قصة روعة 1
– انت عارف انا سخنت لك الاكل ده
واستنيتك كام مره؟
= بسم الله الرحمن الرحيم طب قولي ازيك عامل ايه!
– عارف رنيت عليك كام مره اشوفك جاي ولا لاء؟
وانت كالعادة مردتش!!
= فيه ايه يا ليلى هو انتي فيكي حيل نتخانق انهارده كمان؟ مش كفاية الخمسين خناقة بتوع قبل كدا؟ انتي بتعملي تارجت ياحببتي
– انت شايف ده عادي!! الى احنا فيه ده؟؟ عادي!
= الى هو ايه؟؟ الموبايل كان سايلنت و نسيت افتحه اعملك ايه؟ مبقاش اشتغل بعد كده واقعد جمبك؟
– لا تسبني طول اليوم قاعده معرفش انت فين
و مش بترد عليا معندكش اي تلت دقايق حتي ترد فيهم
= يعني هكون فين اتحْطفت !!
ماهو يا اما في الشغل يا اما
قاطعته بنرفزه: يا اما سايبني وقاعد مع صحابك على القهوه صح؟؟ انا حقيقي مش مصدقه البرود
الى انت فيه ده يا محمد!
= برود !!!!
– ايوه برود!!! انت مبقتش حاسس بيا!! مبقتش عاوزني مش بتقعد معايا!!؟ مش فاهمه بتعمل فيا كده ليه!!!
= انا الى مش قادر افهم انتي ازاي مش بتزهقي من الزن ده وكل يوم نفس السيناريو.. انا مش هقعدلك في البيت 24 ساعه يعني !
– انا مقلتش كده !
= امال قولتي ايه؟؟ كل شوية انت فين مع مين هتيجي امتى انت اتأخرت..!
– مانا مسبتش شغلي مع بابا عشان اقعد اكلم نفسي في البيت انا كنت عايزه نقعد مع بعض!! ونسمع بعض
مسح على وشه بزهق: ارجعي شغلك يا ليلى ايه رأيك؟ طالما هتريحيني وتشوفي حاجه تشغلك عشان انتي مش لاقيه حاجه تعمليها فا بتتخانقي وانا زهقت
بصتله بسخريه وضحكت: مش لاقيه حاجه اعملها؟
معلش بقا.. معنديش عيال ست فاضية
– انتي حتي لو حصل و خلفتي هتفضلي كده
” بصتله بصدمه من جملته الى رماها
عيوني اتملت بالدموع بسرعه وانا مش عارفه ارد”
= حتي لو ؟؟ تقصد ايه؟
يعني ايه حتي لو؟
” مكُنتش مصدقه ابدًا انه قالي كده… ”
– أ.. أنا مش قصدي كده
” سيبته ودخلت اوضتنا وقفلت الباب ”
وقف ورا الباب: ليلى.. طب افتحي نتكلم براحة..
انا مقصدش حاجه وانتي عارفة !! تؤ.. يا ليلى ؟؟
” كنت قاعده عماله افكر في التحاليل وكل حاجه عملتها.. عماله افكر ازاي اتحول معايا بالطريقة دي! ازاي بقا قاسي .. هو ازاي اصلا قدر يقسي عليا انا؟”
” استنيت لحد ما بطل يتكلم.. وعدي وقت واتأكدت انه نايم.. كنت لميت شطنتي.. و خرجت بهدوء شديد من البيت الساعه واحده بليل.. ومشيت.. “
