني يوم من هروبي ، ماما كانت من مصر وبابا حبها واتجوزها تحت رفض أهله كلهم وكانوا ديما يعملوا مشاكل مع ماما وبابا يُقف قصادهم ويدافع عنهم لحد ما ….لحد ما ماتوا هما الاتنين وهما راجعين من رحلة مع بعض