جيلان 2الاخير
ليه كل الحنيه والحب اللي حسيته من معاملته معايا
وبعدها يوريني قسوته اللي مستهلهاش
ليه ؟؟
عيطت ….عيطت بقهره وانا بحط ايدي على قلبي
آه يا قلبي …آه …اتعلقت وحبيت وفي الاخر اتوجعت …آه
في وسط افكاري دي كلها
رفعت عيوني بعد ما كنت منزلهم وبعيط
استغربت المكان اللي انا فيه
مكان خالي من اي حد
لدرجة دي انا مكنتش مركزه ولا عارفه انا رايحه
فجأة حسيت بحد بيحط منديل على وشي وبيخدرني
حاولت أقوام بس مقدرتش
واستسلمت لظلام
———————————–
ـ ازاي ده يحصل يعني يا ماما
كانت نيره بتتكلم بعصبية
اتكلمت سميرة بضيق ـ معرفش انا معرفش اخوكي ايه اللي حصله وازاي قدر يعمل كده اصلاً
نيره قعدت واتكلمت بدموع ـ كان بقالها كام يوم بتشتكي منه وإن معاملته معاها اتغيرت وانا كنت افضل أهديها وقُلت يمكن مضغوط في الشغل …ماكنتش اعرف انه بيعاملها كده لانه كان عايز كده
ـ ازاي يعني ….يعني اخوكي بقالوا كده كام يوم أصلاً
قالتها سميره باستغراب
هزت نيره راسها بمعنى اه
ـ في حاجه غلط ..انا مش مطمنه
قالتها سميره بقلق
ـ قصدك ايه يا ماما
بصت لها ـ مش عارفه….مش عارفه دماغ اخوكي دي بتفكر في ايه
———————————–
ـ كده تمام واتفقنا على كل حاجه…امتى البضاعة هتتسلم
قالتها ليلى بابتسامة
ـ يوم الخميس الجاي
قُلتها بهدوء
ـ تمام اتفقنا …….تيّم هو…
كانت لسه بتتكلم
قاطع كلامها رنت تليفونها
بصت على التليفون بتوتر بعدها بصيتلي ـ معلش مضطرة ارّد
ـ مافيش مشكله
قلتها وانا لسه محافظ على هدوئي
قامت بعدت شويه عني وردت
كُنت مراقبها بعيوني
لقيتها بتبتسم
قفلت وجت وقفت ناحيتي
ـ انا مضطره امشي حالياً…..هبقى ابعتلك إيمال بتكملة الشغل
قُمت وقفت – تمام ماشي مافيش مشكله
ـ تمام باي
قالتها وهي فرحانه اوي
ابتسمت بسخرية عليها وفضلت مراقبها بعيوني لحد ما طلعت
لسه بلّف ورايح على المكتب لقيت نيره جايه بتجري عليا وبتعيط
وقفت بقلق ـ مالك في ايه !!؟
ـ جيلان
ـ مالها !؟
قُلتها باستغراب
ـ جيلان اتخطفت
———————————–
فتحت عيوني وانا بحاول اعتاد على الاضاءه القوية اللي على عيوني
بصيت حواليا باستغراب
كنت قاعده في اوضه كبيره اوي
وباين على المكان أن انا في فيلا
قلبي دق بخوف
معقول يكون عرفوا مكاني
