جديدة
بصلها بغيظ ورد:
-بس انا مش هعدل, ولا هعاملك كويس, ومادام مصرة يبقى اتحملي اللي هعمله فيكِ.
ابتسمت بثقة وقالت:
-مش هتعمل حاجه يا يونس, انتَ بتخاف من ربنا, ولو اتجوزنا عمرك ما هتعاملني وحش, غير اني بنت عمك وعمرك ما هتأذيني.
صرخ فيها بغيظ:
-هو انتِ بتستغلي صفاتي الحلوة ضدي!
-لا انا بعرفك انك بتقولي كده عشان أخاف وارفض الجواز, بس انا فاهمه اللي بتعمله..
-يعني ده اخر كلام عندك؟
بصتله ببرود وردت:
– وما عنديش كلام غيره, اما لو انتَ بقى عندك كلام تاني يبقى مع ابوك وابويا, وبعدين عاوزه اقولك ان انا معنديش أي مشكله معاك, يعني مش رافضه اتجوزك خالص, بالعكس انتَ انسان كويس اعرفك من زمان واعرف اخلاقك وطباعك وابن عمي فيعني مش هلاقي احسن من كده.
وانتهى اللقاء بينهم على كده, ما طلعش منه بفايده لكن اتأكد انها مش هتفيده, بالعكس هي زيها زيهم عاوزه الجوازه دي.
افتكر انه بعدها بكام يوم لما وصل خلاص انه فعلا مش هيعرف يهرب من الجوازه دي, وقتها قرر انه يعمل محاوله اخيره بالكلام معاها:
– تمام احنا اتكلمنا اخر مره وانتَ قلت انك ماعندكيش مشكله اتجوزك وانا متجوز واحده تانيه, معندكيش مشكله اصلا في أي حاجه, فانا كنت عاوز احط النقط على الحروف عشان نبقى واضحين مع بعض.
– تمام قول اللي عندك واللي مبدئيا انا موافقه عليه.
– مش تسمعي الاول يمكن كلامي ميعجبكيش.
– لا لا ما تقلقش انا معنديش مشكله بأي حاجه, لان اكيد عارفه ان اللي هتقوله يخص مراتك مش كده؟ أو يخص علاقتنا ببعض بعد كده.
– بالضبط, اولاً مراتي مش هتعرف حاجة عن الجوازة دي, ولو حاولت في يوم من الايام توصلي لها جوازنا في نفس اليوم ورقة طلاقك هتكون عندك, تاني حاجة ما تستنيش مني اكتر من اللي انا هديهولك, ما تحاوليش في يوم تقارني نفسك باللي بعمله مع روز, ولا تجيبي سيرتها في جملة مفيدة ما بينا, انا بحب روز وقلبي معاها, فمهما حاولتي انك تلعبي على النقطة دي مش هتوصل لحاجة, اغلب وقتي هبقى في القاهره فمش عاوز زن ولا تقوليلي انزل امتى ولا مانزلش, وأي شكوى منك لاهلي هتكبر الموضوع بينا اكبر بكتير, عشان النقطه دي بتنرفزني, مدام قبلتي اننا نتجوز وانا على وضعي ده, فتمام اقبلي للآخر بقى.
وكان ردها ابتسامه بسيطه وكأن كل اللي قاله ماقصرش فيها ولا فرق معاها:
