كام مرة نبهتك 1

لمار … احنا الاتنين معادنا قريب اوي من بعضه لو مش في نفس اليوم اكيد في نفس الاسبوع الوضع هيكون ايه بقا ؟ ابتسام … لا حول ولا قوه الا بالله هريحك يا لمار هروحلك انتي الصبح واخر النهار هاجي ل زهرة ولما اسيبك حماتك هتكون معاكي ولما اسيب زهرة مرات عمك ايمان هتكون معاها ها ارتحتي كدة ؟ لمار كشرت … ياسلام وليه متبتيش معايا ؟ وليه الشحططة دي تروحي وترجعي وتخدمي هنا وهنا ؟ ماهي تكلم خالتها تجيلها ولا تشوف حد من عيلتها اللي رمين طوبتها دول وانتي تكوني مع بنتك

زهرة وهي بتمنع نفسها تبكي …. لو سمحتي يا لمار تتكلمي من غير غلط قلتلك ماماتك هتكون اكيد معاكي يبقي متجبيش سيرة اهلي بأي كلمة ابتسام …. معلش يا زهرة هي كدة دبش اكيد متقصدش يا حبيبتي وبعدين ايه ماماتك دي ما انا امك انتي كمان علي فكرة لمار زعقت …. ياسلام يعني عشان بقول كلمة الحق بقيت غلطانة دلوقتي مش كدة ؟ ابتسام وقفت قصادها ….. اقصري الشر يا لمار ورسي يومك علي خير هه قلتلك هجيلك وخلصنا ويمكن تيجي من عند ربنا ومتكونوش مع بعض اصلا واه غلطتي انتي مليكش الحق تكلميها بالاسلوب دا

لمار … كلمتها ازاي مش فاهمة ؟ انتي اللي بتخافي علي مشاعرها اوي وهي ماشاء الله عليها بتعرف تلعب علي الوتر دا من اي كلمتين اهيء اهيء علي طول عشان تيجي تزعقيلي انتي وتقلبي عليا زهرة وقفت … عن ازنك يا ماما انا هروح شقتي جت تتحرك ابتسام وقفتها … اقعدي مكانك يا زهرة ( بصت ل لمار ) وانتي انا بزعق لما بتغلطي ولسانك ينقط سم مش كلام احترمي نفسك بقا وبطلي تضايقها هي لا بتكلمك ولا بتحتك بيكي اعملي زيها ياستي وريحينا كلنا

لمار … وهو انا تعباكم اوي كدة يا ماما ؟ ابتسام … لمار خلاص خلصنا لمي الدور بقا زهرة بصوت مخنوق … ماما بعد ازنك سبيني اروح شقتي لو سمحتي لمار وهي بتدخل اوضتها … لا وعلي ايه خليكي يا حبيبتي انا اللي هروح شقتي اقعدي براحتك انا هريحيكم كلكم زهرة … ماما ادخلي وراها متخليهاش تمشي بالشكل دا واكون انا السبب لو سمحتي خليني انا ادخل شقتي عشان الموضوع ميكبرش اكتر من كدة

ابتسام مكنتش عارفه تعمل ايه تعبت من المناهدة مع لمار وفي نفس الوقت مش حبه أن بنتها تمشي من البيت بالشكل دا زهرة حست بحيرتها ابتسمتلها وطبطبت علي ايديها واتحركت بهدوء وخرجت من الشقه في الوقت اللي زهرة وابتسام كانو بيتكلمو فيه كانت لمار بتسجل رساله بصوتها لعمار وهي منهارة من العياط