عايزة اتطلق
-انتِ هتتجبي عليا؟ خلاص متبقيش تعمليلي حاجه تاني بدل المعايرة دي.
بصتله بصدمة وردت:
-انا بعاير؟ انا بوضحلك اللي غايب عنك, مبقاش طافحة الدم كل ده وانتَ تكسر بخاطري وتقلل مجهودي!
-مجهود؟ وانتِ عملتي ايه يعني؟
بصتله لثواني بصدمة حقيقية, عملت إيه؟ هو فعلاً مش عارف عملت إيه؟ تبقى مصيبة لو كل اللي عملته ولا شيء بالنسباله؟ تبقى مصيبة لو كل اللي عملته مش متشاف ولا محسوب ليها؟
-كل ده وعملت إيه؟ ده انا بقالي أسبوع مبلحقش ارتاح؟ ما بين اهتمام بنضافة البيت زيادة عن اللزوم عشان ميحصلكش أي عدوى جديدة, لاهتمام بالناس اللي بتيجي تزورك, باهتمام بأكلك وشربك حتى الهوا اللي بتتنفسه, ضابطه تليفوني على مواعيد ادويتك, قبل ما بتطلب الطلب بيكون اتنفذ, كل ده وتقولي مجهود إيه؟
-مبتعمليش حاجه جديدة, ده واجبك, طبيعي تعملي كل ده, ولا اروح اجيب الغريب يساعدني وياخد باله مني, ومراتي موجوده؟
هزت راسها بلأ وهي بتلم الاكل بانكسار حقيقي جوه روحها وحسرة على تعبها اللي مش متقدر:
-لا ده مش طبيعي, ولو ست غيري والله ما هتعمل ربعه, ستات كتير لما جوزها بيتعب بتعمل العادي والاقل من العادي كمان, مبتأيدش صوابعها العشرة له زي مانا عامله, لكن عشان مجربتش النوع ده مش حاسس باللي بعمله.
——————–
-بقولك امي تعبانه ومحتاجه اروح اقعد معاها كام يوم لحد ما تبقى كويسه!
رد ببرود وهو بيبص للتلفزيون:
-ومرات اخوكِ متخدمهاش ليه؟
-ومرات اخويا تخدمها ليه؟ انا أولى بأمي, هي مش مجبره تخدمها! بعدين مش هتعرف تعمل اللي انا هعمله, وطبيعي لما امي تتعب تلاقيني جنبها, اومال هي خلفت بنت ليه؟
-والبنت متجوزة ولها بيت وجوز ومسؤوليات, يبقى خدمتك مش واجب عليكِ.
-لا واجب, حتى لو مخلفة عيال, واجب… وانا مش هسيب امي في تعبها, انتَ إيه مشكلتك؟
بصلها بانفعال ورد:
-مشكلتي! مشكلتي اني ارجع بيتي الاقيه نضيف ومراتي محضرة طلباتي ومستنياني, مش تقولي اروح اقعد معاها كام يوم! وواجبات البيت ده مين يعملها؟
بصتله بذهول من كلامه وردت:
-ماجتش على الكام يوم دول؟ ده مش مكلمين أسبوع حتى! هعملك اكل وابقى سخنه بس, والهدوم سيبها في سبت الغسيل انا هبقى اجي اغسلهم وارتب الشقة.
ومن غير أي اهتمام رد:
-الوضع ده مينفعنيش, عاوزه تروحي ومصممة, روحي وارجعي المغرب.
