الرواية 3

اشتاقت له ويأبى كبرياؤها أن تهاتفه هي .. لماذا لم يطمئن حتى على صحتها .. تعرف أخباره من “ريم” و”ريحانة” حين يتحدثن عنه كأنه يهاتفها هي الأخرى .. سمعت “ريحانة” تقول أن صوته يوحي بتعب أو حزن .. تقطر قلبها ألما .. كادت تهاتفه حينها ولكن شعرت بخجل مميت أن تبدأ هي .. كيف تتحدث معه وبأي شئ تبدأ ..

بعد وصولها لعملها في أول يوم لها بعد مرضها .. حاولت الدخول بثقتها المعتادة .. ولكن هناك شئ يمنعها .. تشعر أن الجميع ينظر نحوها .. لم تتعرض لتقصير في عملها من قبل .. وصلت مكتبها حيث “نهلة” التي استقبلتها بترحاب كبير .. ثم دخلت خلفها قائلة :
– ايوة يا عم جاي ونافش ريشك علينا بقى ..

ابتسمت “رنيم” لتقول :
– اهو الحسد دة اللي جايبنا ورا .. يعني تبقى المصايب دي كلها فوق راسي وانتي تقولي نافش ريشك .. انا رايحة اشوف هيتحقق معايا امتى بعد اذنك …

اندهشت “نهلة” قائلة :
– ايه دة انتي متعرفيش اللي حصل ولا ايه ..

التفتت لها “رنيم” قائلة :
– ايه اللي حصل ..

ابتسمت “نهلة” قائلة :
– اللي عمله الفارس الهمام علشانك ..

ضحكت “رنيم” قائلة :
– ما تقولي يا بنتي فيه ايه علطول .. فارس ايه اللي بتتكلمي عنه ..

اقتربت منها “نهلة” لتقول برقة مصطنعة :
– الدكتور يوسف ..

قطبت “رنيم” ما بين حاجبيها قائلة :
– اتكلمي كويس يا نهلة .. وخلي الرقة دي لزوجك .. وقولي ماله يوسف ..

ضحكت “نهلة” قائلة :
– زوجي حبيبي ابو ولادي .. اما عن بعلك بقى فسوى الهوايل .. بصي يا ستي .. اول حاجة عملها مشكلة التحقيق .. مش عارفة ازاي طلب شهادة كل وكلاء النيابة اللي اشتغلتي معاهم .. وكلهم جم .. وشهدوا بحسن السير والسلوك لحضرتك .. فاضل ايه بقى .. الدكاترة اللي اشتغلوا معاكي في القضية دي قالوا ان الخطأ غير مقصود وقدموا الادلة على كدة .. وبكدة انتهى التحقيق على غرامة مالية عقابا لاهمالك .. هي كبيرة شوية بس هو دفعها .. اما عن الرسالة .. فضل ورا الدكتور عبد العظيم لغاية ما أقنعه ان المناقشة بتاعتك تبقى بعد 3 اسابيع من النهاردة .. اما عن تقييم الشهر اللي فات فدة للاسف مفيش منه مفر سوى انك تشدي حيلك الشهر دة وتثبتي انك احسن دكتورة هنا زي ما كنتي ..

جلست “رنيم” وهي تضع يدها على وجهها تتمتم :
– الحمد لله .. اللهم لك الحمد والشكر ..
ثم رفعت نظرها لـ”نهلة” قائلة :
– انتي متأكدة ان يوسف عمل كدة ..