سلمي جديدة 2الاخير
=موافقة.. بس محتاجة وقت
استغرب وقال
_وقت ليه مش أنتي خلصتي جهازك وكل حاجة في الشقة جاهزة
=الموضوع مش موضوع جهاز يا زياد.. الموضوع إننا محتاجين وقت لبعض
_وقت إيه إحنا بقالنا 6 شهور مخطوبين وطالما جاهزين يبقى نتوكل على الله ونتمم الجواز.
تنهدت وقالت له
=قصدي يا زياد إننا محتاجين وقت نفهم فيه بعض أكتر لان بكتر مشاكلنا دي مش هنعرف نعيش مرتاحين بعد الجواز لو فضلنا نجادل في كل حاجة حياتنا هتبقى صعبة. أنت لازم تحاول تحسن من طباعك.. لو مش عشانك يبقى عشاني
_بس أنا وعدتك إن دي آخر خناقة ودلوقتي بحاول أغير أي حاجة بتضايقك مني..
قاطعته بإصرار
=وبرضه محتاجين وقت يا زياد.. صدقني الوقت ده هو اللي هيفرق في شكل حياتنا بعدين.
بص في عينيها وشاف إصرارها فمرضاش يضغط عليها وهز راسه بالموافقة وسكت و اتحرك من جنبها وهي فضلت واقفة مكانها بتراجع كلامها وهي متأكدة إنها أخدت القرار الصح اللي فيه مصلحة لعلاقتهم.. والله اعلم اللي هيحصل بعد بس هي متفائلة إن اللي جاي أحسن
…….
بعد تلات شهور..
ـ بارك الله لكما، وبارك عليكما، وجمع بينكما في خير
جملة المأذون لسه مخلصتش وكانت الزغاريط ملت المكان كله كانت هيا واقفة قدامه وهو باصص لها بابتسامة حنونة أوي وهي بادلته نفس الابتسامة بوش منور وفرحان قرب منها ومسك إيديها وهو يقبلهم بكل حب وقال لها
_أخيراً بقيتي ليا يا دنيا.. بعد كل الانتظار ده.
ابتسمت وقالت له
=شفت الصبر حلو إزاي أنت اتغيرت 180 درجة في التلات شهور دول ويا رب تفضل دايماً للأحسن.
زياد ضحك وقال لها بهزار
_بس بصراحة لسه موضوع القاعة ده شاغلني.. ما كان زمانا دلوقتي في مركب شيك في وسط البحر، والناس كلها بتبص علينا ونبان مختلفين عن الكل وأحلى بكتير
دنيا ضيقت عينيها وبصتله نص بصه وقالت بحدة مضحكة
=زيااااد
ضحك بصوت عالي وقال
_خلاص خلاص.. بس نعديها المرادي وذوق قاعة ‘اللؤلؤة’ دي مش بطال بس خلينا متفقين إن ذوقي أنا كان هيبقى أحلى برضه.. من غير كذب يعني
بصت له وسكتت لحظة وبعدين انفجرت في الضحك، وهو كمان ضحك معاها وأخدها في حضنه بحب وهيا استسلمت لحضنه وهي حاسة بسكينة وراحة كانت بتتمناها من زمان.. أهو الحلم اتحقق وبقى ليها شريك حنين بعد عقبات ومشاكل كتير خلت لحظة دي طعم تاني
