جيلان 2الاخير

الطيارة التالية ستُقلع الساعة 12 والاربعون دقيقة

بصيت على ساعتي كانت لسه الساعة 12 ..اتنهدت بحزن على اللي انا فيه ..الدموع اتجمعت في عينيا وانا بجاهد وباخد نفس اكتر من مره علشان متنزلش

ليه حصل كل ده ليه بعد ما حسيت اني ملكت الدنيا….. خسرت كل حاجه تاني

تيّم اللي حسيت معاه بالامان والامل حسيت أن في شخص ولو لأول مرة بيهتم بيا بالطريقة دي … حسيته خايف عليا وعلى مشاعري

انا شكلي كده حبيته …اه حبيته يمكن في وقت قصير بس ابن سميرة اقتحم قلبي في الوقت القصير ده ..انا قلبي مش مستحمل اني ابعد عنه بالطريقة دي بس أعمل ايه ما باليد حيله

هو اتجوزني علشان يحميني وانا …انا سبته علشان.. علشان احميه

اه ….اه على حرقة قلبي واللي حاسه بيه

دموعي نزلوا وانا بفتكر اللي حصل

فلاش باااك

ـ ده شيك في مبلغ كويس تقدري تعيشي بيه وده جواز سفرك ل أمريكا لأن انا مش هسمح أبدا انك تفضلي هنا بعد اللي حصل

ـ جواز سفري!!؟

قلتها بعدم استيعاب

مسكت الشيك وجواز السفر وانا بحاول قدر الإمكان اني اتحكم في دموعي

بصتلها وحاولت اتكلم بقوه ـ مدام سميره..يمكن حضرتك مش واخده بالك اني حالياً مرات ابنك وأعتقد تيّم مش هيقبل بده أبداً

ـ مرات ابني

قالتها باستهزاء

ـ مرات ابني اللي ابني اتجوزها بس علشان يحميها مش كده وبعدين ايه اللي حصل كنت هخسر ابني بسببك وبسبب عيلتك واللي لحد الآن منعرفش مين منهم اللي عمل كده

ـ يا مدام…انا معرفش مين اللي ضرب الرصاصة وكان هدفه ايه

ـ ولا هتعرفي…اقولك ليه ولا هتعرفي علشان ابني مستحيل يقولك..انا عارفه ابني كويس وعارفه تربيته كل اللي بيعملوا معاكي ده من دافع الشفقة مش اكتر هو أخد الرصاصة بدالك لأنك في بيته و واجب عليه يحميكي…بس انا واجبي بقى كَ أم احمي ابني

ـ طب ممكن ميكونش حد من عيلتي وممكن ميحصلش ده تاني

ـ انا مش هعيش على احتمالات حضرتك

قالتها باستهزاء

ـ الله أعلم بكره مخبي لينا ايه وانا مش هفضل اعيش على ممكن ومش ممكن..انا مش هقدر اعيش تاني او حتى يجيلي نوم وانا حاسه ان فيه احتمالية أن ابني يحصله حاجه

ـ وحضرتك مفكره أن تيّم هيقبل بده

ـ ليه هو أنتِ مفكره أن إحنا هنقوله

ـ ازاي يعني مش فاهمه

ـ تيّم مش هيعرف اي حاجه أنتِ هاتمشي دلوقتي من غير ما هو يعرف وانا لما يصحى هبقى أفهمه واقوله انك في أمان ومش هيحصلك اي مكروه