عمر 2

عمر: يا عمي لو سمحت بلاش طريقة الكلام دي ، ندى مش ناقصها حاجه عشان نتكلم عنها كدة، وبعدين انا قولت لحضرتك انا عارف كل حاجه ،، وهتجوز ندى ومش هتجوز حد غيرها

يوسف: ياعم حسين عمر فعلا عارف كل حاجه ومش عايز غير انه يتجوز ندى

حسين: طب واهلك كمان عارفين الكلام ده ؟

عمر: دي حاجه تخصني انا وندى وبس واهلي ملهمش حق يعرفوا اي حاجة..وبعدين محبش ان حد يبص لندى بصه متعجبهاش عشان كدة محدش هيعرف الكلام دة غيرنا

حسين: انا مش عارف اقولك ايه بس انا كنت عايز اهلك يبقوا عارفين عشان نبقى على نور

عمر بهدوء: عشان خاطري يا عمي بلاش نقف كتير عند حتت اهلي دي وبعدين انا قولتلك دي حاجه تخصني انا وندى وبس .

ندى وهي تقدم القهوة: اتفضلوا القهوة

حسين: تعالي يا ندى احضرينا يا بنتي ..مأنتي لازم تحضري الكلام ده

ندى وهي تجلس بجانب والدها:: خير يا بابا

حسين: الاستاذ عمر جاي يتقدملك رسمي

ندى بحزم: وانا قولتله رأيي قبل كدة يا بابا

عمر: ممكن بعد اذنك يا عمي اقعد انا وهي لواحدنا شويه

حسين وهو ينظر لندي: حقك بردو ..خودي يا ندى الاستاذ واقعدوا في الصالون اللي جوا

ندى وهي تهم واقفه: حاضر يا بابا….اتفضل

وبعد رحيل ندى وعمر

حسين: وانت عامل ايه يا يوسف ياابني مع خطيبتك هبه

يوسف ببتسامه واسعه : الحمد لله يا عمي…هبه بنت حلال والصراحه انا بحبها …اخلص بس تأسيس الشركه بتاعتي على خير ونتجوز علطول ان شاء الله

حسين: ربنا يوافقوا يا حبيبي
ثم اردف بتسأل: الا قولي يا يوسف انت تعرف صاحبك عمر من زمان ؟؟

يوسف بمرح: الا اعرفه دانا اعرفه من واحنا في ثانوي بس الكليه بقى الله يسامحها هي اللي فرقتنا هو اعلام وانا كنت تجارة.

حسين: اه ، وياترى ايه رأيك فيه بقى

……………………………

عند ندى وعمر بالصالون

لاحظ عمر صمتها وتوترها وهي تنظر للاسفل وتتحاشى النظر اليه فأردف قائلا: ندى ، ممكن افهم انتي رفضاني ليه؟؟

ندى وهي مازالت تنظر للاسفل: انت عارف كويس اني مش رفضاك انت ، انا رافضه انك تحط نفسك في موقف زي ده وكمان تكذب على اهلك عشان خاطري.

عمر: ندى..ممكن تبصيلي وانا بكلمك .

ندى بعد ان رفعت وجهها له: نعم

عمر: انا زهقت من الكلام بالطريقه دي ومش عارف اعمل ايه علشان اثبتلك اني مش عايز من الدنيا دي غيرك

ندى بتعقل: يا عمر فكر كويس هترجع تندم صدقني