انت عارف كام مرة 1
فاطمه ضحكت جامد: الله يجازيكي يا ليلى..
” بصتلها وهي بتاخد نفسها ”
– انتي عارفة غلاوتك عندي ولا لاء
= وحضرتك عارفه اني بعتبرك زي امي ولا لاء
– يبقي خلاص فكري شوفي عاوزة تعملي ايه ونتصرف وليكي عليا.. لو كررها تاني هخدك منه للأبد.. واهو تفضلي معايا انا
ابتسمت: انا بحبك اوي يا فطومه.. انا صحيح ماما الله يرحمها سابتني بدري شوية بس وجودك عوضني عن حاجات كتير
= وانا من يوم ما دخلتي بيتنا.. وانا مبقتش زعلانه عشان معرفتش اخلف البنت الى كان نفسي تيجي.
– انا بنتك بقا الله
= اكيد يانور عيني
– لو فضلت مش طيقاه لحد بكره.. نخلي عبود يكلمه يطمنه عليا من غير ما يقوله اني هنا ممكن؟؟
= طبعا ممكن.. محدش هيجبرك على حاجه ياحببتي يلا بقا تعالي كلىِ
>>>>>>>>>>>>>>>>>>>>>>>>>>>>>>>>>>>
‘ لا حول ولاقوة الا بالله العلي العظيم ‘
” محمد فضل يلف حولين نفسه بالمعني الحرفي.. و اخر اليوم على الساعه 8 بليل كان فاض بيه..زهق من الشقة وهي فاضية فا خد مفاتيحه وحاجته ونزل .. ”
|| عند ليلي ||
” عبدالله وصل وهي كانت مستنياه ”
– كويس إنك جيت يا عبود.. عايزه اقول حاجه ليكم
فاطمه: قولي
عبدالله: طالما قولتي عبود دي يبقي فيه حاجه
شبكت ايدي في بعض: انا فيه حاجه خبيتها عن محمد.. وحاسه اني عايزه اعرفهالكم.
” فاطمه سكتت وعبدالله بص لـ ليلى ”
– دي حاجه ضروري اننا نعرفها؟
= مش عارفة
– لو عايزه تقولي قولي
= انا.. كان بقالي تلت شهور باخد ادوية وحاجات لأن كان عندي مشكلة صغيره بسببها مش بخلف ومحدش يعرف غير بابا.. معرفش خبيت ليه هي صحيح مشكلة صغيره وليها علاج.. ويعتبر خلاص يعني هبقي كويسة بس انا وقتها حسيت بخوف ومعرفتش اقوله ازاي.. كنت بفضل اتخانق معاه عشان عاوزاه يفهم عاوزاه يلاحظ ان فيا حاجه يهتم ويسألني.. بس هو ملاحظش اي حاجه! انا كنت حاسه ان فيا عيب.. ومضغوطه.. وبسبب كل ده حصلت الخناقة.. يمكن هو فعلا مقصدش جملتة ليا لأنه ميعرفش اني عندي مشكلة.. بس انا وقتها
اتوجـ ـعت منه اوي ومكنش ينفع هو بالذات يحسسني بكده.. يمكن غلطت عشان خبيت ومعرفتش حد غير بابا.. بس هو مكنش مركز معايا اصلا من البداية.. هو اتغير وانا اسفة اني دخلتكم فكل ده حقيقي..
