قصة جديدة جدا 2الاخير

مش هقدر اقبل ده, لاني كده هكون بلغي شخصيتي, بلغي حياتي, هكون عامله زي الانسان الالي اللي عايش عشان ينفذ طلبات اللي مصنعه! هو اصلا ينفع هيبقى في حد عنده حياه كده؟ الغي كل رغباتي واتنازل عن كل الحاجات اللي بحبها وابقى بس عايشه عشان يرجع من الشغل يلاقيني قاعده في البيت, ووقت ما يحتاج مني أي حاجة يلاقيني موجوده! هو في كده؟ انا فاهمه ان في ستات كتير بتتقبل الوضع, وفعلا عايشه بالطريقه دي من بعد الجواز, لكن انا مش من النوع ده, انا من قبل ما اتجوز وانا ما كانتش طموحاتي ابدا ان الجواز يوقف حياتي المهنيه او الشخصيه, انا حتى كنت عاوزه اعمل ماجستير ولحد الان مش عارفه اعمله, كنت مقرره ان انا اروح لبابا في الاسبوع على الاقل مرتين عشان اشوف احتياجاته, لكن في فتره الاجازه اللي اخدتها من الشغل ما كنتش بروح له غير في الشهر مرة واحدة, بسبب المشاكل اللي كانت بتحصل بيني وبين حاتم لما بروح عنده يوم ولا يومين وارجع, هو لخبط ليا كل خططي, ومع ذلك كنت ساكته واقول انها ظروف حياة وبتتغير وطبيعي الواحد يتأقلم معاها, بس مش لدرجه انه يخليني اخسر شغلي الحاجه الوحيده اللي فيها ضمان مستقبلي.

– بصي انا مش ضدك, وانا قلتلك من الأول ان هو مالوش حق يرجع في كلامه بعد ما كان في اتفاق ما بينكم, بس حاولي تهدي الامور شويه عشان خاطر بنتك.

بصت قدامها وقالت من غير نفس:
– هحاول…..

وفعلا هي ما كانش عندها طاقه تحاول, لأنها لا ناسيه كلامه معاها أخر مره ولا ضربه ليها ولا قادرة تواجهه حتى.
———
من وقت اللي حصل بينهم اخر مره, وهو حاسس ان الموضوع كبر اوي وانه بشكل او أخر اتهور, حتى لو هي غلطت وتمادت لكن الغلط كان بدايته من عنده, والحقيقه انه كان ناوي يحاول يصلح الأمور شوية, بس فكرة انها فضلت 3 ايام تاخد شغل بالليل جننته, وكانت الحسبة الوحيده للموضوع ده عنده, انها بتعمل ده عِند وبتعمل الحاجه اللي هو بيكرهها, وده زود المشاحنات جواه, واللي زودها اكتر ابوه.

– ما هي بقى كل ما تكلمني تقولي ان انا من اول الخطوبه كنت موافق على موضوع شغلها وده كان اتفاقنا فماليش حق دلوقتي اني ارجع في كلامي.

رد ابوه برفض:
– لا طبعا ما فيش الهبل ده, انت جوزها ومن حقك تمشي عليها كلامك في أي وقت, ماشي في الأول كنت موافق بس دلوقتي لقيت ان الموضوع مش مناسب حياتك ولا بيتك يبقى من حقك تقول لها لا و تقعدها, على فكره انا من اول ما اتخطبتوا وانا بقولك البت دي عاوزه تفرض شخصية, واهو بتعملها دلوقتي بقى في واحدة جوزها يقولها اقعدي من شغلك وتفضل مستمرة في شغلها طول الفتره دي ومش سائله فيه! اصلا هي مش المفروض تشتغل, هي اتجوزت يبقى تقعد في بيتها تخدم جوزها وعيالها وتاخد بالها منهم وتشوف مصلحتهم ومصلحه بيتها, او ماكنتش اتجوزت بقى من الأول وفضلت لشغلها وحياتها.