تفك النحس 2
رميت الورد بعيد عني وأنا بقول: – بلاش كلام فاضي! مسكت موبايلي وفتحت حسابي الجديد وبدأت أبعت صداقه للناس اللي أعرفهم… افتكرت «سمر» وبحثت عن صفحتها اللي ما زلت حافظه اسمها ولما لقيتها بعتلها طلب صداقه والمره دي اتقبل بسرعه فاستغربت أوي واتعدلت في قعدتي وأنا ببتسم، واستغربت أكتر لما لقيتها بعتتلي رساله بالسلام رديت بسرعه، فبعتت سمر: – من زمان نفسي أكلمك حتى لما شوفت كريم النهارده كنت عايزه أسأله لكن نسيت…
ابتسمت لما قرأت اسم كريم، وبدأ الكلام بيننا لحد ما حكيتلها عن اللي حصلي كامل في صورة رسائل بيننا وأخر حاجه أخدت رقمي ووعدتني إنها هتكلمني وأننا هنكون أصحاب… ***** مرت الأيام وظهرت نتيجتي اللي كانت أحسن من الترم الأول إلى حد ما! اتبقى على حفل زفاف حازم وأسماء أيام بسيطه، حازم لسه ليه مكان في قلبي ولسه بحس بوخزه لما أعرف إنه هيتجوز خلاص، ولسه قلبي بيدق لما أشوفه… كنت بروح مع أمي كل يوم عند خالي عشان نساعد في ترتيبات الفرح وعشان أثبت لنفسي إن الموضوع عادي لكنه مش عادي أبدًا…
وفي الأيام دي لحُسن حظي إني مشوفتهوش ولا مره… – مش غريبه شويه نجمه بتبص على نجمه! كنت واقفه في البلكونه باصه للسما، التفت على صوت خالتي دلال وقلت بابتسامة: – حبيبتي يا خالتو. وقفت جنبي نبص احنا الاتنين للسما بصمت، فسمعت صوته وهو جاي ناحيتنا وبيكلم خالتي بنبرة مبتهجه: – عمتو كنت عايز…. بلع باقي كلامه لما دخل البلكونه وشافني وكأنه اتصدم لوجودي حتى ما ألقاش السلام عليا وكمل كلام بنظرات مهزومه: – كنت عايزك تشوفي بدلتي وتقولي رأيك…
كان لابس بدلته وشكله عريس حلو أوي، وعشان أخفي توتري وصدمتي ووجع قلبي زغردت، وبنبرة مرحه لكن حزينه قلت: – ما احنا مش هيكون عندنا عريس كل يوم بقا! ابتسم وقال بنبرة لا تختلف عن نبرة صوتي: – عقبالك يا نجمه… غنيت بضحك ومرح مزيف: – أنا لسه… أنا لسه… أنا لسه صغيره… كملت خالتو بغناء وهي بتشاور عليا: – الحلوه لسه صغيره… على الحب لسه صغيره… ضحكنا فكمل حازم بضحك: – زوقيني يا لمونه زوقيني زحلقيني فوق صابونه فرحيني… فرجيني الدنيا الحلوه فرجيني…
وقفنا نغني ونضحك وفجأه سكتنا ووقفنا ساندين على السور وبنبص للسما، واحنا التلاته بنفكر فقاطع تفكيرنا صوت حازم لما قال: – قد يكون حلمك نجمه… قلبي دق بسرعه أوي لما بص ناحيتي لكنه بص للقمر وكمل: – ويرزقك الله بقمر… قالها ودخل من البلكونه، فحسيت إنه يقصدني بالمعنى الحرفي لإسمي… وحسيت بوخزة في قلبي، وأنا بتسائل معقوله احساسي بيه غلط! ومعندوش أي مشاعر ناحيتي! ويا ترى قصده ايه!! بصيت ناحية خالتي اللي بتتأمل شكلي وابتسمت فابتسمتلي ودخلت من البلكونه ورا حازم…
