جديدة 1

-جاي ليه يا غالي؟ مراتك عارفه إنك هنا؟ قالتها "مروة" وهي واقفة على باب شقتها حتى مسمحتش له يدخل! بصلها بنظرة تعب وشوق في الوقت نفسه وقال: -مش هتدخليني طيب؟ وبعدين مانتِ كمان مراتي وطبيعي اجي هنا من غير اذن حد. وسعت عن الباب وسبقته لجوه في تصريح منها لدخوله, واتجهت للصالون وهي بتقول: -مش فكرة اذن, بس فكرة علم.. يا ترى هي عندها علم بوجودك؟ قعد على الكرسي وهي قدامه وقال: -هتفرق في إيه يا مروة؟ رجعت بضهرها لورا وهي بتقول: -هتفرق.. لإنك لو جاي بدون علمها يبقي خايف من رد فعلها لو عرفت إنك هنا, وانا مش هقبل تكون جايلي سرقة يا غالي. -انتِ واخده الموضوع بطريقة غلط هي مش من حقها تعرف انا جايلك ولا لأ, انتِ مراتي وليكِ حقوق عليا زيها تمام, ولا بعدي عنك كل الفترة دي نستك انا مين! هزت راسها بلأ, وقالت: -اكيد منستش, لكن كان بينا اتفاق من يوم ما اتجوزتها. -اتفاق ظالم يا مروة. ابتسمت باستهزاء مليان وجع: -وفعلك معايا مش ظلم؟ انا لولا ظروفي كنت اطلقت من زمان يا غالي, من اول ماقولتلي انك هتتجوز. اتنهد بتعب وهو بيقول: - تعبت يا مروه, سبع شهور عدوا وانتِ لسه مصممه على البعد؟ - وفيها ايه ما تتعب! ما انا كمان تعبانه من قبل السبع شهور كمان! بصلها بتعب وهو بيتمنى لو كل الخلافات اللي ما بينهم تنتهي وترجع الأمور زي ما كانت, لكنه عارف كويس إن دي امنية بعيدة قوي عن انها تتحقق, ابتسمت مروه بهدوء بعيد تماما عن كل اللي جواها وسألته: - قولي مرتاح في جوازتك؟ اتمنى تكون لقيت الراحة اللي ما كنتش لاقيها معايا. -انتِ عارفه كويس إني كنت مرتاح معاكي, ولأ يا مروة مش مرتاح, لو عدم احساسي بالراحة والوضع اللي انا فيه دلوقتي هيشفي غليلك فيا, فاطمني انا ما شفتش يوم واحد راحه من ساعه ما اتجوزت. بصتله وسرحت في حياتهم قبل السبع شهور, او تحديدًا قبل تسع شهور, قبل ما يفكر ويصارحها بأنه نوى يتجوز, واللي هيتجوزها مش غريبة بالعكس هي عارفاها كويس, تبقى أخت صاحبه, واللي وقع عليها الاختيار بعد رحلة بحث بينه وبين أهله عن عروسة مناسبة.. افتكرت كويس اليوم اللي جه يصارحها فيه بأنه قرر يتجوزها… - قول انك بتهزر يا غالي؟ تتجوزها ازاي يعني؟ هو انتَ مش قلتلي قبل كده انك عمرك ما هتعمل كده؟ مش انا سألتك كتير وانتَ قلتلي انك مش فارق معاكي الأولاد المهم اننا مع بعض؟ انا كان عندي استعداد اتقبل انك تتجوز وتشوف حياتك في الفترة اللي عرفنا فيها الحقيقه, في الفترة اللي عرفت فيها اني مضطره اشيل الرحم عشان الورم اللي صابني, وقتها انا كنت مستعده لأي قرار هتاخده, لكن انتَ اللي اديتني الأمل وعشمتني زيادة فإنك مش ناوي تاخد القرار ده, جاي دلوقتي وتقولي هتجوز؟ بعد ما خلاص بقيت عايشه حياتي طبيعي وشايفه انك عمرك ما هتكون لغيري! ماسك ايديها واتنهد بوجع وهو بيقول: - العمر بيجري يا مروة, انا فعلا قلتلك وقتها ان موضوع الاولاد ده مش فارق معايا, لكن كل ما العمر بيتقدم كل ما بحس اكتر اني محتاج لابن يكون ضهري وسندي في الدنيا, ما تتخيليش احساسي وانا شايف اولاد صحابي بيكبروا قدام عينيهم وبيعيشوا معاهم حاجات كتير انا كان نفسي اعيشها, مش محتاج اكلمك عن كلام اهلي واحساسي بوجعهم انهم كان نفسهم يشوفوا ابن وحفيد لابنهم الوحيد, ما بيفرقش معايا كلامهم قد ما بيفرق معايا نظرة الوجع اللي في عينيهم وهم بيقولولي ان كان نفسهم في حفيد يشيل اسم العيلة ويكملها من بعدنا, هم كمان عانوا كتير على ما قدروا انهم يجيبوني, وشايفين المأساة بتتكرر قدام عينهم من تاني ونفس الوجع بيعيشوه بس الفرق ان المرة دي ما فيش أمل غير في جوازي. - طب وانا؟ سالته وعينيها مليانه دموع, وبعدها قالت من بين وجعها: - انا مش عاوزه ابقى انانية, ومش عايزه اخد حقك منك, انا عارفه ان من حقك تتجوز, وعشان كده من 3 سنين لما عملت العمليه كنت سامحه لك بده, وكنت بتوجع اكتر كل ما بشوفك وبحس ان انا السبب في النقص اللي في حياتك, لكن دلوقتي حاسه اني ما عنديش استعداد للموضوع ده, يمكن عشان زي ما قلتلك كنت شلته من دماغي بعد ما انتَ رفضت كذا مره واكدتلي انك عمرك ما هتفكر فيه. - وانا غصب عني رجعت افكر فيه, ورجعت احس مع كل ما الوقت يمر ان احتياجي لعيل بيزيد, الفترة اللي فاتت كنت عصبي فيها معظم الوقت وانتِ كنتِ بتشتكي من نرفزتي في كل حاجة حتى لو تافهه, الموضوع ما كانش له علاقة لا بالمشكله اللي بتحصل ولا بظروف الحياة, لكن كنت مضغوط نفسيا بسبب الموضوع ده, بسبب انه دايما بيلح في دماغي وإني فعلا حاسس اني مش قادر اكمل طبيعي واعمل نفسي شلت الموضوع من دماغي, وبفكر انا دلوقتي 35 سنه كل ما العمر بيعدي كل ما الموضوع بيتعقد والفرص بتقل, وانا عاوز الحق اربي ابني لو كان مكتوب انه ييجي, مش هروح اخلفه وانا عندي 40 ولا 45 سنه وما الحقش اكبره واربيه على ايدي. - انتَ باين عليك قررت وجاي بس تعرفني قرارك مش بتاخد رأيي. قالتها وهي بتبص بعيد عنه بتحاول تتمالك نفسها من نوبة العياط اللي بتلح عليها في الوقت ده, فلف وشها له وهو بيقول: - انتِ رافضه؟ سكتت لفترة طويلة بتحاول توزن الأمور جواها, والحقيقة ان رفضها هيبقى انانية وظلم له وده خلاها ترد بعد فترة وهي بتسكت كل الأصوات اللي بتتزاحم جوه دماغها: - لا مش رافضه… انا ما اقدرش احرمك من حقك, بس طب وانا؟ انتَ عارف اني… سكتت شويه بتتماسك وبعدها كملت: - اني ما ليش حد غيرك, اخويا مسافر بره وهو آخر حد فاضلي من العيلة و انتَ عارفه وعارف لو طلبت منه حاجه عمره ما يعملهالي ولو…. قاطعها وهو بيقول: - هو انتِ ليه بتتكلمي كأننا هنسيب بعض؟ غصب عنها بصتله بلمعة أمل في عينيها, ان ما تكونش دي النهاية ما بينهم, فابتسم لها رغم وجعه عليها وعلى احساسها وقال: - انا شرطي الأول والأخير ان جوازي منك مش هينتهي, وان اللي هتجوزها دي تقبل بوجودك في حياتي. - انتَ اخترت حد؟ سؤال يموت من الوجع, وده بان على عينيها وملامحها, لكني مضطر يجاوب لان الموضوع انه يخبي او يأخر: - سما اخت صالح صاحبي. ابتسمت بكسرة وهي بتقول: - عشان سما لها تجربة قبل كده في الجواز وكانت حامل, يعني حد مضمون. - مش عشان كده بس, لكن هي حد نعرفه ونعرف اهله واخلاقها, على فكره ماما هي اللي لفتت انتباهي ليها, عشان ما تفكريش انها زغللت عيني في يوم, انا عمري ما بصيت لها ولا فكرت فيها بالطريقة دي. - مش فارقه.. مبقتش فارقه يا غالي, ربنا يوفقك. لكن الظلم اللي بتتكلم عنه اللي اتعرضت له بعد كده, كان بعد جواز غالي وسما بيومين, لما عرفت بالصدفة من حماتها إن كان شرط من شروط سما للجواز ان غالي يروح لمروة يومين بس في الشهر, وان أي مناسبة هيكونوا مدعوين ليها هتبقى سما هي اللي معاها, وانها لو حملت او خلفت ممنوع أنه يروح بإبنه او بنته عند مروة ويفضل الطفل معاها لفترة طويلة, غير طبعا اشتراطها انها تسكن في مكان بعيد عن البيت اللي فيه مروة والعيلة, وقتها حست بالظلم لأن رغم كل ده غالي وافق! ورغم إن الشروط مجحفة في حقها لكنه قبل! ولما واجهته بعد الجواز بشهرين ودي كانت أول مره تشوفوا فيها كان رده عليها مستفز ليها اكتر. - يا مروة انا كنت بمشي الدنيا, وبعدين هي شايفه ان الشروط اللي حطاها دي هتضمن حقها وتطمن انها مش بعد ما تخلف الطفل اللي انا عاوزه اطلقها و ابقى معاكي انتِ بس. -وقبلت؟ قبلت رغم انك عارف ان الشروط دي فيها ظلم ليا؟ مقدرش يرفع عينه ويبصلها وسكت ماكانش لاقي رد على سؤالها, هزت راسها وهي مش مصدقه انه فعلا قبل بكل شروطها عشان بس تقبل وتمم الجوازه, وده خلاها تسأله بوجع: - ولو كان شرط من شروطها انك تطلقني كنت هتعمل ده؟ -ولو كان شرط من شروطها انك تطلقني كنت هتعمل ده؟ بصلها بتردد للحظات, ولأنها عارفاه وعاشرته سنين طويلة فابتسمت وهي بتقول باستهزاء: - يبقى طلبت منك ده… بلع ريقه وهو بيعترف: - هي طلبت بس انا ما قبلتش, فتنازلت عن الشرط ده وقصاد ده انا كمان لازم اتنازل شويه عشان الأمور تمشي. شاورت على نفسها بعصبية وهي بتقول: - على حسابي انا صح؟ هي تتنازل وانتَ تتنازل على حسابي انا اللعبه اللي في النص اللي انتم بتقرروا حياتها هتمشي ازاي بناء على رغبتكم. حاول يهديها وهو بيرد من غير ما يحسب كلامه: - بصي يا مروة هو عموما انا مش همشي ورا الكلام اللي هي قالته, انا بس اصبر شويه لحد ما يعدي شويه وقت في الجوازه ووقتها… استنكرت رده وهي بتقاطعه بنفس الغضب: - ووقتها ايه؟ هتخلف بوعدك معاها! هو مش برضو الشروط اللي انتَ بتوافق عليها قبل الجواز دي بتكون مبنيه على كلمه هي خدتها من راجل, هترجع تقول لها ايه لا سوري انا كنت بقول أي كلام وبوافق عشان امشي المركب لحد ما نتجوز! طب انتَ فاكر لو عملت ده الأمور بينكم هتمشي عادي؟ مش هيحصل بينكم الف مشكلة ومشكلة؟ ما ردش وسكاته كان س/كينة بتدبحها, فنزلت دموعها واختنق صوتها وهي بتقوله: - لو عاوز تطلقني طلقني يا غالي وعيش حياتك من غير ما تبقى مجبر انك توازن بين اتنين وتختار حد على حساب حد. ورغم انها اكتر واحده هتتأذي من القرار ده, وانها بالفعل ملهاش مكان ولا حد يقدر يشيلها بعد ما تطلق منه, لكن جملتها دي كان ولا بد منها في الظرف ده, وهي بترد شويه من كرامتها اللي مهدورة, لقلة حيلتها وعجزها. قرب منها بلهفة ومسك ايدها وهي بيقول بصدق: - لا طبعا, انا عمري ما هفكر اعمل ده ولا عمرها هتخطر على بالي ولا هيبقى عندي رغبه في كده, انا بس مش عارف ارد عليكِ اقولك ايه, قلقان اقولك اللي انا فكرت فيه واللي في دماغي اظهر قدامك بصوره وحشه. بصتله بجمود وهي بتسحب ايديها: - لا قولي… صدقني صورتك مش هتكون اوحش من اللي ظاهر بيها قدامي دلوقتي, وانتَ بتقبل بشروطها وبتظلمني عشان حياتك تمشي. اتنهد ورد بحرج: - بصي هو انا لما قبلت الشروط دي كل اللي كان في دماغي ان بعد شهر او 2 من الجواز هبدأ واحده واحده احطها قدام الأمر الواقع, وافهمها انك لكي حقوق زي ما هي لها حقوق, وانك شخص مهم في حياتي مش مجرد واحده متجوزها ممكن اطلقها عادي او ابعد عنها, بس يعني اللي اخرني شويه في اني اخد الخطوة دي وخلاني طول الشهرين دول ما اقدرش اجيلك, اني عرفت… اني عرفت من اسبوع انها حامل, فبصراحه قلقت اتكلم معاها في الموضوع يأثر على نفسيتها وعلى الطفل. ياه على الوجع اللي حسته بيدب في قلبها في اللحظة دي, مهما حاولت توصف وجعها هتفشل, احساس بنقص وعجز وحلم حياتها بيتحقق قدام عينها لكن مش منها هي وهي مش طرف فيه, وحست للحظه ان الدنيا اسودت قدام عينها وان دي نقطة النهاية بينها وبين جوزها مهما حاولت ومهما هو حاول فخلاص الطفل اللي جاي هيقوي علاقته بسما وهيبعد بينهم اكتر, الصدمة خدتها لثواني ما قدرتش تدي فيها أي رد فعل, غير ان دموعها زادت وخنقت صوتها بقت اكبر وفي الاخر كانت بتقول: - مبروك يا غالي… بصلها بوجع وهو عارف كويس كلامه عمل فيها ايه، لكنه مغلوب على أمره، معندوش حل تاني، كان لازم تعرف منه احسن ما تعرف من الغريب، والموضوع مش هيستخبى، مقدرش حتى يرد مابركتها وهو بيبص في اتجاه معاكس ليها، عشان ميشوفش الوجع اللي مرسوم على وشها، وسكت... سكتت هي كمان للحظات بتحاول توزن كلامها وبعدين قالت: - بس انا هطلب منك طلب, زي ما هي طلبت منك ونفذت لها, نفذلي انا كمان. مسك ايديها تاني وقال بكل صدق واستعداد انه يعمل اللي هي عايزاه، وصوته فيه أمل ان يكون الخبر اللي قاله مأثرش على علاقتهم: - قولي عيني ليكي. بصتله باصرار وجمود وهي بتكتم وجعها جواها وصراخها: - ما تجيش هنا تاني, شوف حياتك وشوف ابنك اللي جاي واهتم بيهم انتَ مش مضطر تبقى بين نارين, أي حد مكانك خصوصا بعد حمل مراتك كان هيختار انه يطلقني, سواء انتَ مش عاوز تعمل ده عشان عارف ظروفي او عشان انا حد غالي عليك ففي الحالتين انا بشكرك على احساسك وموقفك ده, وبعفيك من أي حقوق تجاهي ومن أي حاجه ممكن تعمل مشاكل بينك وبين مراتك. وده كان نابع اكتر من الكلام اللي عرفته اللي كانت مراته مشترطاه عن لو حملت وولدت فمنوع ان الطفل يكون موجود عند مروة لفترة طويلة, والأكيد ان وجود طفل في حياتهم هيشده اكتر لبيته التاني, ففكرت انها تاخد الخطوة دي قبل ما هو ياخدها وساعتها هتبقى جت على كرامتها بزياده… رجعت من سرحانها في الفترة اللي فاتت, من وقت المقابلة دي ما بينهم وهو فعلا بِعد, لكنه حاول كذا مره انه يتواصل معاها, بس هي كانت بتقفل أي باب للتواصل وكان كلامها واضح لما قالتله في أخر المقابله وقتها " انا بس يعني لو ده مش هيسببلك مشاكل هستسمحك اني افضل في الشقه هنا وافضل على ذمتك عادي ومش هطلب منك أي حاجه تانيه ولا هطلب وجودك في حياتي حتى" وقد إيه الجملة دي على قد ما كانت صعب عليها وهي بتقولها, على قد ما دبحته وهو بيسمعها, ووقتها كان في حاله ذهول هل وصل بيهم الحال ان هي تبقى بتستعطفه عشان تقعد في شقته وتفضل على ذمته, وقتها للأسف هي ما سابتش له الفرصة انه يعلق على كلامها وطلبها, بس وافق وبعد.. ردد بنبرة ظهر فيها الوجع: -انتِ ليه كنتِ بترفضي أي وسيلة اتواصل معاكي بيها الفترة اللي فات؟ حتى كنت باجي هنا عشان اشوف اهلي كنتِ بتتعمدي انك تطلعي شقتك وتقفلي على نفسك عشان ما اشوفكيش. اخدت نفسها وبصتله بهدوء: - مش ده كان اتفاقنا! وانتَ احترمته وبعدت ونفذت الاتفاق. هز راسه بلا: - انا ما بعدتش عشان احترمت رأيك, ولا علشان اقتنعت بولا حرف من اللي قلتيه يومها, الاتفاق ده كان عبط منك مخدتش فرصتي وقتها اني ارد عليكي فيه, انا بعدت عشان الشهور اللي فاتت كان اسوء شهور عدت عليا, كنت شخص وحش قوي لو كنتِ شوفتيني وقتها او اتعاملتِ معايا كنتِ هتكرهيني…. بصتله باستفسار مش فاهمه حاجه من الالغاز اللي بيقولها, فضحك ضحكة وجع بانت عليه وقال: - اه اصل انا نسيت احكيلك الشهور اللي فاتت عدت ازاي عليا… وبدأ يحكي اللي حصل بينه وبين سما طول الفترة اللي فاتت… —-------- - يعني انتِ عايزه ايه دلوقتي؟ هو ما فيش يوم واحد بتعديه من غير خناق؟ حاطه ايديها في وسطها وهي بتبصله بتحدي كأنها بتقوله في النهاية برضو هاخد اللي عايزاه ومش هتنازل: يتبع.... #الجزء٢ لو كنتوا مكان مروة… بعد كل اللي حصل، كنتوا هتسامحوا غالي ولا تبعدوا عنه؟ ما فيش يوم واحد بتعديه من غير خناق؟ حاطه ايديها في وسطها وهي بتبصله بتحدي كأنها بتقوله في النهاية برضو هاخد اللي عايزاه ومش هتنازل: - انا قلت اللي انا عايزاه. - وانا قلت ما معيش دلوقتي, اصبري حتى لحد اخر الشهر, انتِ مش طالبه رقم صغير انتِ طالبه 5 الاف جنيه, ازاي يعني عاوزاني اديهملك دلوقتي حالا؟ - انا مليش فيه اول الشهر من اخره, بقولك عيد الام بعد بكره وانا واختي قررنا نشترك ونجيب لامي خاتم دهب, اروح اقولها ايه بقى اجلي الهديه لحد ما عيد الام يعدي اصلا؟ يبقى شكلي ايه قدام اختي لما اقولها اصل انا مش معايا دلوقتي؟ مظهرش انا قدامها مستوايا أقل منها! ,

مقالات ذات صلة

كاملة من 1-3

نورا ج1

كاملة رهيبة من 1-7

بعد 3ايام جواز حصري لصفحة روايات رولا

الفجر

معاكي حق 2

اترك تعليقاً إلغاء الرد