اسماعيل موسي ج1
انا هتجوز يا فريده ،انا خلاص مبقتش طايق العيشه بالشكل دة ،صبرت كتير وكل يوم اقول حالتك تتحسن مفيش فايده
حاسس انى بموت بالبطيء.
هو انا قصرت معاك فى حاجه يا سالم؟ رغم مرضى البيت كل يوم بيبرق وبحاول البى طلباتك كلها لكن العيال خدمتهم صعبه ودماغى اليوم كله مش بتبطل زن ،تقصيرى غصب عنى ولو جوازك من واحده تانيه هيريحك اعمل إلى انت عايزه بس متقصرش مع أولادك انا مش عايزه منك حاجه.
مش هقصر يا ستى والى هيدخل هناك هيدخل منه هنا واكتر وكمان هعدل بينكم.
كنت مظبط كل حاجه، وبعد اسبوع كنت متجوز واحده تانيه بتشيلنى من على وش الأرض وتتمنالى الرضا
حسيت انى رجعت شباب مره تانيه وبقيت بعمل الحجات إلى اتحرمت منها، ااخرج اتفسح كل يوم ،العشا فى مطاعم بره
وكل شهرين تلاته أجازه حلوة تجدد شبابى وكنت بعدل بينهم لكن قلبى كان مايل لمراتى الجديده لقيت فيها إلى ملقتوش فى ام العيال إلى المرض هدها وكل همها العيال وطلباتهم
وشويه بشويه بقيت بقضى ايام اكتر فى بيت مراتى الجديده
والى كانت بتعمل كل حاجه عشان افضل جنبها، كنت عايش حلم جديد مش بصحى منه غير لما ارجع عن مراتى الأولى وسط زن العيال وطلباتهم إلى مش بتخلص ،كنت بقعد وانا مش طايق نفسى وعمال أصرخ فى كل إلى فى شى
ومع الوقت مبقتش طايق مراتى الأولى وبدأت اقارن بينها وبين مراتى الجديده لبسها، اناقتها ،اهتمامها بيا وكل حاجه كانت مختلفه، كنت بلبى طلبات مراتى الجديده ونفسى اجيبلها نجمه من السما، والمرتب إلى كان تلت تربعه لمراتى الأولى والعيال بقى معظمه لمراتى الجديده ،كنت بشتريلها دهب من ورا مراتى كل شهرين ولما مراتى الأولى كانت تطلب فلوس كنت اقول منين؟ مش معايا، وكل ما تكلمنى فى أحوال العيال والدروس كنت بصرخ فيها ،يعنى هيطلعو دكاتره دى عيشه بقت تقرف كل ما اجى عندك تصدعينى بالمصاريف وان المرتب مبقاش يكفى ؟ ابيع نفسى يعنى ؟
بس انا كنت بحوش الفلوس لانى مراتى الجديده كان نفسها فى عربيه عشان رجليها وجعتها من المشى وبدأت اقلل الفلوس إلى بديها لام العيال واطلب منها توفر لان الشغل براحته وكل يوم فيه خساير
وكملت تمن العربيه وكنت هعملها مفاجأه لمراتى الجديده واشتريها على العيد واخدتها معايا صالة عربيات نتفرج ونشوف إلى يعجبها، مراتى الاولى كلمتنى وقالت النهرده الوقفه ولسه مجبناش لبس العيد للعيال، مراتى الجديده سمعت المكالمه، قالت سيبك منها دى مش معاها كل ما تتصل غير عايزه فلوس وكان معاها حق ،قلتلها مفيش لبس عيد
مش معايا فلوس اقطع نفسى وقفلت السكه فى وشها وعملتلها بلوك
