جديدة 2

اتعصب وهو بيرد عليها:
– وانا مالي ومال اختك, اختك ما شاء الله جوزها مهندس بترول وبيشتغل في شركة كويسة وبقاله سنين, مرتبه كويس يقدر يسد احتياجاتها, انا محاسب في شركة لسه بتبدأ مجالها, وبعدين انا ما قلتلكيش مش هديكي, انا بقولك اصبري لأخر الشهر انا مش معايا دلوقتي المبلغ ده! قولي لاختك تدفعه وسديه لها اخر الشهر, او شوفوا هدية تانيه بلاش حوار الدهب ده!

وسعت عينيها كأنه غلط فيها وهي بتقول بصوت عالي:
– ليه ان شاء الله امي أقل من اللي بيجولهم دهب؟ وبعدين انا مش هكلم اختي تدفعهم مكاني وشكلي يبقى وحش قدامها! مليش دعوه شوف حد استلفه منه وسده انتَ له اخر الشهر.

وقد كان وبعد مشاكل يومين كاملين اضطر في الآخر انه يستلف المبلغ من والده لحد ما يسده آخر الشهر, وفي الوقت ده كان بيفتكر مواقف لمروة في نفس الحالة ويمكن اصعب اللي بتتعلق بالماديات, افتكر كويس لما عدت بيه ازمه مالية وكان باقي على فرح اخوها قبل ما يسافر اسبوع واحد بس, وطبعا كانت محتاجه تشتري او تأجر لبس مناسب للمناسبة, لكن وقتها ظروفه ما كانتش تسمح وكان في مشكله ماديه فعلا ومش هتتحل غير بعد الفرح ده بأيام, وقتها هو حاول يتصرف عشان ما يحطهاش في موقف وحش, فكان ليه واحد صاحبه في الشغل استلف منه مبلغ بسيط عشان تاخده وتجيب اللي محتاجاه للمناسبه, لكن رد فعلها كان مخالف تماما للي بيتعرض له دلوقتي….
سألته من غير ما تاخد الفلوس:

– هو انتَ جبت الفلوس دي منين؟ انا عارفه كويس الظروف اللي بنمر بيها دلوقتي؟ يبقى ال 2000 جنيه دول جبتهم منين!

بص بعيد وهو بيرد بهدوء:
– اتصرفت فيهم يا مروه, ما انتِ اكيد يعني مش هتحضري فرح اخوكِ بلبس عادي, خديهم حاولي تمشي نفسك بيهم تأجري فستان تشتري حاجه يعني شوفي انتِ عاوزه تعملي ايه.

اصرت تعرف مصدر الفلوس وهي بتسأله:
– بقولك جبت الفلوس دي منين يا غالي؟

وتحت إصرارها اضطر يجاوب:
– اخدتهم من واحد صاحبي في الشغل وهديهم له لما المشكله بتاعتي في الشغل تتحل, ان شاء الله بعد فرح اخوكِ بكام يوم هتكون المشكلة اتحلت وعرفت اصرف المرتبين اللي متأخرين عليا في الشركة.

بصتله بزعل حقيقي وقالت:
– بس انا ما طلبتش منك حاجه.

ابتسم لها رغم همه وهو بيرد:
– ما كانش لازم تطلبي يا حبيبتي, انتِ ما عندكيش أي حاجه مناسبه تحضري بيها الفرح, وده اخوكِ مش حد غريب, ولازم تتشيكي ويبقى شكلك حلو وانتِ قمر كده.