كام مرة نبهتك 1
هايدي … قلقت ملقتكش جمبي قمت اشوفك فين المهم هتفطر معانا قبل ما تنزل ولا زي كل مرة مستعجل ؟ عدي … لا يا حبيبتي هفطر معاكم علي ما تحضري الفطار اكون خلصت مراجعه الملف هايدي اكتفت ببتسامة بسيطة وخرجت من الاوضه وهي واثقه أن كان في حاجة علي المكتب عدي مكنش عايزاها تشوفها وهي سبب توتره كدة وأصرت أنها لازم تعرف هي ايه حضرت الفطار و صحت كريم و خرج عدي من المكتب وحاول يتصرف طبيعي لكن كان باين عليه الارتباك
عدي … الحمد لله هايدي … ايه دا انت كدة اكلت ؟ عدي …. اه يا حبيبتي مش قادر صدقيني هايدي … دا انت مكملتش سندوتش واحد يا عدي هتنزل تروح الشغل وتفضل تشرب قهوة علي كدة ازاي بس عدي … طب اعمل ايه مش قادر بجد اصلا انا مش متعود اصحي اكل علي طول لازم اعمل أي حركة الاول يادوب هدخل اغير وانزل بقا ورايا شغل كتير متعطل من امبارح دخل يلبس وهي حضرتله كزا سندوتش ولفتهم ولما خرج اتفاجا بيها واقفالو بالسندوتشات وفي عينيها نظرة إصرار
عدي ببتسامة … في ايه واقفالي وبتبصلي كدة ليه ؟ بدأت اخاف منك علي فكرة هايدي … تخاف مني ليه بقا ؟ عدي … يعني ديما واخد عليكي هاديه ومطيعه كدة من وقت ما تعبت اتحولتي لشرسة شوية اهو بصي بتبصيلي ازاي هههههههههههههههه هايدي ضحكت … طيب كويس انك عارف اني بتحول اتفضل بقا خد السندوتشات دي من غير اي اعتراض وانزل واتحرك براحتك وقبل ما تشرب القهوة وتنشغل تكون واكل الاكل دا كله الاول تمام ؟
عدي برفعه حاجب …. اوامر تاني يا هايدي ؟ هايدي ببتسامة … لا مش أوامر خالص دا رجاء ممكن حبيبي يفطر عشان ميتعبش ويتعب قلبي معاه ولا لا ؟ عدي … حاسس اني بتثبت صح هايدي … ابدا والله انت مش واثق اني بحبك وبخاف عليك ولا ايه ؟ عدي وهو بيقرب وبيبـ,ـوس راسها …. واثق يا ست البنات ربنا يخليكي ليا وميحرمنيش منك ابدا وحاضر يا حبيبي هفطر الاول وبعدين هشرب القهوة تمام كدة مرضيه حضرتك
هايدي … مرضيه جدا جدا يا روح قلبي حاول متتاخرش وتنسي نفسك في الشغل ها انت عشان متتعبش تاني ومتنساش أننا معزومين عند ماماتك انهاردة هه عدي وهو بيسلم علي كريم وخارج … حاضر يا ستي كفايه الوصايا دي كلها انا كويس والله متقلقيش ومش هتاخر علي العزومة يلا سلام هايدي …. سلام
اول ما عدي خرج وكريم خلص فطارة شغلتله التلفزيون وحطتله لعبه وسابتة ودخلت اوضه المكتب وبدأت بهدوء تدور هي مش عارفه بتدور علي ايه بس واثقه أن في حاجة هي لازم تلاقيها ولازم تعرف هو ارتبك وخبي ايه بعد تدوير نص ساعه كانت يأست وعماله تشيل في الكتب اللي في المكتبه وترجعها تاني بإهمال لحد ما وهي بتشيل كتاب لاقت الغلاف بتاعه مقطوع ومن جوة أجندة مش كتاب استغربت و فتحت الأجندة اكتشفت انها مذكرات ل عدي خدتها وقعدت بهدوء تقري اللي فيها
