سما من 1-10
أشرقت شمس يوم جديد على سما
لكن هذه الشمس مختلفة فهي أشراقة لحياة جديدة
قامت سما أغتسلت ولبست هدومها وخرجت راحت الشركة مع إن هي في أجازة مرضية لمدة أسبوع لكن قطعت الإجازة وراحت الشغل
تالين / سما جيتي ليه أنتي لسه تعبانة
سما / تعبانة إيه يا بنتي تصدقي بالله أنا بقالي 7 شهور أول مرة أحس أني كويسة كدة
تالين / حبيبتي ربنا يسعدك وتكوني دايما كويسة
( ساهر عرف إن سما جت الشركة ونزلها حاول يقنعها تروح على البيت بس هي رفضت وأشتغلت وساهر كان مستغرب جدا البنت دي جايبة القوة دي كلها منين أزاي بعد قصة الحب اللي هي حكتهاله دي كلها وبعد إنكسارها ترجع وتبقى أقوى من الأول أما سما فغيرت طريقة لبسها وشكلها حتى شعرها غيرت لونه للاصفر وفيه بعض الخصلات الزرقة وكمان بقت بتحطيم ميكب بطريقة عصرية لدرجة إن لو حد من زمايلها أيام الجامعة شافها مش هيعرفها الكل أتفاجأ من سما الجديدة وكمان كانوا بيشجعوها وخصوصا أنس اللي كان مبهور بالتغيير ده ومبسوط جدا إنها بتعيش حياتها وتخطت موضوع نور دا خالص
أما ساهر فكان هو الوحيد اللي مش مقتنع باللي سما بتعمله وعارف بل متأكد أن سما مانسيتش نور لأن كل حاجة هي بتعملها مش بتعملها علشان بتحبها دي بتعملها علشان نور بيكرهها
أما سما فكل كلامها مع اللي حوليها هزار وضحك حتى مع نفسها مابقتش بتتكلم وبقت بتشتغل كتير جدا لدرجة إنها أول ما توصل البيت بيبقى نفسها السرير يقابلها على السلم
بس برغم كل ده مشاعرها وأحزانها وأوجاعها كانت بطلعها في شغلها
وفي يوم العميل اللي هي كانت مسؤولة عن تنفيذ مشروعة وتخطيطه طلب من ساهر يقابلها وساهر عرفها ولما قبلته قالها إنه عايز يبني بيت كبير وعايزها هي اللي تعمل البيت ده وتشرف علي تنفيذه و في المقابل المادي اللي تطلبه وطبعا دي فرصة كبيرة أي حد يتمناها
وبالفعل قبلت الشغل ده وساهر طلب منها تاخد أجازة من الشركة علشان تقدر تخلص التصميمات بسرعة
ساهر / يا سما لازم تاخدي أجازة علشان تقدري تخلصي المشروع ده وكمان تبدعي فيه براحتك
سما / يا ساهر قولتلك أنا مش بحاجة لإجازة أنا هقدر على شغل الشركة والمشروع دا وماتقلقش شغل الشركة مش هيتأثر
ساهر / أنتي عبيطة ياسما صح أنتي فاكرة أني خايف على شغل الشركة
سما / طيب لو أنت مش خايف على شغل الشركة ليه عايزني أخد أجازة لحد ما أخلص المشروع مع أني أقدر أعمل الاتنين مع بعض
