تفك النحس 2
في الفتره دي عملت ملف شخصي جديد على الفيسبوك من موبايل والدتي وبعتت لميسره إن كلامنا كان غلط من البدايه واتفقنا منتكلمش تاني، وهو تفهم وقالي إني زي أخته وإنه كان بيهزر معايا! لكن لما كان بيشوفني في الكليه كان بيبتسملي فابتسمله، وكتير من الأحيان كنت بلاحظ إنه بيبص عليا وإنه متابعني بس كنت بتجاهله وأختفي من قدامه. خلصت امتحانات سنه أولى وفي أخر يوم لقيت ميسره مستنيني قدام الكليه، تجاهلته وكنت همشي لكنه نادي عليا، ولما وقف قدامي قال:
– عملتِ ايه في الامتحان؟ – الحمد لله كان كويس! سكت ميسره فكنت همشي لكنه وقفني وقال كلام كتير مفهمتش منه أي حاجه كان بيتكلم عن المواد والكليه… حسيت إنه عايز يقول حاجه تانيه، لكن شروق قاطعتنا: – عملتِ ايه يا نجمه؟ – الحمد لله. قلتها وسكتت فسلمت شروق على ميسره وكانت بتكلمه بصوت ناعم، لكن ميسره استأذن ومشي ومشيت أنا مع شروق، اللي سألتني: – هو ميسره كان عايز ايه! – كان بيعرفني مواد سنه تانيه وأسجل ايه…
– المفروض متقفيش معاه يا نجمه… أنا أختك وليا مصلحتك وخايفه عليكِ من كلام الناس. ابتسمت بسخرية وقلت: – كلام الناس لا بيقدم ولا يأخر… كلام الناس لا بيعشي ولا يفطر!! يا ستي الناس أصلًا مش بتبطل كلام… سيبيها لله. – إنتِ حره بس أنا واجب عليا أحذرك. – تسلمي… قلتها وهزيت راسي وكأني اقتنعت بس عشان مجادلش! ومجرد ما خرجنا من الجامعه قالت شروق: – حازم جه تعالي اركبي معانا.
بصيت ناحية حازم، وهو بصلي وابتسم كنت بحس إنه بيكون فرحان لما يشوفني! لكن لما شوفت أسماء راكبه جنبه رجعت لوعيي، ركبت معاهم وأسماء اتكلمت معايا كتير وحبيتها لأنها محترمه أوي، فقالت شروق: – على فكره الاتنين دول كتب كتابهم أخر الأسبوع يا نجمه. حسيت بصدمه لكن قلت لنفسي كنت متوقعه ايه يعني! ما هما أكيد هيتجوزوا ولا كان عندي أمل لأخر لحظه إن حازم يسيبها ويرجعلي! يرجعلي ازاي؟ هل هو كان معايا وسابني؟! كفايه أوهام! طول الطريق كنت باصه من شباك العربية وبكلم نفسي. في الوقت ده قررت إن دي أخر مره أركب معاه.
لما وصلت البيت دخلت أوضتي وعيطت كتير، فكرت للمره التانيه إني أنهي حياتي، لكن افتكرت كلام كريم وخصوصًا جملته: – فصبرٌ جميل…. حسيت إني ضعيفة الإيمان، أنا ازاي محاولتش ألجأ لربنا! مع إني دايمًا كنت بلجأله! سألت نفسي أنا امته بعدت كده! شغلت قلبي بالحب والكلام الفاضي ده ليه! فين الورد بتاعي من القرآن! فين أذكاري فين قلبي أصلًا! قمت اتوضيت وصليت وسجدت وبكيت ولقيتني بدعي ربنا يشيل حازم من قلبي ودعيت لكريم ربنا يجبر بخاطره ويحققله كل اللي يتمناه، وبقوا دعوتين ثابتين في كل سجده…
