رانيا 2اخير

انا فعلاً عكيت الدنيا, لدرجة انها كانت عاوزه تمشي. -وعملت إيه؟ -حاولت معاها لحد ما قعدت, واضح انها فعلاً زعلانة اوي من كلامي امبارح, ومعاها حق, كنت دبش صح؟ رفع صادق حواجبه ورد: -اوي. -بفكر اجبلها هدية. -رغم إني مش حاسس الهدية هتصلح حاجة بس حاول. رد بثقة: -لا انتَ مش فاهم رانيا بتفرح قد ايه لو جبتلها هدية. —————— — وصل للبيت في وقت بدري عن عادته, لكنه ملقهاش مستنياه في الصالون كالعادة, وكانت ام علي بترتب الصالون قبل ما تنام فسألها عنها: -رانيا فين يام علي؟ -رانيا هانم طلعت من ساعة اوضتها بعد ما نيمت ريان ومنزلتش. هز راسه وطلع لفوق وهو عارف انها اكيد لسه زعلانة, دخل الاوضة واتفاجأ انها نايمة والنور مطفي, فتح الاباجورة وقعد جنبها على السرير وهو عارف انها بتتصنع النوم, لانها مستحيل تنام قبل ما يرجع, حتى في كل خناقتهم قبل كده ماكنتش بتنام غير لما تطمن انه رجع واتعشى كمان. -رانيا… حبيبتي انا عارف انك صاحية. لكنها مردتش, نزل راسه يشوف وشها لانها لما بتكون بتتصنع النوم عينها بترمش, لكن لاقى عنيها ثابته, ملامحه بان عليها الاستغراب وهو بيحاول يصحيها, وبعد شوية فتحت عينها بتبصله باستفهام فسألها: -انتِ نايمة بدري ليه؟ ردت بهدوء: -ريان عنده بارتي في الحضانة بكره وهروح معاه. رغم استغرابه من ردها لأنها في العادة بتسهر عادي حتى لو هتصحى بدري لكنه قال بحماس: -طب قومي كده عندي ليكي مفاجأة. اتعدلت في نومتها وقعدت فحط بوكس صغير على رجليها, بصتله باستغراب: -إيه ده؟ -افتحي وشوفي. فتحت الرباط المزين للبوكس وبعدها فتحته فلاقت ساعة شيك اوي ومعاها انسيال بيلمع, بصتله: -بمناسبة إيه؟ رد فعلها وتره اوي وخصوصًا انه مخالف تمامًا لردود افعالها في العادي, فرد: -عادي يا حبيبتي, مش شرط يكون بمناسبة, دي هدية… واعتبريها عربون صلح يا ستي. قفلت غطا الصندوق وحطته جنبها على الكومود, ورجعت باست خده وقالت بنبرة باردة: -شكرًا يا حبيبي, جميلة, اتعشيت؟ بصلها بصد.مة وهو مش مستوعب رد فعلها, ورد على سؤالها بتوهان: -اه. هزت راسها بماشي ورجعت نامت وغطت نفسها باللحاف. فضل يبصلها بعد ما نامت وهو مصدوم في رد فعلها, في العادي كانت بتصرخ بحماس وهي بتشوف الهدية, وتلبسها في وقتها وتقعد تسأله لو حلوه عليها, وتقوم تحطها في مكانها المناسب باهتمام وعنيها مليانه فرحة زي الطفل الصغير, وترجع تفضل تحــ . ــضن فيه وتبوس فيه ومية الف شكرا بتقولها في نفس اللحظة, وتوصفله قد إيه الهدية عجبتها…. فين كل ده؟ معقول زعلانة منه للدرجادي؟ دي حتى لما كانت بتكون زعلانة ماكانش بيكون ده رد فعلها خاالص.. -وبعدين بقى!! قالها بحيرة وهو بيبصلها باسئلة كتير بتدور في عقله, وشعور بالضيق سيطر عليه. —————– -إيه ده؟ انتِ قاعدة كده ليه؟ قالها (صادق) بقلق لما فتح باب شقته ولاقى (سمر) قاعدة في الصالة, وكمل بقلق: -في حاجة حصلت؟ ردت بهدوء وهي بتتحرك ناحيته: -لأ, ليه؟ بص لساعة الحيطة وقال: -الساعة 1 ونص, لسه صاحية ليه؟ ردت بتوتر: -يعني قولت استناك عشان لو حابب تتعشى. رفع حاجبه بذهول لكنه تمالك صد.مته وقال: -انا بتعشى مع صحابي بره. -وليه؟ يعني قصدي كل يوم بتتعشوا كلكوا بره؟ -لا مش كلنا, ساعات بجبلي اكل وانا راجع. سألته بضيق: -وليه يعني؟ مافيش ست في البيت تعملك عشا؟ قعد على الكرسي ورد: -والله انا كل يوم برجع الاقي الست نايمة, فالمفروض اصحيكي؟ بوفر عليكي التعب وبجيب اكل من بره. -على فكرة بيكون في اكل جاهز في التلاجة. -انا مابفتحش التلاجة اصلاً عشان اعرف. فركت ايديها في بعض وقالت: -طب بعد كده حتى لو نمت هسيبلك عشا على الرخامة. -زي ما تحبي. حاولت تفتح معاه كلام تاني: -هو انتوا ليه كل يوم بتسهروا بره؟ -يعني هنرجع البيت بدري نعمل إيه, الشغل بيخلص 8 أوقات. سألته وهي عارفه الإجابة من قبل ما يرد: -مين بقى اللي بيسهروا؟ -انا وحسام, واوقات حسين بس مش على طول. ردت بسخـ ــرية: -اه طبعًا اللي طفشانين من بيوتهم بس اللي بيسهروا بره. بصلها بجنب عينه ورد.. ……….. انتهى الجزء….. الجزء الخامس _فانتوا الاتنين غلطانين وعايزين ضــ . ـرب الشبشب.. _غلطانه اني بهتم بجوزي! _وانا غلطانة اني بهتم بعيالي؟!!! بصتلهم الحاجة كريمة بغيظ من ردودهم ومن افعالهم قبلها وقالت: _ياهبلة منك ليها، في مثل بيقول (ما جاوز عن حده أنقلب ضدّه) يعني كل شيء لو زاد عن حده يبوخ.. قوليلي يا رانيا.. قالتها وهي بتبص لرانيا بالعنية وكملت: _لو حسام من الرجالة اللي راحة فين وجاية منين، وبتعملي إيه، وبتكلمي مين، واشتريتي ده ليه، ونايمة ليه و كل نفس بتتنفسيه عايز يعرفه، كنتي هتتخنقي ولا لأ؟ بأمانه… بصتلها بحيرة وبعدين ردت: _مش عارفة، ماجربتش.. بس حاسه اني كنت هفرح باهتمامه. هزت راسها بلأ: _بتهيألك، لو كان كده ماكنتيش هتتحملي العيشة معاه، انا اعرف واحده قريبتي جوزها كان كده، لدرجة انه بيرجع من الشغل عاوزها تحكيله يومها بالتفصيل، وكل حاجة متدخل فيها وعليها مية سؤال، لو كانت في مشوار بره يرن عليها ولا ٢٠ مرة انتي فين دلوقتي وبتعملي إيه ووصلتي لفين، لحد ما يزهقها في عيشتها وماتكملش المشوار وترجع، لما كانت حامل وتعبانه كانت كل ما تكح كحه ولا ترجع يصمم يطلع بيها على الدكتور، ومية سؤال في نفس اللحظة ها بقيتي احسن؟ اعملك كذا اجبلك كذا… لحد ما كان بيخرجها عن شعورها.. هي اصلاً تعبانة ومش متحملة الاستجواب والمناهده معاه.. ووصلت لدرجة انها بقت بتتمنى يوم واحد بعيد عنه وعن اسئلته وتدخله.. يا حبيبتي كل انسان منا من حقه الحرية، والمساحة الشخصية.. ياخد مساحته براحته كام ساعة كده في اليوم يروق د.ماغه ويبعد عن الضغط والهيصة، وعمومًا من حقك مش كل نفس تتنفسيه تلاقي واحد واقف بيعده عليكي وبيقولك اتنفستي ليه!!؟ بصتلها بتردد وبان في عينيها انها بدأت تفهم كلامها: _وحسام محتاج يكون عنده مساحة شخصية، ماتكونيش طول الوقت فوق راسه كده، حتى عشان مايحصلش فتور في العـ ـلاقة وملل من ناحيتة، لازم أي عـ ـلاقة بين اتنين يكون فيها مساحة.. وشوية نكون قريبين اوي وشوية ندي لبعض فرصة نتنفس بعيد عن بعض… وكده. _يعني انا غلط؟ قالتها بحزن واضح فردت عليها كريمة: _مش غلط، بس مبالغتك هي اللي غلط، وخدي بالك لو عملتي ده مع ريان هيزهق ومش هيحب التعامل معاكي، يعني مش كل شوية بتعمل إيه واعمل كذا وماتعملش كذا، وذاكر وكل ونام والعب.. ابنك نفسه لو عملتي معاه نفس الشيء مش هيتحمل.. ولازم برضو ياخد مساحته شوية عشان مايزهقش من البيت ومنك. _بس هو كلامه قدام صحابه وجعني اوي. قالتها بد.موع فطبطبت كريمة على كتفها وقالت: _وانا ماقولتش انه مش غلطان، وافضلي متجاهله، لحد ما يتعلم الأدب ويعرف ان بعد كده اسرار بيتكوا ماتطلعش بره، ولا يقل منك قدام حد. ولفت لسمر بتقول بلوية بوق: _وانتِ يا موكوسة هطفشي الراجل منك؟ وجودك زي عد.مه في بيته!! كشرت وشها بضيق وغضــ . ــب: _وانا اعمله إيه؟ اهمل عيالي عشانه! _بت انتِ ماتصعيش عليا، مانا ياختي كان معايا ٤ عيال قرود ومع ذلك ماقصرتش مع جدك الله يرحمه، وكنت وقت ما يرجع من الشغل اكون وقفاله على رجل، عاوزه تفهميني انك طول اليوم بتجري ورا العيلين! _لا مش طول اليوم.. بس على ما يناموا بكون تعبت وعايزه انام ومش هقعد استناه لنص الليل على ما يرجع. _يعني جوزك عمره ما بيرجع بدري؟ عمره ما بياخد اجازة؟ _لا بياخد الجمعة اجازة، وساعات السبت، واه معظم الأيام بيرجع متأخر قليل اوي لما بيرجع بدري. _والجمعه والسبت بتعملي معاه إيه فيهم؟ ولما يرجع يوم بدري بتعملي له إيه!؟ ردت بزهق: _عادي اليوم بيمشي زي كل يوم، ولما بيقعد اجازة بمشي يومي زي ما بعمل كل يوم وبغديه وبعشيه وبدخل انام عشان هو مابينمش بدري. اتنهدت كريمة بيأس وقالت: _يا بنتي جوزك بيكون زي ابنك، بيغير من اهتمامك بالكل كا عدا هو، وبيزهق من اهمالك له، يعني لو انتِ مهتمية بابنك الصغير عن ابنك الكبير اكيد هيغير وهيزعل ومعاملته هتتغير معاكي، هو نفس الفكره مش فكرة انك بتهتمي بعياله مش بعيال حد غريب، فكرة انك معتبراه مش موجود، شخص يعتبر ما لوش لازمه، بيروح بيته ما يلاقيش حد مستنيه ولا حد بيتكلم معاه ولا أقل اهتمام منك، يبقى معاه حق… انا مش بقولك اهتمي بيه هو وسيبي عيالك، ولا بقولك طول اليوم اهتمي بيه لكن من حقه لما يرجع بيته يحس باهتمام منك، ما هو انتِ طول اليوم مع العيال هو بقى لما يرجع الوقت ده بتاعه هو حتى لو العيال موجوده، بس اتكلمي معاه شوفي محتاج إيه واعمليه مش تحسسيه اللي هو انتَ جيت ما جيتش مش فارقه.. والكلام ده متبادل بينك وبينه يعني هو برده لازم يهتم بيه زي ما انتِ بتهتمي، يسألك مالك لو حس انك زعلانه، يسألك لو محتاجه حاجه يتكلم معاكي يحسسك باهتمامه… ده أ ب علاقات!! لكن انك تخلي كل يومك لحاجه معينه وتهملي بقى كل الجوانب لا ما ينفعش، الحياه ما بتمشيش كده وترجعي تزعلي لو راح يتجوز عليكِ!!! ما هو راجل وله حقوق ومدام انتِ مش موفرهالي يبقى من حقه. وكلامها عرف يرمي القلق والشك جواها، وخلاها تقرر تغير من حياتها اللي بقت منحصرة في (شغل البيت والعيال)… ——————— في فيلا حسام… اتفاجئ بل اتصد.م لما دخل ولقى رانيا وريان قاعدين على السفره بيتغدوا ودي حاجه هي عمرها ما عملتها قرب منهم وباين على وشه الاستغراب الشديد وهي قالت اول ما شافته بنبره بارده جدا: _إيه ده حسام انتَ وصلت! تعالى اقعد واخلي ام علي تجيبلك طبقك. بص لها من استغرابه وسألها وهو مش عارف ما يعلقش: – هو انتِ بدأتِ غدا من غيري؟ رجعت تبص في طبقها وهي بتقول: _ اصل انتَ اتاخرت عن ميعادك فقلت يمكن مش جاي او في حاجه عطلتك، وانا وريان كنا جعانين فقلت خلاص ناكل احنا ولما انتَ تيجي تبقى تاكل. بص في ساعه ايده ورجع بص لها وقال باستنكار: _ اتاخرت؟ دي الساعه 4:30 وانا برجع 4:00 عشان اتغدى النص ساعه دول تأخير!!! وبعدين ما اتصلتيش ليه تعرفي اذا كنت جايه على ميعاد الغداء ولا لا، مانتِ على طول بتعملي كده! رفعت عينها بتبص له بملامح باين عليها الزهق: _ خلاص يا حسام ما جراش حاجه قلتلك كنا جعانين وكان احنا. _تمام.. قالها وهو بيلف عشان يتحرك، فوقفته وهي بتقول له باستغراب ايه ده مش هتاكل لفلها وقال بملامح باين عليها الزعل: _ شكرا مش عاوز. ردت ببرود وهي بتكمل اكل: _ عمومًا لما تحب تاكل ابقى عرف ام علي. هز رجله بعصبية وهو سامع ردها وخد نفسه وطلع اوضته من غير رد. دخل الاوضة رمى حاجته على السرير وفضل يلف فيها والغضــ . ــب ماليه من تصرفاتها، وبص للباب بغيظ من انها ما طلعتش وراه كالعاده وقال: _انا مش فاهم إيه الهبل ده! مالها دي؟؟ ———– في شقة صادق…. _عملتلك بقى التورلي اللي بتحبه. رفع حواجبه مستغرب ومندهش: _غريبة! اول مرة تعملي اكل من الاكل اللي بحبه. بصتله باستغراب وسألته: _ يعني انا كنت بعمل الاكل ما بتاكلوش؟ _ لا بس كنتِ بتعملي الأكل اللي باكله عادي مش الأكل اللي بحبه. ابتسمت له وهي بتقول: _وبكره هعملك مسقعة باللحمة المفرومة. وغمزت بعينها في اخر كلامها، فضحك فجأة بدهشة واضحة وسألها: _هو بكره عيد تحرير سينا؟ او في مناسبة اليومين دول؟ ضحكت هي كمان وقالت: – بس يا صادق ماتبقاش بايخ… يلا كل قبل الاكل ما يبرد. ولأول مرة تشوفه بياكل بنفس مفتوحة، وبابتسامة، مش تكشيرة، وده من تصرف صغير قوي منها انها عملت له الاكل اللي بيحبها!!! وده اللي خلاها تبصله لفتره مش قليله وجواها بتلوم نفسها، لان في النهايه الانسان زي الطفل الصغير لما بيشم ريحة اهتمام من شخص قريب منه بيفرح ويتبسط وكأن الشخص ده قد.م له حاجه كبيره قوي! واللي خلاها تلوم نفسها ان يمكن صادق من جواه ما كانش طالب منها حاجات صعبه عشان تبين له اهتمامها بيه بالعكس ده اتفه المواقف هتخليه يحس بسعاده باهتمامها. …….. _انتِ رايحة فين!؟ سألها حسام باستغراب بعد.ما قالت لريان يوقف لعب عشان تاخده تلبسه فردت بهدوء: _هنروح لماما ما انا لسه بقول لريان دلوقتي قدامك. _ هتروحي لماما!!؟ هو انتِ مش واخده بالك ان النهارده اجازتي يعني سبتي الأيام كلها وجايه تروحي النهارده؟ _ ما انتَ قبل كده قلتلي ما تربطيش نفسك بيا!! فاكر لما ماما اتصلت عليا وكان يوم اجازتك وكانت عاوزاني اروح اتغدى معاها واخد ريان ونروح عشان خواتي وعيالهم رايحين ونتلم مع بعض وانا رفضت عشان ما اسيبكش لوحدك واروح، انتَ وقتها بعد ما قفلت معاها قلتلي لا كنتِ روحي ما لكيش دعوه بيا هو انا عيل صغير عشان تقعدي معايا! هي امبارح كلمتني وقالتلي ان النهارده العيله متجمعه و اني اروح فانا وافقت عشان عارفه انك مش هتشغل بالك يعني اذا مشيت ولا قعدت… يلا يا ريان. وخدته وطلعت تلبسه.. وحسام لسه مش مستوعب صد.مة تصرفاتها… وحاسس ان في حاجه غلط اكيد مش هتتصرف كده من فراغ. _ هو في إيه يا رانيا انتِ فيكِ حاجه مش طبيعيه! ما بقتيش زي الاول في تعاملك معايا، لا بتستنيني في اكل ولا بتستنيني لما برجع ويوم اجازتي سايباني وماشيه انا محتاج افهم في إيه!؟ _ بديك مساحتك الشخصيه…. بحاول ماخنوقكش هو مش ده كان طلبك! و انا لما فكرت في الموضوع لقيت انك معاك حق، انا كنت اوفر قوي، وأي شخص مكانك كان هيتخنق ومش هيتحمل الوضع فقلت اهدي الموضوع شويه واتعامل بالعقل. سألها لما نزلت من فوق بعد ما لبست ولبَست ريان، فوقفت تبصله بابتسامه بارده وكان ده ردها عليه قبل ما تاخذ ريان وتخرج من الفيلا بدون اي اهتمام لكلامه او استغرابه.. ———— _هم العيال فين؟ قالها صادق باستغراب بعد ما خلص حمى وطلع فجأه ما لقاهمش. _ناموا. _اه صحيح ده الساعة ١١..طيب قومي نامي انتِ كمان. قعدت على الكنبة وفي ايدها كوباية نسكافية: _عملتلك نسكافية تعالى اشربه. قعد جنبها وبدأ يشرب بهدوء لحد ما شرِق لما سمعها بتسأله: _ يومك كان ازاي النهارده في الشغل كنت حاسه انك الصبح كده متوتر ومتضايق من حاجه!؟ ……. يتبع…… #الجزء السادس… شهرين كاملين عدوا… والوضع زي ما وصفته (سمر) بالضبط, وطبقته (رانيا) بالحرف, في اول الأيام كان عاجب (حسام) وكان مرتاح جدًا, لدرجة إنه كان بيعرض عليها يخرجها وحست إن أسلوبه معاها بقى أفضل ومبقاش يتأفأف لما يشوفها او تتكلم معاه زي الأول, بس بعد شوية بدأ الوضع يزعجه.. خصوصًا لما يدور على حاجها ومش يلاقيها, او يبقى تعبان ومتسألوش, او يبات في الشغل وماتتصلش, وحتى طول اليوم وهو بره مبتتصلش بيه, ومابقتش تبعتله غدا مع السواق كالعادة لما مايجيش على الغدا , ولو شافته متضايق مابتسألوش ماله, وطول الوقت غايبة عن عينه… يا مع ريان, يا في المطبخ, يا في اوضتها او بره في النادي. -ام علي, رانيا هانم فين؟ -لسه مرجعتش من بره يا بيه, قالت انها رايحه النادي. وقف في نص الفيلا وملامحه باين عليها الغضــ . ــب والضيق, عمرها ما كانت بتفضل بره لحد وقت رجوعه, ولو كان وراها إيه كانت بترجع قبله! فضل مستني ساعتين على ما رجعت, دخلت من باب الأوضة فشافته قاعد على الكنبة قدام الشاشة: -مساء الخير. بصلها من جنب عينه ورد: -مساء النور. بدأت تقلع هدومها وجزمتها وخدت هدوم نضيفة ودخلت خدت شاور وطلعت وقفت قدام المراية تسرح شعرها وتحط بادي اسبلاش وكريمات وبعد ما خلصت كل ده, راحت قعدت جنبه في سكوت ومسكت تليفونها بتتصفحه. فضل الوضع ده لمدة نص ساعة, لحد ما كسر هو السكوت وقال: -غريب إنك رجعتي متأخر, كنتي دايمًا ترجعي قبل رجوعي. ردت بهدوء وهي باصة في الموبايل: -عادي… ماكنتش حابه ارجع بدري, وبعدين ام علي موجوده لو احتاجت حاجه هي هتعملها. سكت شوية وبعدها لفلها بجسمه وقال وهو بيبصلها: -كان يوم صعب في الشغل ومشاكله كتير. في العادة كانت بتسأله مشاكل إيه وتخليه يحكيلها اليوم بتفاصيله وتقد.م حل على قد ما تقدر او تواسي! لكنها المرادي ردت بنفس الهدوء: -ربنا يعينك. -مش هتسأليني مشاكل إيه؟ سألها بغيظ مقدرش يتحكم فيه, فبصتله من فوق التليفون وردت: -ده شغلك وانا مفهمش فيه, فمفيش داعي توجع د.ماغك ود.ماغي بالحكاوي في حاجات مفهمهاش. -اوجع د.ماغك! رددها بصد.مة, فقفلت تليفونها وقامت من غير ما تهتم بصد.مته: -هنام بقى عشان مصدعة. مسك ايدها يوقفها, ووقف قدامها وسألها بنبرة حنينة: -مالك يا رانيا؟ إيه اللي مغيرك معايا بالشكل ده؟ بصتله ببرود وردت: -مش متغيرة معاك. -والله! يعني كل تصرفاتك دي طبيعية! انتِ حتى مسمعتيش مشاكلي ولا سألتيني مالي, ولا رجعتي بدري عني, وامبارح لما ماجتش على ميعاد العشا كلتي وماتصلتيش عليا تسألي اتأخرت ليه؟ ورغم إني رجعت الصبح مسألتيش كنت فين ولا جيت متأخر ليه؟ رفعت كتفها بعد.م اهتمام وقالت: -عادي.. سيباك براحتك مش عاوزه اخنقك عشان متطفش مني. غمض عينه بارهاق, هو كان متأكد إن تغييرها بسبب اليوم ده وكلامه يومها, ورغم إنه بعدها اعتذرلها ورضاها لكنه لاحظ تغييرها. مسك كتافها وقال: -يا حبيبتي قولتلك أنا اسف, ماكنتش اقصد اضايقك يومها… قاطعته وهي بتقول باستغراب: -وانتَ مين قالك إني زعلانة! انا بس قولت اعمل اللي يريحك, اغير من نفسي عشان حياتنا تمشي, وعشان ماتقعدش في قاعدة تانية وتفضحني قدام القاعدين. -يعني انتِ شايفه ان تصرفاتك دي الحل؟ ردت بجملة صد.مته: -مش احسن ما نطلق؟ -نطلق؟ قالها بصد.مة وعيون وسعت من جملتها. —————— في شقة صادق… جرس الباب رن قامت جري كأنها مستنية حد تحت نظراته المستغربة، وغابت بره شوية لا سمع صوت حد دخل ولا هي رجعت، لحد ما قرر يروح يشوفها راحت فين لكنها قابلته على باب الاوضة داخله بابتسامة بقى يشوفها مؤخرا. – إيه يا سموره كان مين على الباب؟ رفعت ايديها اللي بينهم شنطه كبيرة شوية متغلفة، سألها تاني: _إيه ده؟ شدته من ايده وراحوا قعدوا على الكنبة وحطت الشنطة على رجله وقالت: _افتحها وشوف… فتحها مع استغرابه الكبير، وعينه وسعت بصد.مة لما خؤج منها جاكت جلد اسود رجالي، فبصلها باستغراب: _إيه الجاكت ده؟ ابتسمت وهي بترد عليه: _ده ليك يا حبيبي. وكلمة حبيبي كانت رجعت تقولها تاني مؤخرا زي ما كانت بتقولها اول جوازهم. _اشمعنا؟ _عشان انتَ كان عندك جاكت جلد اسود واحد الشتا اللي فات ولما جيت بطلع الشتوي من يومين لاقيته بدأ يقشر، فقولت لازم تجيب واحد جديد يكون اسود برضو الشتا ده، دورت على النت وعجبني ده فطلبته. والحقيقة كانت لافته كويسة اوي منها فرحته، فابتسم بسعادة وهو بيبوس خدها: _تسلم ايدك يا حبيبتي، زوقه حلو اوي. _بجد عجبك؟ _طبعًا عجبني، اصلاً طول عمري بيعجبني زوقك، وكنت بحب اخدك معايا وانا بشتري عشان تنقيلي لبسي، بس انتِ انشغلتي بقى بعد كده. بصتله بند.م وقالت باعتذار صادق: _انا اسفة يا حسام… انا بجد ماكنتش ملاحظة تقصيري معاك، و…. قاطعها وهو بيمسك كفها: _يا حبيبتي خلاص احنا هنفضل نتكلم كتير في الموضوع ده! قولتلك نرد.م على اللي فات بقى. قاطعهم رن تليفونه فقامت تجيبه من الشاحن، ووشها اتغير لما شافت رقم لكن برنامج التريكولر اللي بيعرف هوية الأرقام ظاهر انه لواحده ست وصورتها باين عليها جميلة… جميلة اوي… بصتله بنظرة شر وهي بتقول: _واحدة ست…. ست وحلوة! يتبع…… الجزء السابع هو الأخير .️ ماتنسوش اللايك والكومنت والشير…. ويا جماعة الخير القصص بتكون اجزائها صغيرة… اومال ليه اسمه جزء مش فصل… عشان بيكون قصير… بلاش كومنتات ده قصير ده قصير… الجزء الأخير… -مش احسن ما نطلق؟ -نطلق؟ قالها بصد.مة وعيون وسعت من جملتها. -اه, ما هو في حالتنا دي يانا اتغير يا انتَ تتقبل وضعي ورخامتي, يا نطلق.. وانتَ ماكنتش متقبل وضعي, يبقى كان لازم اتغير.. ولو مش عاجبك تغييري, خلينا نلجأ للحل الأخير, وكل واحد فينا يروح لحاله. نزل ايده من على كتافها وهو بيقولها بعصبية: -إيه الجنان ده! طلاق إيه وهبل إيه؟ بلاش تكبري الموضوع. ردت بنبرة مخنوقة وكانت على وشك العياط وده بان على وشها بوضوح: -ريان مش مكتفك يا حسام, طلاقنا مش هيأثر على علاقتك بيه, هو ابنك وهتشوفه وقت ما تحب وتعمله كل حاجه, مقدرش امنعك عنه, وعمري ما هكون الأم اللي تخلي طلاقها يأثر على نفسية ابنها, وهيفضل بينا الود والاحترام عشانه. هز راسه مش مستوعب كلامها: -انتِ بتتكلمي بجد؟ -انا بفكر في الموضوع بقالي مدة, ولاقيت إننا للأسف مش متفقين, ومش هنعرف نكمل سوا, فخلينا ناخدها من …. سابها وراح ناحية السرير وهي متابعاه بعينها باستغراب, واستغربت اكتر لما لاقته بينام وبيتغطى! راحت ناحيته وقعدت جنبه من الناحية التانية: -حسام احنا بنتكلم! انتفضت لما سمعت صوته بيقول بعصبية: -سيبي زفت يتخمد بدل ما أقوم اكسر د.ماغك اللي بتفكري بيها دي. سكت كلامها لكن ماسكتش صوتها اللي ظهر بعد شوية في عياطها, فنطر الغطا بعصبية وهو بيبصلها بنية الخناق, لكن لما شاف شكلها صعبت عليه, فاتنهد وهو بيهدي نفسه, وشدها ليه يحــ . ــضنها وهو بيقول بتعب: -يعني غلطانه وغبية وبتعيطي! زاد عياطها فملس على ضهرها وهو بيهمس: -حقك عليا طيب متعيطيش, انتِ هبلة يا رانيا! حصلت تفكري في الطلاق! طب ده انا في عز خنقتي من تحكماتك عمري ما فكرت فيها, ولا كنت هفكر. -انت قولت ان لولا ريان كان… قالت من بين عياطها فقاطعها وهو بينفخ وبيشتم في نفسه وبعدها قال: -ي*** دي قعدة, كان يوم مطلعلوش شمس, يا ستي كنت حمار وكلمتين طلعوا مني وقت نرفزة, وكنت قبلها متغاظ منك بسبب حوار ريان والشوربة اللي سلخت رجله. -انتَ مابقتش تحبني زي الأول. قالتها بشهقة وكل شعورها متجه للنقطة دي, فرد بصدق: -والله عمري, لا بيني وبين نفسي ولا مع حد قولت إني بطلت احبك ولا بفكر ابعد عنك, انا بحبك يا رانيا, وعمري ماهحب حد غيرك, بس يا حبيبتي كل شيء له حد, لما الراجل بيتحكم في الست زيادة بتتخنق وبتحصل مشاكل كتير بينهم وممكن يطلقوا فيها حتى لو بينهم حب, كل حاجه بحدود كويسة لكن الشيء إن زاد عن حده ينقلب ضده… الغيرة, والخوف, الحب, القلق, الاهتمام, كل المشاعر دي لو زادت عن حدها بتخنق الطرف التاني وبتقلب هوس, انا مبقولش ماتهتميش بيا, لكن في المعقول, بلاش احس إنك محاوطاني وكل تصرفاتي متراقبة, يا حبيبتي ده لو الواحد حس كده من امه ولا ابوه بيتخنق برضو! -يعني أنا غلط؟ سألته بنبرة ضعيفة, فباس راسها وهو بيبعدها عنه بيبصلها في عنيها عشان تفهمه وقال: -اتعودي متبالغيش في مشاعرك ولا في تصرفاتك, حتى مع ريان.. يعني بدل ما ترني عليا كل ساعة تقريبًا رني عليا مرة واحده وانا بره ومرة لو اتاخرت عن ميعادي, بدل ما تقعدي طول اكلنا مركزة معايا كلت إيه وماكلتش إيه اهتمي بأكلك انتِ ولما تلاقيني مباكلش خالص ابقي اسألي, مش كل ماكون قاعد سرحان شوية تسألي مية مرة مالك, وتصممي إن في حاجة مضيقاني لحد ما بتزهقيني, ساعات يا حبيبتي الواحد بيسرح عادي.. بيفصل شوية مع نفسه طبيعي, مش طول الوقت هقعد أتكلم واهزر وانتبه! وبلاش تفضلي تسأليني عن كل تفصيلة في يومي, سبيني أنا احكيلك اللي شايفه يستحق والباقي مش مهم! يا حبيبتي انتِ كنتِ بتسأليني شربت قهوة كام مرة النهاردة, وفطرت إيه بره ومع مين وكان ناقص تخليني اصورلك يومي فيديو! -عشان بحبك. ابتسم لها وباس خدها وهو بيقول بحب: -والله وانا بحبك, بس المبالغة في الشيء بتبوظه صدقيني, اسمعي بس كلامي والدنيا هتبقى فل. رفعت كتافها له: -هجرب. ———————- -ايوه, تمام.. زقها بدراعه وهو بيهمس لها: -اقعدي يا سمر انتِ كاتمة على نفسي! والوضع كان كده فعلا, بتحاول تسمع اللي الست اللي بتكلمه بتقوله, فقاعده على ركبتها ومقربة ودنها من التليفون وتقريبًا شبه قاعدة فوقه! ولا كأنه كلمها, بالعكس دي بصتله بتحذير ورجعت تحط ودنها على التليفون تاني. -ايوه طبعًا انا كنت كلمت… وكمل كلامه اللي كان باين عن الشغل, لكنها بتحاول توصل لأي كلمة تقولها التانية تمسكها عليه او تحس بأن فيه استلطاف بينهم. ولكن المكالمة عدت بسلام, قفل التليفون ورماه بعيد فرجعت قعدت مكانها بهدوء, فبصلها بغيظ وهو وبيسألها: -والله؟ بصتله بجنب عينها: -في حاجة يا حبيبي؟ -سمر ما تستهبليش, ينفع اللي عملتيه ده؟ انا ماكنتش مركز في المكالمة بسببك. كان باين عليه الضيق, لكنه في نفس الوقت من جواه مبسوط باهتمامها, واتبسط اكتر لما سمعها بتقول بنرفزة: -اه ينفع, وهي تكلمك ليه, وماتقوليش شغل, حتى لو شغل يبقى في المكتب مش تكلمك على تليفونك الخاص, وبعدين عاوزني اشوف واحدة ست بترن عليك وباين من صورتها انها حلوة وصغيرة, واقولك عن اذنك يا حبيبي هروح انشر الهدوم وافضيلك الجو! ضحك ضحكة مقدرش يمنعها وهو بيهز راسه مش مصدق اللي بيسمعه منها: -انتِ اتجننتي باين! وده من امتى الاهتمام ده؟ مانا كنت بقوم بالتليفون ارد عليه وعادي. قربت منه وهي بتحــ . ــضن دراعه: -من دلوقتي, فوق قلبك يا صادق وابقى اتلوح بس. رفع دراعه وضمها ليه وهو بيقول بسعادة: -يعني وانتِ مش معبراني مابصتش بره, دلوقتي هبص! ده انا ابقى راجل اهبل. باست خده وهي بتقول بدلع: -لا حبيبي راجل عاقل. ———————— بعد شهرين.. -ها حاسس إن الوضع بينكوا بقى احسن؟ قالها صادق وهو قاعد قدام حسام في النادي اللي قرروا يخرجوا كخروجة عائلية فيه, بص حسام بتلقائية على رانيا وهي بتساعد ريان يخرج من حمام السباحة وقال: -الوضع احسن كتير, ساعات برضو بترجع لتحكماتها القديمة بس قليل اوي, وبقيت اعرف اتعامل مع الوضع والدنيا بتمشي. أيده صادق: -الحياة دايما اب اند داون, وطبيعي شوية كده وشوية كده, المهم ان الموضوع مابيوصلش لمشكلة زي الأول وانها فهمتك وفهمتها. -اه الحمد لله مابيوصلش, وانتَ اخبارك إيه؟ بص هو كمان لسمر وهي مع الأولاد وقال: -ماكنتش حاطط امل, بس سبحان الله طلع فيه امل كبير كان متخزن باين. ضحك حسام وهو بيقول: -طب بس لاحسن جايين. -يلا نتغدى ولا إيه احنا جوعنا. قالتها سمر فوقفوا وصادق رد: -احنا جعنا اكتر بس سيبناكوا براحتكوا. مشيوا معاهم والضحك والهزار ماخلصش من يومهم, والاهم ان كلهم نفوسهم صافية وهادية, والحال بقى افضل كتير من الأول. والقاعدة الثابتة: هي إن المبالغة في أي حال بتفسده, مبالغة رانيا في الاهتمام اتحولت لخنقة, ومبالغة سمر في الإهمال اتحولت لملل وفتور, والاتنين قدروا يفهموا ده ويصلحوه حتى لو متأخر وبعد سنين جواز, فأن تصل متأخرًا خيرًا من ألا تصل, والأهم أنهم اعترفوا بخطأهم ومكابروش في الغلط. انتهت………

مقالات ذات صلة

رواية جديدة رائعة لكاتبة رائعة ج3

ليلي من13للاخير

رجعت من سفريتي

الرواية المطلوبة من11-25

ماما قالتلي: “مفيش حد محتاجك

فريدتي من7-12

اترك تعليقاً إلغاء الرد