تفك النحس 3الاخير
حسيت إني عايزه أعيط لكن أخدت نفس عميق لأني سمعت خطوات كريم بيقرب من الأوضه وقف قدامي وقال بضيق: – حازم ومراته بره! – هنعمل ايه؟! – هنقدم ضيافه عادي… بصلي من فوق لتحت وقال: – اخلعي الإسدال ده والبسي حاجه غامقه… وطولي الطرحه و… نفخ كريم بضيق وقال: – متتأخريش عليا… نفذت اللي قاله وأنا متوتره جدًا، وأيدي بتترعش… كريم دخل المطبخ يجهز فاكهه وعصير ولما دخلت المطبخ بص لهدومي الأول وقال: – شيلي الفاكهه وأنا هشيل العصير…
حاولت أتمالك أعصابي وأشيل الصينيه لكنه لاحظ رعشة ايدي… خرجنا سوا قال كريم بابتسامة صغيره: – نورتونا… ابتسم حازم وكان باصص للأرض مبصش ناحيتي خالص وسلمت على أسماء وقلت: – ازيك يا حازم؟ رد من غير ما يبصلي: – الحمد لله إزيك يا عروسه؟ قعدت جنب كريم وبعد شوية صمت قال حازم: – سامحونا بقا لو جينا من غير ميعاد! بس كنت عايز أعتذرلك يا كريم على تصرفي معاك… وأقولك إني والله ما ساكت ولو أختي السبب هجيبلكوا حقكوا منها… ونجمه برده أختي الصغيره وأنا مرضلهاش اللي حصل ده!
حازم كان بيأكد بنبرة صوته على إني أخته، فابتسمت… حمحم كريم وقال: – عادي يا حازم كله بقا عادي… وحقنا عند ربنا قبل أي حاجه… قرب حازم من كريم وقال: – طيب أنا كنت عايز أتكلم معاك لوحدنا… وقف كريم وقال: – تعالى نقعد في البلكونه… خرجوا البلكونه، وقعدت مع أسماء ولما ملقتش حاجه أقولها، قلت: – آآ… تعالي أفرجك على الشقه؟! – ماشي يلا… فرجتها على الشقه ودخلنا المطبخ، أديتها جاتوه، فقالت: – لا لا مش هقدر والله أصل أنا حامل جديد وبحاول أظبط أكلي…
اتصدمت شويه لكن ابتسمت وقلت: – بجد! مبارك ربنا يكملك على خير يارب… – عقبالك يا قلبي… قلت: – ان شاء الله… كنت مستغربه صدمتي! أو يمكن غيرتي! كنت متوقعه ايه يعني إن حازم بيعامل مراته زي ما أنا بعامل كريم! الظاهر إني تعبانه في دماغي، هو بيعتبرني أخته! اومال ليه قلبي مش مقتنع!!
مر الوقت ومن لما مشيوا وأنا عايزه أعيط ومخنوقه، قلت في نفسي أسماء شخصيه محترمه جدًا وتستاهل كل خير وحازم كمان، لكن أنا اللي مش محترمه عشان بفكر في واحد مش جوزي! بعد كل الفتره دي لسه في مشاعر صاحيه في قلبي! قعدت استغفر ربنا كتير لحد ما قعد كريم قصادي وقال: – حازم قعد يعتذرلي عشان الصوره اللي شروق صورتها ويحلف ويتحالف إنه ملهوش علاقه بالفيديوهات دي وقالي إنه مش ساكت وهيعرف مين اللي عمل كده ولو أخته هيجيبلك حقك منها…
