نرمين من 7-12
مراد: مش مهم كده كده لازم نفتح المكتب، خليها تيجي منه. وطلع جري علي اهله…. علي: آه على الحب و عمايله. أعمل انا إيه؟ اتصل بأمي. كلم رحمه الي كانت طايرة من الفرح، وكلمت المعلم بلغته وطلبت منه مايقولش حاجه لنوال. رغم استغرابه بس كان مبسوط لبنته. رحمه بلغت الشغالات إن في ضيوف جايين و بعتت جابت جاتوهات و حلويات. نوال حست في حاجه ونزلت عند رحمه. رحمه بلغت الشغالات مايتكلموش وفتحت ليها الباب. نوال: في إيه يا رحمه ؟
رحمه : قولي سلام عليكم الأول. نوال : سلام عليكم. رحمه : وعليكم السلام. نوال: انتوا عندكم حاجه؟ انا شفت الولا بتاع الحلويات مطلع كراتين رحمه : آه، ضيوف علي معزومين عندنا. نوال : ضيوف مين؟ رحمه: نوال انا مش فاضيه، هو كلمني قالي هو جاي ومعاه ضيوف. نوال: وفرح فين؟؟ رحمه: فرح في شغلها. نوال: آه طيب، اطلع البس انا وجهز نفسي استقبل معاك الضيوف. رحمه : مالوش لزوم خليك في شقتك. نوال: نعم نعم ليه ؟ مش انا كمان مرات المعلم وضيوفه ضيوفي ؟!؟
رحمه: بس دول ضيوف علي مش المعلم. نوال انا مصدعه وعايزه اخش اريح شويه قبل ما الجماعه توصل. دخلت أوضتها وسابتها. نوال راحت المطبخ. نوال : بت يا مسعده قوليلي مين اللي جاي ؟؟ مسعده: مش عارفه يا ستي، كنا قاعدين في المطبخ بنعمل الاكل، واتصل علي بيه وقال إنه عنده ضيوف والحاجه قالتله جيبهم هنا. نوال : بس دا الي سمعتيه؟ انطقي وانا هازبطك. دخلت رحمه… رحمه: مسعده شوفي شغلك. هو انت يا نوال مش هاتستريحي ولا تريحي؟ اي شغاله تعمليها جاسوسه عندك تطلع ليك اسرار بيتي؟
نوال : انا يا رحمه؟ حرام عليك ظلمتيني. رحمه : كنت بتسألي مسعده ليه؟ مش انا جاوبتك؟ نوال: خلاص يا رحمه، انا طالعه شقتي. وراحت نوال واتصلت بالمعلم. المعلم : أيوه؟ نوال: يرضيك يا معلم رحمه تطردني من شقتها؟ ومش عايزاني استقبل الضيوف معاها؟ بتستعر مني. المعلم : اللهم طولك يا روح. يا وليه اهمدي كده واهدي، هو انت ما بتخلصيش من المشاكل؟ مش سايبه حد في حاله، اعملي زي ضرايرك واقفلي بابك احسن لك. انا مش فاضي لكلام النسوان دا، وحسك عينك المحك تحت عند رحمة انت وعيالك. يلا اقفلي.
قفل معاها… المعلم: إيه القرف دا؟ الوليه مش بتتهد خالص. ونده على عم محمد… عم محمد : خير يا معلم في حاجه ؟ المعلم : اقعد عايز اتكلم معاك. عم محمد: من عيني. وقعدوا يتكلموا… طلع عم محمد من الوكاله وهو هم الدنيا كله عليه. لدرجه كان هايقع بره. قعد على الأرض و الي شغالين في الوكاله سندوه لحد بيته. خبط الباب. فاطمه فتحت الباب. فاطمه : يا مصېبتي مالك ؟؟ عم محمد : اسنديني على اوضتي يا فاطمه.
