كام مرة نبهتك 1

لمار … انا ماشية يا عمار دلوقتي هريحكم كلكم مني ومش هاجي هنا تاني ابدا ولا هتصل بحد ولا هضايق حد تاني وشكرا اوي علي ماما ومراتك عملوة فيا كل دا عشان بقول لماما لما أولد وانا وزهرة هي هتعمل ايه لاني هحتجاها معايا هبو فيا هما الاتنين وامك طردتني يا عمار عشان خاطر مراتك اللي فضلت تعيطلها امك قالتلي ملكيش دعوة بينا وريحينا بقا شكرا يا عمار مكنتش اعرف اني تعباكم اوي كدة انا ماشية

لمار بعتت الرساله واستنت لما اتاكدت أنها وصلت ل عمار وقفلت التلفون خالص و مسكت الشنطة اللي كانت جايه بيها ولسه هتخرج من الاوضه امها دخلت ابتسام … اقعدي يا لمار مفيش نزول واهي زهرة دخلت شقتها استهدي بالله كدة واقعدي لمار … انا هاديه جدا يا ماما بس لو سمحتي سبيني انزل دلوقتي ابتسام … يا بنتي انتي بتقولي شكل للبيع فيكي ايه انا مش فاهمة تعبتي قلبي معاكي لمار … سلامة قلبك يا ماما انا عايزة اروح دلوقتي الله يخليكي ولما انا اهدي وانتي كمان نبقي نتكلم بس سبيني امشي الله يخليكي عن ازنك

مستنتش تسمع رد امها وخرجت بسرعه وهي بتبتسم بانتصار علي خطتها اللي مشيت زي ما رسمتها بالظبط ❈-❈-❈ مكة صحيت بدري جدا وخرجت بهدوء تحضر الفطار وتشوف بنتها تجهزها لأن ايمان أصرت أن الغدا يكون عندها للكل انهاردة انس صحي ملقهاش جمبة غير هدومة وجهز وخرج يشوفها فين سمع صوتها في المطبخ بتلعب مع تالا وقف علي جمب من غير ما تشوفه يتفرج عليهم كانت بتغنلها وتعملها حركات مضحكة عشان ترضي تفطر كان شكلهم حلو

سرح انس في ملامح مكة وهي بتضحك اللحظة دي حس انه رجع لورا وشاف حبيبته اللي حبها من اول ما فهم يعني ايه حب اتنهد بحزن علي الحال اللي وصلو ليه سوا حاسس ان جوازة بينهار وتعب مش عارف يعمل ايه حاسس أنه عمل كل حاجة ممكن تتعمل عشان ينجح علاقتهم لكنة في كل مرة بيفشل انتبهت مكة للي واقف من بعيد متابعهم وعينيه عليهم وهو كمان بصلها بحب وشوق لكنة استغرب نظرتها جدا نظرة كلها لوم وعتاب نظرة كلها الم وحزن ارتبك انس ودخل يتكلم عشان يهرب من حصار نظراتها اللي فهمهم كويس

انس وهو بيبـ,ـوس تالا … صباح الخير صاحيين بدري ليه ؟ مكة … صباح النور مفيش بس قلت الحق اجهز الفطار عشان هننزل لماما من بدري نقضي اليوم تحت ماماتك مصرة تسافر انهاردة بالليل فمش عايزين نضيع حاجة من اليوم انس … طيب تمام انا هنزل المستشفى ساعتين كدة واعمل إذن وارجع عشان اقضي اليوم معاكم أن شاء الله مكة … أن شاء الله اعملك تفطر قبل ما تنزل ؟ انس … لا تسلمي هنزل انا لما يصحو عرفيهم اني مش هتاخر