سما من 11-20
أبو نور / ها إيه رأيكم يا جماعة
أنس / والله يا عمي الرأي في الموضوع ده يخص سما هي اللي تقدر تقرر
أبو نور / طيب هي فين عروستنا
مديحة / تالين لو سمحتي نادي لسما من أوضتها
( الكل قاعد سلوى ومديحة وأنس حاسين بزهول ومحمد فحاسس بالندم أما نور حاسس بقلق وخوف ومش مصدق كل اللي بيحصل حواليه وبيقول لنفسه متعشمش نفسك إنت عارف إن سما مش هتكون ليك ) ‘
تالين دخلت الأوضة عند سما
تالين / سما يلا علشان الكل بيسأل عليكي
سما قاعدة سرحانة ومابتردش
تالين / سما سما
سما بصت لتالين بهدوء / إيه يا تالين
تالين / سما أنتي كويسة
سما / أيوة كويسة
تالين / طيب يلا أخرجي معايا علشان بيسئلوا عليكي برة
سما / طيب روحي وأنا جاية وراكي
( تالين مشيت وسما بصت لنفسها في المراية وخرجت بس حاسة إنها ضايعة حاسة إنها مش حاسة بحاجة أساسا وعقلها بيقولها خلاص إنتي قلبك مات )
دخلت سما الصالون
سما / سلام عليكم
الكل / وعليكم السلام ورحمة الله
أبو نور / إيه يا سما مش عايزة تقعدي معانا ولا إيه
سما وملامحها جامدة وببرود / ومش عايزة أقعد معاكوا ليه يعني دا أنتوا ضيوفنا
( نور بيبص لسما اللي من أول ما دخلت مابصتش حتى عليه ولو مجرد نظرة )
سلوى / سما أنتي عارفة نور وأبوه جايين ليه
سما بنفس برودها / وأنا هعرف أزاي يا ماما وأنا لسه جاية ولا حضرتك ما أخدتيش بالك وأنا داخلة
( الكل كان مستغرب من برودها ومن ملامح وشها اللي محدش قادر يفهم هي حزن ولا فرح ولا قلق ولا خوف كله حيران منها )
أبو نور / أحنا جايين علشان نطلب إيدك يا سما لنور
سما ماردتش عليه
أبو نور / ها إيه رأيك يا عروستنا
سما بصت بأتجاه نور وحطت عنيها في عنيه وقالت / إيه يا أستاذ نور ساكت ليه مش تتكلم وتقول حاجة
نور / عايزاني أقول إيه يا سما
سما / نعم هو إيه أصله دا أبوك بيقول إنه جاي يطلب إيدي لابنه أنت بقى جاي ليه
( الكل ساكت وكأنهم بيتفرجوا على مسلسل وأنس مستغرب جدا لأنه عمره ما شاف سما بالمنظر ده ومش قادر يحدد هو قوة ولا ضعف )
نور / أنا جاي أطلب إيدك يا سما وعايزك تكوني مراتي وشريكة حياتي
سما / وأنا مش موافقة
( هي قالت الكلمة دي والكل أتهز ليها ماعدا نور اللي كان متوقع الرد ده )
أبو نور / بس يا بنتي مش أنتوا بتحبوا بعض وأنا وضحتلك الموضوع
سما / وأنا بقول مش موافقة
