كام مرة نبهتك 1
❈-❈-❈ لمار صحيت تاني يوم حسة بصداع جامد ومش فاكرة هي نامت امتي ولا ازاي بتبص لاقيت نفسها نايمة في الصالة علي كنبة وحد فردها لسرير صغير لمار بتعب … ماما مامااااا انتي فين ابتسام … أيوة لمار اخيرا صحيتي صباح الخير لمار …. هو اية اللي حصل امبارح انا مش فاكره حاجة خالص ابتسام …
ولا حاجة كنا قاعدين عادي وانتي فجأة نمتي ع نفسك حاولنا نصحكي كتير مردتيش تقومي فردتلك الكنبة سرير وسبتك براحتك بقا لمار كشرت … ازاي دا انا علي طول بسهر اجي اليوم اللي هسهر معاكم فيه وانام اوف بقا ابتسام … معلش تتعوض انهاردة أن شاء الله لمار بضيق … انا مش هبات انهاردة هروح بالليل لأن معتز هيرجع علي الفجر كدة لازم اكون في البيت ابتسام … يا ستي انتي فين وبالليل فين هتضايقي من دلوقتي اديكي معانا اهو يلا قومي فوقي كدة انا حضرتلك الفطار
لمار … حاضر هي زهرة مش هتنزل انهاردة كمان تقعد معانا ؟ ما انا كل ما اكلمك كل يوم الصبح اسمع صوتها عندك اشمعني لما انا جيت يعني ؟ ابتسام … بس بس في ايه اهدي ع نفسك شوية نازله تفطر معانا كنا مستنين حضرتك تصحي ياساتر عليكي قطر بيحدف دبش وهو ماشي لمار متكلمتش وقامت تدخل الحمام من غير كلام وبعد وقت بسيط كانت زهرة نزلت وقاعدين كلهم يفطرو سوا لمار …
يعني عمار مكنش عارف يأخر نفسه شوية عشان يفطر معايا أو حتي ياخد انهاردة نص يوم عشان يقعد معايا بدل امبارح اللي مش عارفه مين بصلي فيه دا ابتسام … ما قلتلك عدى عليا الصبح وهو رايح الشغل وقال هيرجع بدري في ايه للندب دا علي الصبح مش حلو لمار … ماشي سكت اهو ( وبصت ل زهرة ) الا صحيح يا زهرة انتي مبتتوصليش خالص من خالتك اللي في اسكندريه ؟ زهرة بهدوء …
لا طبعا بتواصل معاها علي طول بكلمها واسال عليها وهي كمان بتكلمني تسال عليا ديما لمار …. علي كدة بقا هتجيلك لما تولدي ؟ زهرة … لما أولد لا مظنش خالتو كبرت و مظنش تقدر علي سفر رايح جاي في نفس اليوم وغير بيتها واولادها مش هينفع تسيبهم وانا اكيد مش هزعل أنا مقدرة دا لمار … تسافر وترجع في نفس اليوم ازاي ؟ انا اقصد تقعد معاكي كام يوم بعد الولادة اكيد مش هتقدري تخدمي نفسك يعني
ابتسام … متشغليش بالك انتي بالكلام دا هي أن شاء الله مش هتحتاج لحد وبعدين انا معاها اكيد مش هسيبها لمار كشرت … نعم معاها ازاي ؟ وانا هتسيبيني ولا ايه أن شاء الله ؟ انتي عايزة أهل معتز يأكلو وشي ويقولولي امك فضلت مرات اخوكي عليكي ؟ زهرة بحرج … اكيد لا طبعا ماما هتكون معاكي انتي هي مش قصدها كدة ابتسام …. انتي خلاص واثقه ومتاكدة انكم هتولدو مع بعض وفي نفس اليوم كمان ؟
