تفك النحس 2
ومر يوم ورا التاني وراه التالت وأنا بقعد معظم الوقت مع أصدقائي الجداد، ومستمتعه بالأجازة برفقتهم… تجاهلت حازم تمامًا حتى لما كانوا يقعدوا يلعبوا مكنتش بقعد معاهم عشان بيبقى موجود وحسيت إنه تجاهلني هو كمان حتى مبقاش يلقي عليا السلام! كنت كل ما أشوف كريم يبقى قاعد مع زوج سمر «ياسين»… وفي اليوم الرابع كنت داخله المطعم عشان أتعشى كنت ماشيه لوحدي وحازم وأسماء كانوا قاعدين على ترابيزه مع أمه وخالي، وباقي العيله على ترابيزه تانيه….
رفعت راسي لفوق عشان أتجاهل حازم وأعدي من عليه كأني مش شيفاهم لكن يشاء الله إني اتكعبل في طرف الإدناء وأقع على حازم، اتنفضت واتعدلت بسرعه واعتذرت وأنا ببص لأسماء: – والله العظيم أسفه… أسفه والله… أسفه… أسفه جدًا… قال حازم وهو بيبص للأرض: – حصل خير يا نجمه… سيبتهم وروحت ناحية الترابيزه اللي عليها باقي العيله وأنا في قمة إحراجي، ضحكت شروق وهي بتقول بسخرية: – حركات قرعه! بصيت لشروق وقلت: – تقصدي ايه يا شروق!
تنهدت وقالت بفظاظة: – ولا حاجه! قالت خالتي دلال لشروق بغيظ: – يا شروق… حاسبي على كلامك مفهوم؟! قالت شروق بسخرية: – أنا مقولتش حاجه!! والله بقا اللي على رأسه بطحه يحسس عليها! حسيت أعصابي بتترعش، وتلقائي بصيت لكريم اللي كان باصص للأرض وساكت ووشه معلهوش أي تعبير! تجاهلوا الحوار لما الأكل اتحط ورغم إني مكنتش اتغديت إلا إن نفسي اتسدت وحاولت أكل معرفتش، كنت بتخيل نفسي برد على شروق وأقولها كفايه بقا! وأفهمها إني مكنش قصدي! حسيت إن العيله كلها بتبصلي بشك فقومت ومشيت وأنا ماسكه دموعي وبقول لنفسي ياريتني ما جيت الرحله دي!
سمعت خالتي دلال بتقول لشروق: – عاجبك كده!! وقامت ورايا تنادي عليا، عديت من على تربيزة حازم وأنا عيني في الأرض لكنه كان متابعني بطرف عينه، صعبت عليا نفسي أوي، وزاد الأمر سوء لما اتكعبلت مره تانيه في طرف الإدناء ووقعت على كرسي بس الحمد لله كان فاضي وإلا كان هيبقى شكلي ايه لو وقعت على حد تاني! ودي أخرة اللي يلبس حاجه طويله مش على مقاسه! ******* ضحكت شروق وقالت بسخرية: – نجمه دي لخمه أوي!
قام كريم وكان متغاظ من شروق فقالت والدته «فريال»: – لحقت تاكل يا كريم؟! – الحمد لله شبعت… قالها ووقف للحظه يبص في المطعم ولما شاف ياسين شاورله فهز ياسين رأسه بتفهم وشال ابنه الصغير من سمر وقال: – اتعشي بقا وابقي اطلعي نامي أنا هاخد بالي من الكائن ده لحد ما ينام… بصتله سمر وقالت بابتسامة: – تشكرات كتيرات… ولما مشي قال ياسر:
– جوزك اتصاحب على كريم يا سمر… اللي يشوفهم زمان يقول مستحيل يتلموا على بعض… – أقدار بقا يا جوز أختي… قالتها سمر وهي بتاكل… فقال ياسر: – طيب هسيبكم بقا أنا كمان وأروح لهيثم… ولما مشي بصت سمر لنسمه اللي متابعه وساكته وباين عليها الزعل وقالت: – مالك؟ إنتِ متخانقه معاه ولا ايه؟! – لأ هو أنا وش خناق… أنا بس قلبي وجعني لما نجمه وقعت مرتين… – يا حبيبتي! دا باين عليها انها اتحرجت خالص…
