سما من 1-10
وعدى اليوم ونور اتصل تاني بسما واطمن عليها وجه يوم الأربع وطول اليوم سما مبسوطة بس في اليوم دا نور ما أتصلش بسما خالص وهي قلقت بس رجعت قالت يمكن كان مشغول ولا حاجة وجه يوم الخميس )
سما وأبوها وأمها ونسمه صاحبتها قاعدين مستنين نور وابوه بس ماحدش جه
عادل / يعني مافيش حد جه يا سما لا نور ولا أبوه
نسمه / الغايب حجته معاه يا عمي زمنهم جايين
سلوى أم سما / إنتي متأكدة أن هو قالك أنه جاي النهاردة
سما / أيوة يا ماما متأكدة أنا قلقانة عليه أوي ليكون جراله حاجة لأن من أمبارح موبايله مقفول
عادل / ماتقلقيش يا حبيبتي ان شاء الله خير
( وفضل التوتر والقلق موجودين لحد الساعة 12 باليل وماحدش جه خالص ولا نور أتصل والكل دخل نام ونسمه رجعت بيتها وكلهم فعلا قلقانين على نور لأنهم عارفين أنه بيتمني اليوم دا من زمان أوي وسما قررت أنها الصبح هتروح الشركة تسأل علي نور مع أنه مانعها قبل كدة ماتروحش الشركة ابدا وأول ما طلع النهار سما لبست هدومها بس قبل ما تخرج تليفونها رن وكان دا أتصال من نور )
سما / نور حبيبي انت فين وعامل ايه انت كويس جرالك حاجة فيك ايه يا عمري.
نور / أهدي يا سما واسمعيني الأول
سما / أسفة يا حبيبي أتكلم أنا سمعاك
نور / اجهزي وانزلي أنا واقف تحت بيتكوا
سما / طيب واقف تحت ليه ما تطلع
نور / سما اسمعي الكلام بقى واخلصي أنزلي ( وقفل نور التليفون من قبل ما سما ترد عليه وفعلا سما نزلتله وركبت العربية وأول ما شفته في العربية كانت هتموت وتحضنه بس قالت لما نروح المكان اللي بنتكلم فيه هحضنه ماهو خلاص كلها يومين وهيبقي جوزي وأول ما وصلوا ونزلوا من العربية )
سما حضنت نور جامد وهي بتقوله :- حبيبي وحشتني اوى اوى انت ماتعرفش انا قلقت عليك اد ايه امبارح لما ماجتش
( سما حضناه جامد بس لاحظت أن هو مش حاضنها وأن ايديه جنبه مالفهاش حولين ظهرها)
سما / نور حبيبي مالك أنت فيك حاجة
نور / لأ مافيش أنا بس عايز أتكلم معاكي شوية
سما / أتكلم يا حبيبي سمعاك قول كل اللي انت عايز تقوله
نور / سما أحنا لازم نسيب بعض وكل اللي بينا لازم ينتهي
سما / نور بطل بقى بالله عليك أنا مش حمل مقالب وهزار
نور / سما أنا مابهزرش أحنا ما ننفعش لبعض أفهمي بقي
سما / نور أنت عارف انت بتقول ايه نور علي فكرة لو ما بطلتش دلوقتي أنا هسيبك وامشي
