عمر 2
عمر وهو يتجاهل كلماتها: ها قوليلي بقى أجيب اهلي وأجي امتى عشان اخطبك رسمي؟
ندى: يا عمر خطوبة ايه دلوقتي
عمر: ولا احدد المعاد مع باباكي احسن؟
ندى: يوو يا عمر انا بكلمك في ايه وانت بتقول ايه
عمر وهو ينهض واقفا: طيب انا هخرج احدد المعاد مع باباكي
ثم التفت اليها واردف: على فكرة هتوحشيني لحد مأشوفك المرة الجايه
ثم خرج لوالدها
عمر: طيب يا عمي احنا ماشيين بقى بس قبل مأمشي كنت عايز معاد عشان اجيب اهلي واجي نتقدم رسمي ان شاء الله
حسين: معاد كدة مرة واحده .. طب اديني فرصه اعرف رأي ندى الاول.
عمر: يا عمي انا مش عايز غير معاد وبعدين رأي ندى حضرتك تقدر تعرفه بعد اما امشي
حسين: طب ادينا فرصه حتى نفكر !
عمر: تقدر تفكر لحد مانيجي المرة الجايه ان شاء الله
صمت ممزوج بزهول
عمر: طب يوم الخميس الجاي كويس؟؟
مازال الصمت يعم المكان
عمر: يبقى كويس ، ان شاء الله يوم الخميس نبقى عندكوا
يوسف بزهول: ياابني اصبر انت اتهبلت ولا ايه!!؟
عمر وهو يسحب يوسف للخارج: طيب عن اذنكم احنا بقى ..على معادنا ان شاء الله….يلا يا يوسف
……………………….
بسيارة عمر وجانبه يوسف
يوسف: انت مجنون ياابني انت..ابوها يقول عليك ايه دلوقتي؟!
عمر بهدوء: مش مهم ..المهم اني اثبت لها اني مبقولش كلام وخلاص واني فعلا اعمل اي حاجة علشانها.
يوسف: ايوا بس مش كدة كل حاجه بالاصول بردو
عمر: وانا معملتش حاجه تخالف الاصول انا بس كان لازم اعمل كدة عشان اعرفهم اني عايزها رغم اي حاجه
……………………….
تجلس ندى بغرفتها تفكر بما حدث اليوم
حسين وهو يدخل الغرفه: نمتي يا ندى؟
ندى وهي تعتدل جالسه: لا يا بابا انا صاحيه ..اتفضل
حسين وهو يجلس بجانبها على الفراش: عايز اعرف رأيك في اللي حصل النهاردة…يعني بعد ما مشيوا دخلتي اوضتك علطول.
ندى بحيره: مش عارفه يا بابا انا خايفه يكون بيعمل كدة دلوقتي بس ..بس مع الوقت يرجع يندم او يسبني …حضرتك شايف ايه ؟؟
حسين: الصراجه يا بنتي انا شايفه ملهوف عليكي وشكله كدة بيحبك بجد ، خايف ارفضه ابقى بضيع منك فرصه مش هتلاقيها تاني ..انا يا بنتي كل يوم بفكر فيكي لو انا جرالي حاجه هتعملي ايه من بعدي لواحدك وهتعيشي ازاي لواحدك في الدنيا كدة، وفي نفس الوقت خايف اوافق ابقى بوافق على اكبر وجع ليكي في حياتك .
