جديدة 2

اتعصب وهو بيرد عليها: - وانا مالي ومال اختك, اختك ما شاء الله جوزها مهندس بترول وبيشتغل في شركة كويسة وبقاله سنين, مرتبه كويس يقدر يسد احتياجاتها, انا محاسب في شركة لسه بتبدأ مجالها, وبعدين انا ما قلتلكيش مش هديكي, انا بقولك اصبري لأخر الشهر انا مش معايا دلوقتي المبلغ ده! قولي لاختك تدفعه وسديه لها اخر الشهر, او شوفوا هدية تانيه بلاش حوار الدهب ده! وسعت عينيها كأنه غلط فيها وهي بتقول بصوت عالي: - ليه ان شاء الله امي أقل من اللي بيجولهم دهب؟ وبعدين انا مش هكلم اختي تدفعهم مكاني وشكلي يبقى وحش قدامها! مليش دعوه شوف حد استلفه منه وسده انتَ له اخر الشهر. وقد كان وبعد مشاكل يومين كاملين اضطر في الآخر انه يستلف المبلغ من والده لحد ما يسده آخر الشهر, وفي الوقت ده كان بيفتكر مواقف لمروة في نفس الحالة ويمكن اصعب اللي بتتعلق بالماديات, افتكر كويس لما عدت بيه ازمه مالية وكان باقي على فرح اخوها قبل ما يسافر اسبوع واحد بس, وطبعا كانت محتاجه تشتري او تأجر لبس مناسب للمناسبة, لكن وقتها ظروفه ما كانتش تسمح وكان في مشكله ماديه فعلا ومش هتتحل غير بعد الفرح ده بأيام, وقتها هو حاول يتصرف عشان ما يحطهاش في موقف وحش, فكان ليه واحد صاحبه في الشغل استلف منه مبلغ بسيط عشان تاخده وتجيب اللي محتاجاه للمناسبه, لكن رد فعلها كان مخالف تماما للي بيتعرض له دلوقتي…. سألته من غير ما تاخد الفلوس: - هو انتَ جبت الفلوس دي منين؟ انا عارفه كويس الظروف اللي بنمر بيها دلوقتي؟ يبقى ال 2000 جنيه دول جبتهم منين! بص بعيد وهو بيرد بهدوء: - اتصرفت فيهم يا مروه, ما انتِ اكيد يعني مش هتحضري فرح اخوكِ بلبس عادي, خديهم حاولي تمشي نفسك بيهم تأجري فستان تشتري حاجه يعني شوفي انتِ عاوزه تعملي ايه. اصرت تعرف مصدر الفلوس وهي بتسأله: - بقولك جبت الفلوس دي منين يا غالي؟ وتحت إصرارها اضطر يجاوب: - اخدتهم من واحد صاحبي في الشغل وهديهم له لما المشكله بتاعتي في الشغل تتحل, ان شاء الله بعد فرح اخوكِ بكام يوم هتكون المشكلة اتحلت وعرفت اصرف المرتبين اللي متأخرين عليا في الشركة. بصتله بزعل حقيقي وقالت: - بس انا ما طلبتش منك حاجه. ابتسم لها رغم همه وهو بيرد: - ما كانش لازم تطلبي يا حبيبتي, انتِ ما عندكيش أي حاجه مناسبه تحضري بيها الفرح, وده اخوكِ مش حد غريب, ولازم تتشيكي ويبقى شكلك حلو وانتِ قمر كده. ابتسمت وعنيها لمعت بامتنان وهي بتقوله: - وانا مش هقبل انك تستلف فلوس من حد وتحط نفسك في موقف وحش عشان اروح انا البس واتمنظر قدام الناس, واصلا اللي انتَ ما تعرفوش اني اتصرفت فعلا وجبت فستان هحضر بيه فرح. رفع حاجبه باستغراب: - ايوه جبتيه منين يعني؟ ابتسمت وهي بتمسك ايده و بترد: - ما انتَ عارف ان في واحده صاحبتي عندها اتيليه, رحتلها امبارح وشفت فستان عجبني وسعره مناسب واجرته منها وقلتلها على ميعاد هدفعلها فيه فلوس الفستان. ظهر الرفض واضح على وشه: -لا طبعا، ازاي تعملي كده من غير ما ترجعيلي، وانتِ كده ما حرجتيش نفسك قدام صاحبتك! هزت راسها بلا وقالت وهي بتميل على كتفه: - لا ما حرجتش نفسي, هي اصلا صاحبتي من زمان قوي ما انتَ عارف وعادي الأمور بيني وبينها ما فيهاش احراج بينا عشم, لكن اللي انتَ اخدت منه الفلوس ده مجرد زميلك في الشغل وهيبقى عينك في عينه كل يوم, ما تحسش نفسك انك مكسور قدامه عشان واخد منه فلوس ولسه ما رجعتهاش. وكان الفرق بينهم واضح, وكأن الأيام بتثبتله ان عمره ما هيلاقي حد يخاف عليه وعلى شكله و مصلحته زي مروة. —---------------- -يا بنتي بقولك تعبان, انا مش قادر اروح روحي انتِ. - يعني ايه مش قادر تروح؟ اخويا عازمك وانا مش هروح من غيرك اقولهم ايه يفكروا انك بتتهرب منهم. ضرب كف بكف بعصبية: - لا اله الا الله وانا هتهرب منهم ليه, انا علاقتي بيهم كويسه, ومش مديون لهم يعني عشان اتهرب منهم, بس انا فعلا تعبان انا بقالي يومين واخد اجازه من الشغل, عاوزاني انزل اروح فرح ومواصلات ساعه رايح وساعه راجع! وبعدين ده حياله فرح اخت مراته, انا مالي اروح ليه! وانا هكلمه واعرفه ظروفي وهو صاحبي اصلا وهيفهمني. عندت وهي بتقول: - وانا بقى مش هروح الفرح لوحدي, ما بقاش متجوزه وادخل الفرح بطولي, وبعدين ده احنا لسه جوازنا بقاله 3 شهور بس, الناس تقول عليا ايه لما تلاقيني رايحه وجوزي مش معايا؟ يقولوا بينا مشاكل! على صوته وهو بيرد: - هو انتِ مشكلتك مع الناس ولا مشكلتك مع اخوكِ انه هيزعل لو ما رحتش؟ رفعت صوابعها بسخرية: - مشكلتي مع الاتنين يا غالي, وانا مش رايحه الفرح من غيرك, وبعدين انتَ لازم تتعلم تقدر الناس اللي بتقدرك, هو عزمك يبقى تقدير له تروح الفرح. أصر على موقفه وهو شايف عدم اهتمام بيه او بحالته، ورد بعصبيه: - لا ما مش حبل مشنقه هو هتلفيه حوالين رقبتي, عادي الناس لما بتتعرض لظروف ممكن ما تروحش المكان اللي معزومين عليه, وبعدين انتِ المفروض يبقى عندك شويه احساس ودم وتحسي بيا, انتِ شايفاني كنت بموت اليومين اللي فاتوا ويا دوب لسه بشم نفسي. كان ردها بارد بدون اي اهتمام لما قالت: - والله انا شايفاك كويس وزي الفل, انتَ اللي بتدلع. بصلها بصدمه وهو فعلا مش مصدق رد فعلها, بيدلع؟ بعد يومين تعب جامد ومحاليل وادويه وكل ده كان على ايديها وفي الاخر تقوله بتدلع! واتكررت مواقف كتير مشابهه, ما بتهتمش فيها ابدا سما لظروفه او حالته اهم حاجه عندها شكلها قدام الناس وان اللي هي عاوزاه يتنفذ ويتم… —---------------- كان بيحكي مواقف زي دي لمروة وكمل وهو بيقول: - تعبت ما بقتش عارف اتعامل معاها… لو قعدت احكيلك قد ايه بحس البيت تقيل وكئيب وببقى مش عاوز ارجع من الشغل ولا اشوفها قدامي مش هتتخيلي الموضوع واصل لفين, عارفه يعني ايه تبقي قاعده مع واحده طول الوقت بتدور على اللي يهمها واللي هي عاوزاه وانتِ مش مهم, طول الوقت بتدور على اي حاجه تعمل مشاكل وتعمل خلافات, والمهم عندها مصلحتها هي وبس, حتى التفاهم معاها صعب, بتبقي بتكلميها في حاجه وهي دماغها في موال تاني خالص, لا عارف اتفاهم معاها ولا عارف اتعامل معاها بهدوء زي أي اتنين متجوزين, وبتعند قصادي في كل حاجه وعاوزه كلامها هي ورغبتها هي اللي تتعمل, وعاوزاني دايما مربوط جنبها مخرجش مع اصحابي ما اسهرش بره ما رحش مناسبه من غيرها, حاسس كأني دخلت قفص ما فيهوش منفذ اعرف اتنفس منه. كانت بتبصله وهي ساكته ما عندهاش أي تعليق على كلامه, لحد ما هو كمل: - لو لاحظتِ انا كنت باجي كتير قوي الايام اللي فاتت وبقضي نص اليوم تحت عند بابا, كان نفسي بس المحك واقعد اتكلم معاكي واشكيلك همي, انتِ قسيتي عليا قوي يا مروة لما قررتي تبعدي وتبني بينا الحواجز دي كلها, انا طول الوقت من اول ما اتجوزت وحاسس بهم فوق قلبي عشان مش قادر اشوفك ولا اتكلم معاكي ولا اسمع صوتك, بس كنت ساكت وبعدت عارفه ليه؟ عشان كنت بقول لو ده بالنسبه لكي عقاب ليا فانا قابل بيه, المهم يوم ما ارجعلك ونقرب تاني لبعض تبقي من جوه حاسه انك اخدتِ حقك مني, بس المدة طولت ولقيتك ما فيش أي مبادرة منك ولا بتردي على تليفوناتي ولا رسايلي, فمكانش قدامي حل غير اني اجي دلوقتي واتكلم معاكي. حاولت متظهرش تعاطفها معاه، ولا قليها اللي اتوجع على اللي عاشه الفترة اللي فاتت ونبرة الوجع اللي في صوته، وعنيه اللي مليانه حزن، حتى شكله اتغير وملاحظتش ده غير دلوقتي، اتجاهل كل ده وردت ببرود أصرت توصلهوله: - وبعدين؟ وبعد ما جيت واتكلمت مطلوب مني ايه؟ وسعت عينيها وهي بتسمع رده اللي متوقعتوش ابدا: - انا عاوز اطلق سما… يتبع #الجزء٣ إنتوا شايفين غالي كان لازم يطلق سما، ولا كان يستحمل عشان ابنه؟ #- انا عاوز اطلق سما… وسعت عينيها بصدمه وهي فعلا مش متوقعه ابدا انه يقولها حاجه زي دي, لكن ردت بذهول ورفض: - تطلقها؟ هي مش المفروض دلوقتي في الشهر الخامس باين! اتنهد ورد: - ايوه في اخر الخامس. سألته وهي على نفس صدمتها: - وابنك؟ هو انتَ كنت متجوز عشان تحمل وتطلقها؟ بصلها ورد بصدق: - ما كانش في نيتي اطلقها, بس انا مش هقدر اعيش معاها, مش هقدر… كل انسان له طاقه وانا طاقتي خلصت, على فكره انا اصلا بفكر اني اطلقها من رابع شهر ما بينا, بس كنت عمال اضغط على نفسي بقول لحد حتى ما ابني يتولد ويعيش معايا كام شهر او لحد ما يوعى شويه ويبقى عارف ابوه ويطلبني عشان يشوفني او يقعد معايا, لكن مش قادر والله.. انا حاسس انه الموضوع طول ما بينا اكتر من كده هينتهي ناهيه وحشه قوي. بصتله شويه وبعدين اتنهدت وقالت: - انا ما عنديش حاجه اقولها, وما ليش اني اقولك تعمل ايه, لكن لو عاوز وجهة نظري طلاقك ليها هيبقى غلط. سألها بوجع: _وجوازي منها مكانش غلط! استمراري معاها في حد ذاته غلط، انا مرداش لابني يعيش في بيت كله زعيق وخناق وشد وجذب، مرداش يعيش مشاكلنا كل يوم، الأحسن يعيش بينا منفصلين ولا اننا نعقده ولا صورتنا تتهز قدامه، انتِ متعرفيش سما لما بتتعصب بتخبط جامد، بتقول اي حاجه، من غير ما تراعي بتكلم مين ولا بتقول ايه، وانا مش هتحمل ابني يعيش ده في يوم من الايام. ذمت شفتها بعد اهتمام وردت: _والله انتَ حر.. دي حاجه مليش علاقه بيها، واصلا مش طبيعي تقعد قدامي وتحكهالي! ابتسم بوجع وهو بيقولها بلمعة عين وكأنه بيحن لايام عدت: _معلش بقي انتِ اللي عودتيني على كده... بصتله باستغراب ومفهمتش الجمله وسألته: _عودتك على ايه؟ -عودتيني احكيلك كل حاجه، واخد رأيك في كل حاجه.. واحسن ان من غير رأيك تايه، زي مانا دلوقتي كده. بصت بعيد عنه وهي بتحاول متتأثرش بكلامه ونظراته، فاتنهد بتعب وهو بيكمل: - عموما انا مش جاي اتكلم معاكي في قراري عنها, لكن جاي اتكلم معاكي عشانا احنا, عشان علاقتنا… مروة انتِ ليه لما قعدنا مع بعض اخر مره قلتيلي استسمحك تسيبني في الشقه و تسيبني على ذمتك؟ هو انتِ كنتِ شايفه الموضوع بينا وصل لكده؟ وكأننا اغراب؟ وكأني هطلعك من بيتي بالساهل؟ معقول اللي حصل واللي عملته شكك في حبي ليكي؟ وقد ايه انتِ مهمة عندي؟ رجعت تبصله ورفعت حاجبها باستهزاء: -حبك ليا! انا مبقتش واثقة انتَ حبتني اصلاً ولا لأ. وسعت عينيه وهو بيسألها بعتاب: -معقول؟ وعدم ثقتك دي أيه سببها؟ جوازي؟ سكتت شويه بعدين ردت: -لا مش جوازك بحد ذاته, لاني ممكن ابرره بحاجات كتير, وزي ما قولتلك هو في النهاية حقك, فمش ده السبب.. لكن قبولك شروطها وبُعدك شككني في حاجات كتير, ولازم تعرف لو كانت ظروفي غير كده مكنتش هكمل يا غالي. ضحك بوجع وهو بيقول: -عاوزه تقولي انك معايا عشان ظروفك بس! عشان محتاجه بيتي مش عشاني؟ بصت بعيد وهي بترد بعكس اللي في قلبها: -دي حقيقة, انا حتى فكرت في مشاريع كتير اقدر اعملها من البيت, عشان مش عايزاك تصرف عليا، وتوفرلي دخل اقدر في يوم من الايام أأجر شقه بره ومفضلش عاله على حد. رفع حواجبه بصدمة من كلامها, وهز راسه بيأس من تفكيرها: -واضح انك سخنة! وكلامك يزعل. بصتله بنظرات غضب وهي بتقوله: -هو انتَ مش مدرك اللي بيحصل؟ انتَ اتجوزت ومراتك حامل, الحكاية بينا انتهت يا غالي. وبعدين وقفت فجأة وهي بتنهي الكلام: -امشي لو سمحت. بصلها بسكوت شوية وقت وبعدين وقف وهو بيقول: -همشي.. بس هرجع تاني يا مروة الكلام مخلصش بينا. وقبل ما يوصل لباب الشفع كانت بتقول بصوت جامد: -لو رجعت بابي مش هيتفتح في وشك بلاش تقل من نفسك. وقف لحظات وضهره ليها بعدين لفلها بابتسامه وقال: _مش هحتاجك تفتحي بابك... هكسره وادخل. ومشي وقفلت الباب وراه وهي بتستند عليه وبتبدأ في العياط.. هو مستني منها ايه؟ مستني تقوله ان جوازه رغم انه حقه مفرقش! مستني تقوله ان موافقته على شروط سما حتى لو لها تبريرات عنده سهله عليها! هي متقدرش تقف وترفض جوازه لأنه حقه شرعا وقانونا, لكن تقدر تاخد موقف وده حقها... َياريتها تقدر تحفظ كرامتها وتمشي.. لكن وجعها الأكبر ان ملهاش حد يستقبلها لما الدنيا تضيق بيها... زاد عياطها وهي بتفتكر كلامها مع اخوها من يومين... هي في الاساس مكانتش ناويه تكلمه، عشان كانت عارفه انه مش هيكون سندها ولا ضهرها، بس لما الدنيا ضاقت بيها قالت يمكن...! _وانا اعمل ايه دلوقتي يا مروة، انتِ عارفه اني مش في مصر ومش هينفع ارجع. ردت َهي بتقترح عليه بحذر: -انا بقول يعني شقتك اللي هنا انتَ تقريبا مش محتاجها، لو اروح اقعد فيها على ما اشوف شغل يعني والأمور تمشي.. -شقتي! اه مانا نسيت اقولك، انا أجرتها بقالي ست شهور اهو، قولت استفيد منها بدل ما هي مقفوله كده. ردت بصدمه وكأنها حلمت حلم واتبخر قدام عينها: _أجرتها! وقبل ما تقترح اي اقتراح تاني يخص الشقه قال: _ايوه، حتى العقد سنتين.. يعني مش هينفع خالص اخرجهم منها دلوقتي. سكتت شويه بتفكر وبعدين قالت: _طيب شقة بابا.. هي اه بعيده اوي عن هنا، بس مش مشكله ممكن اروح اعيش فيها يعني مؤقتا.. اتلجلج وهو بيرد: -مانا بردو نسيت اقولك، صاحب الشقه كان عاوز يرفع الإيجار، تخيلي عاوز يخليه ٦ الاف في الشهر، على ايه! ده مكان ميت والواحد ميستنضفش يقعد فيه، فسبتهاله، خصوصا يعني اني مش موجود في مصر وعندي شقه تانيه فهعمل بيها ايه؟ نزلت دموعها وهي بتاعتبه: _بس انا قولتلك متسبهاش! قولتلك دي من ريحة أهلنا خليها ولو قررت متدفعش ايجارها عرفني وانا هدفع؟ _ مانا قولت انتِ امورك كويسه مع جوزك هتحتاجيها في ايه، وبعدين متكلمناش بقالنا كتير فلما كلمني قولتله مش عاوزها، حتى العفش وكده بتاعه، مانتِ عارفه كنا مأجرينها بعفشها. صرخت فيه بقهر: _عفش ايه وزفت ايه؟ وحاجة ابويا! هدومه وحاجته هو وأمي، راحوا فين؟ رد بتوتر: _مش عارف.. بصي اصل بصراحه انا كنت مشغول هنا ومش فاضي خالص للمواويل دي فمركزتش يعني. -مواويل!! الله يسامحك.. الله يسامحك ياخي. وقفلت معاه الخط وانهارت في العياط لدرجة انها يومها نامت في الصاله من غير ما تحس، وفضلت نايمه نص يوم، من الحزن والكآبة.. ووقتها اتأكدت ان ملجأها الوحيد بقي بيت غالي... ------------------ عدى 4 شهور كمان.. وفي ليلة سمعت صوت زغروطة وهي قاعدة في شقتها, مصدرها من شقة حماتها, فنزلت بعد ما لبست هدومها وسألتها باستغراب: -في إيه يا ماما بتزغرطي ليه؟ بهتت ملامح وشها وسكتت شوية وهي بتبص لجوزها وبتقول بلجلجه: -ها؟ لا.. ده.. ده... وبصتله وسكتت مقدرتش تقول حاجه, وهو بصلها بعتاب وكأنه بيقولها مش قولتلك بلاش!! -في ايه؟ سألتهم باصرار فاضطر حماها يرد: -اصل يا بنتي غالي بلغنا يعني ان مراته قامت بالسلامة. -ولدت؟ سألته وملامحها اصفرت كرد فعل على المفاجأة اللي خدتها, وبعدها دمعت عينيها وسكتت ملقتش كلام تقوله, فقربت منها حماتها وهي بتقولها: -انتِ زعلتي يا مروة؟ حقك عليا والله انا بس فرحتي خلتني ازغرط و... اتماسكت وهي بتطبطب على أيد حماتها: -انتِ بتقولي ايه بس! حقك تفرحي بحفيدك, ولا مش زعلانه اكيد, ربنا يباركله فيه ويتربى في عزه.. سماه ايه بقى؟ كانت بتحاول تبين لهم ان الموضوع طبيعي, وهم عارفين ده, لكن محبوش يضغطوا عليها فرد ابوه: -يزن.. اختفت ابتسامتها وهي بتبصله بصدمة, يزن! ده الاسم اللي كانت دايما تقول لغالي عليه ان لو ربنا كرمها بإبن هتسميه يزن! مقدرتش تصمد اكتر من كده, وطلعت تجري على شقتها..

مقالات ذات صلة

بعد عودته

زفافها 3

عمر ج2الاخير

رواية شيماء من1-5

الاعلان

مني من19للاخير

اترك تعليقاً إلغاء الرد