كانت تبكي 2

تعالت ضحكات عدي المرحة وهو يستمع لاجابتها ليجيبها بمرح:

_ انا اسف يا بنت عمي اني ضايقتك كدة واحرجتك بالشكل ده، بس انا كنت متضايق اكتر ان ليا واحدة قريبتي هنا ومعرفش عنها حاجة، ومعرفش اذا كانت محتاجاني ولا لا واني اكون زي الغريب كدة

تنهدت لينا براحة لتومئ برأسها تجيبه بهدوء:

_حصل خير

ومن بعدها حملت حقيبتها تجيبه بابتسامة ناعمة:

_وان مكانش فيه حاجة تاني فاسمحلى امشي

اوما برأسه يجيبها بابتسامة هادئة:

_مبسوط انى اتعرفت عليكِ يا لينا، واعرفي انك لو احتجتى حاجة انا موجود

اومات برأسها تحيبها برقة:

_شكرا

ومن بعدها خرجت من المكتب تاركة اياه ينظر فى اثرها بابتسامة ناعمة

ـــــــــــــــــــــــــــــــــــــــــــــــــــــــــــــ

توقف مكانه واتسعت عيناه بصدمة حينما عرف كينونة من تقبع امامه والتى هي من المفترض اخر شخص يجب ان يتورط معها او يضايقها؛ فهي وللاسف واحدة من اصحاب الارض التى يريد امتلاكها وشرائها بأى ثمن، بل والادهى انها اصبحت على معرفة بعدوه اللدود لياخذها فى صفه.

تنهد صهيب وهو ينظر جهتها ليجيبهم بحرج:

_أنا مجصدش، انت فهمتنى غلط يا يونس، انا كنت بس عايز اتعرف على الغريبة اللى چات بلدنا واعرف ان كانت عايزة حاچة ولا لاه

ارتفع حاجب يونس وهو يجيبه بغلظة:

_لا والله، والتعرف ده بيشمل انك تحاول تتهچم عليها!! وبعدين من ميتىٰ كنا بنتعرف على الحريم؟!!

زم صُهيب شفتيه بضيق وهو يجده يقف له كالشوكة بالحلق ولكنه مع ذلك اجابه بحنق:

_مظنش انك هتتكلم نيابة عنيها، وبعدين انت بتجول انها حفيدة الست راوية يعني ممعاهومش راچل فممكن تبجى محتاچة خدمة ولا حاچة وانا سداد

التف يونس برأسه يرمق تلك التى تقف خلف ظهره بنظرة باردة وهو يسألها بنبرة خطيرة:

_ردي عليه مادام كلامي مش عاچب، عايزة منيه حاچة يا بت الزهار؟

تجاهلت هى لقبها الذي دائما ما يلقيها به وكإنه يصر على تذكيرها بانتمائها وتبعيتها له لترفع عيونها جهة الاخر تجيبه ببرود:

_هو من ناحية عايزة فانا عايزة فعلًا وحاجتين مش حاجة واحدة

تجمد يونس مكانه وهو يجدها تتعداه بل وتتجاهل تحذيره الضمني بكل صفاقة بينما تهللت اسارير صُهيب وهو يرفع عيونه جهتها يسألها بلهفة:

_جوليلى اللى عايزاه يا ست البنات وانا رجبتى سدادة

_وسعلى السكة علشان امشي لانى اخرت وستى مستنيانى