جديدة 2الاخير

-انتَ قصدك ان حسن بقي له ٣٠٪ من أسهم شركتك! طب دي كارثة، لو فعلا شكك في محله يبقى هو بيسعى انه يسحب منك الشركة واحده واحدة. وسعت عين شمس بصدمة وهي بتقول جملتها بعد ما سمعت كلام سيف عن شكوكه حوالين حسن، لما سألته: - تفتكر ليه حسن دخله شريكك؟ يعني ايه استفادته؟ - اللي عرفته بعد كده بشكل غير مباشر يعني, ان حسن كان خد نسبه من مكسب الشريك ده لما انضم لينا, يعني تقدري تقولي لعبها لعبت استثمار, هدخلك في شركه بنسبه 30% وانا ليا العمولة. - ايوه بس ليه؟ ما هو اصلا في الفترة دي كان هو اللي ماسك حسابات الشركة كلها كان يقدر يختلس اللي هو عاوزه من غير ما يبقى في عليه رقابة! -لا هو ما كانش يقدر يعمل كده, لأن مدير الحسابات اللي كان موجود من ايام بابا الله يرحمه كان مصحصح اوي له, وكان واقف له على الواحده في كل حاجه بتدخل وبتطلع من الشركة, واصلًا وقت موضوع الشريك ده هو استغل ان الراجل ده كان في اجازه مرضيه شهرين, وقتها حسن عمل ما بداله, سواء في موضوع الشريك او سواء حتى في لخبطة حسابات الشركة واخد منها زي ما هو عاوز, هو اصلا انا عندي شك في الموضوع ده. - شك ايه؟ بص قدامه بتنهيدة وهو بيقولها على شكوكه حوالين اخوه: - حاسس ان النسبة دي تخص حسن مش الراجل اللي هو جايبه, يعني ان الراجل ده مجرد وجهه وان النسبة دي في حقيقتها تخص حسن. وسعت عين شمس بصدمه وهي بتقول: - انتَ قصدك ان حسن دلوقتي بيمتلك 30% من أسهم الشركة! طب دي كارثة, لو فعلا شكك في محله يبقى هو بيسعى انه يسحب منك الشركة واحده واحدة. هز راسه بتأكيد على كلامها وقال: - اللي يأكدلي كده انه جه من فترة قريبة وعرض عليا شريك تاني عاوز يدخل معانا في الشركة بنسبه 25%. - يبقى اكيد هو فعلا بيعمل كده, هو بيحاول يسحب الشركة منك, شريك في التاني في التالت لحد ما تبقى الشركة كلها في النهاية بتاعته هو! لا يبقى انتَ كده لازم تبقى صاحيله اوي, اعتقد ان من هنا و رايح لازم انتَ اللي تتعامل مع عملاء الشركه بنفسك ما تصدرش حسن لهم. بصلها بتوتر ورفض للفكرة وقال: -انتِ بتقولي ايه بس يا شمس! ازاي عايزاني اقعد مع ناس واعمل اجتماعات, انتِ عارفه اني مش هقدر اعمل ده, انا اخري اشتغل من ورا الشاشة. -يا حبيبي وانتَ هتفضل عمرك كله تشتغل من ورا الشاشة؟ قالتها بزهق بان في صوتها, ولأنه بيحس بكل مشاعر اللي قدامه قدر يحس بزهقها, فسألها بقلق: -هو انتِ زهقتي مني؟ وعلى عكس المتوقع تماما كانت بترد بصوت باين فيه العصبية الغير مبررة في الموقف نفسه: - يوووه هو انا كلمتك! انا بقولك ان طريقتك دي غلط مش ينفع تستمر كتير, وبعدين الناس هيعملولك ايه يعني! مجرد اجتماع هتقعد تتكلم معاهم وتناقشهم في الشغل وبس! الناس مبتعضش يا سيف، دول بني ادمين زيهم زيك، فيهم ايه يخوفك منهم، ويخليك تداري من شوفتهم! الحياة مش هتستمر كده يعني! وزي ما ذكرنا قبل كده ان سيف دايما رد فعل للي قدامه, وطريقته بتبقى رد فعل لطريقة الشخص اللي بيتعامل معاه, وده اللي خلاه في اللحظه دي يبدأ ينفعل هو كمان: - وانا قلت مش هقعد مع حد, وما تتكلميش معايا بالطريقه دي. قال جملته الاخيرة بزعل هي ملاحظتوش في وسط انفعالها وغضبها, فردت بنفس الانفعال وصوتها عالي اكتر: - امال اتكلم معاك ازاي؟ ما دام انتَ مش عاوز تفهم اللي انا بقوله, هتفضل سايب كل حاجه لاخوك لحد ما يضيعك, النهارده بقاله حصة في شركتك بكره يبقى الشركة كلها بتاعته, تقدر تقولي ساعتها هتعمل إيه؟ هتنزل تشتغل؟ طبعًا لأ, يبقى هنشحت بقى! ولأول مرة من وقت جوازهم اللي عدى عليه سنة كاملة كان سيف بيتصرف بنفس الطريقه اللي كان فيها مع والدته, ففجأه لقت نوبة الغضب ظهرت عليه وبدأ صوته يعلى جدا وهو بيتحرك حركات عشوائية مش محسوبة, وأي حاجه بتيجي تحت ايده بيكون مصيرها يا الحيطه يا الأرض: -متكلمنيش كده… متعليش صوتك… اسكتي… اطلعي بره.. اطلعي بره... صرخت وهي بتتفادي الفازه اللي حدفها ناحيتها بقصد.. وفي اللحظة دي بس فاقت شمس من نوبة غضبها, واستوعبت طريقتها واللي هي عملته معاه, وكلامها اللي قالته وهي عارفه كويس جدا والدكاتره قالولها كذا مره ان أقل كلمه بتتقال في حق سيف سواء كان عتاب أو ذم تحسسه بعجزه وبمرضه بتأثر فيه جدا, وبتسبب جواه جرح كبير من الشخص اللي قالها. حاولت تقرب منه لكن كان الوضع صعب, وكأنه مبقاش شايفها اصلا هي اللي قدامه, فلجأت للحل التاني وهي انها تقرر تخرج من الاوضه لكن قبلها قالتله وصوتها كله صدق وندم: - انا اسفه… حقك عليا والله ما كنتش اقصد… انا اسفه يا سيف اهدى عشان خاطري… وخرجت وهي عارفه ان الجملة هتتردد في ودانه كذا مره لحد ما هيهدى تلقائي لوحده. —--------- عدى يومين من اخر مشكله حصلت ما بينهم, وسيف كان في حالة انعزال تام عنها, وأكتر حاجه وجعتها انها حاسه بنفسها ماشيه على نفس الطريق اللي دلوقتي كارهه زينب لأنها مشيت عليه, وحاسه ان مكانتها عند سيف بدأت تتذبذب بسبب الموقف الأخير اللي حصل ما بينهم, والحقيقة انها كانت مصدومة من نفسها, ومش عارفه هي ليه انفعلت عليه بالطريقة دي وقتها, رغم انها بتطلب منه حاجه هي عارفه انها صعبه جدا.. خبطت على باب الاوضة وهي بتقول: _سيف الأكل جاهز، مش هتخرج تاكل معايا؟ مسمعتش رد كالعادة، وطبعا قافل الباب من جوه بالمفتاح، ورغم انها معاها مفتاح تاني للاوضه لكن كانت سيباه اليومين اللي عدوا براحته لحد ما يخرج ويتعامل معاها من نفسه، لكن اكتر من كده مش هينفع تسيبه.. فجابت المفتاح وفتحت الباب ودخلت، شافته قاعد على مكتبه بيخلص شغله، وقدامه أكل معلب من التلاجه الصغيره الموجوده في الاوضه، قربت منه بتردد وهي بتقول بابتسامه حاولت تستميله فيها: _ايه يا سيف معقول زعلك وحش كده! انا بقالي يومين عايشه لوحدي وبحاول اكلمك مش راضي... انتظرت انه يرد او حتى يبصلها، لكن محصلش، فاتنهدت وهي بتقول: _طب مش هتطلع تاكل معايا، انا مبعرفش أكل لوحدي وبقالي يومين ماكلتش.. وسعت عينيها بصدمة لما خرج رد واحد منه: _اطلعي بره.. جسمها اتنفض من جمود نبرته، وحست بخطر، حست انها لو زودت معاه ممكن يحصل رد فعل متتوقعوش، لكنها حاولت وهي بتقول: _سيف انا اسفه ا.... لكنها سكتت تماما لما رفع عينه لها، ومن غير ما يتكلم شافت الشر فيهم، شافت نظره دبت الخوف في قلبها، فلقت نفسها بتنسحب لبره تلقائي وبتقفل الباب وراها وعرقها زين وشها من الخوف... حطت ايدها على قلبها وقالت برعب: _ايه النظره دي! هو معقول يكون كرهني! معقول مش هعرف اتعامل معاه تاني!! والاجابه كانت مرعبه اكتر ليها.... لأنها لو أه هتبقي نهاية حياتها معاه! ------ تاني يوم... كانت مستغربه انفعالها عليه يومها، ومشاعرها المتغيره طول الفتره اللي فاتت، لكن قدرت تعرف النهاردة بس سبب انفعالها وقتها, وعلى قد خوفها وتوترها من اللي جاي, على قد فرحتها باللي عرفته… ولأنها عارفه ان ما ينفعش هي تاخد الخطوة انها تتكلم معاه, فقررت تسيبله رساله تخليه هو يبادر بالكلام معاهم.. فبعتتله رساله على الواتساب فيها: "انا عارفه إني بالغت في رد فعلي معاك, واتماديت في انفعالي, والحقيقة اني ما كنتش عارفه انا ايه اللي حصلي وقتها, الموضوع ملوش أي علاقة بيك ولا بالحكاية اللي احنا كنا بنتكلم فيها, انا بس لاقيت نفسي فجأة مش طايقه حد مش طايقه اتكلم وجوايا طاقة غضب كبيره عاوزه اخرجها, وطلعت فيك… بس انا النهارده عرفت السبب, وعرفت ليه الأيام اللي فاتت على فترات كنت بحس بخنقه وبزهق … سيف أنا حامل" وبعد ما بعتت الرسالة كانت قاعدة على نار.. يتبع.... #الجزء٣ #ارفع صوتك وقولهم ان مراتك الحامل تعبانه وانك مضطر تنهي الحفله بسرعه عشان نروح للدكتور. والحقيقة انها قصدت بكده تخليه يواجه اكبر مخاوفه, وهو انه يتكلم قدام جمع من الناس ويبقى صوته مسموع… وده خلاه يبصلها بتردد كبير جدا مش قادر ياخد الخطوة, فرفعت كتفها بقلة حيله وهي بتقول: - القرار قرارك يا حبيبي.. يا كده يا تستنى بقى ساعتين او تلاته لحد الحفلة ما تخلص. والحقيقة انه مش قادر يستنى دقيقه كمان في الحالة دي, وفعلا خايف يصدر منه افعال تبقى خارج ارادته بسبب شدة الخنقه والاحساس اللي حاسس بيه, دلوقتي, لكنه بالفعل حاول وما اقدرش, وده خلاه يبصلها وعينه فيها دموع خنقه خفيفة وجعت قلبها عليه: -مش قادر… وقدام نبرة صوته واحساسه مقدرتش انها تكابر اكتر من كده لحاجه في مصلحته, فقررت هي تتصرف, و ده خلاها تتجه لحسن بنظراتها وتطلب منه انه يقرب لهم, واول ما عمل ده قالت: - يا ريت تبلغ الموجودين, ان سيف مسافر وعنده ميعاد طياره كمان نص ساعه مضطرين نخلص الحفله بدري, وخلص حوار التوقيعات. - طب ما تخلي البيه يقولهم الكلام ده بنفسه! قالها حسن بتحدي وهو فاهم الحكاية, فبصتله شمس بتحدي اكبر وبلؤم قالت: - مش عارفه ليه يا حسن بقالي كذا يوم كده يعني خير اللهم اجعله خير, احلم انكم بتلموا هدومكم وبتلموا حاجاتكم وبتطلعوا من البيت مش عارفه, تفتكر تفسير الحلم ده ايه؟ بصلها حسن بغضب لو خرج هيحرقها لكن اغتصب ابتسامه وهو بيقولها: - ماشي, تمام يا شمس هبلغهم, بس الحكايه ما اتقفلتش بينا على كده… وفعلا عمل اللي هي عايزاه, مال عليها سيف وهو بيسألها بقلق: - هو انتِ فعلا هتعملي كده؟ بصتله وابتسمت بابتسامه: - في مثل بيقولك خلي عدوك تحت عينك, انا عمري ما هطلعهم من البيت, لكن انا هعرف ازاي اتعامل معاهم واكسر شوكتهم… وبالمناسبة جلسات الدكتور هتبدأ من بكره. -انتِ عارفه انها مش هتجيب نتيجة؟ قالها بيأس, فمسكت كفه وهي بتقول: -حتى لو هتجيب نتيجة 1 في المية, احنا محتاجين ده, لو مش عشاني فعشان ابننا.. وعشان حقك اللي الديابة اللي عايش معاهم مستنيين فرصة وياكلوه, ولو مش حابب تروح انا مش فارق معايا, انا حباك كده وفي كل حالاتك عاجبني ومش شايفة غيرك. ورغم ان فعلا الدكتور بلغها ان الموضوع مش هيكون مجزي اوي, لكن التحسن البسيط في حالته هتكون محتاجاه.. وهي قادرة تواجه الكل عشانه.. ولأول مرة سيف يخرج عن صمته ويعترف بمشاعره ليها فقال: -شمس… انتِ ليه مكملة معايا؟ وليه متمسكه بيا؟ ابتسمت شمس وهي بتجاوب: -عشان عمري ما هقابل حد في طيبة قلبك ونقائك وبرائتك, وصدقك واخلاصك.. انتَ عامل زي القماش الأبيض اللي بيلمع تحت الشمس! مفيش حاجه لوثتك ولا تعرف لغدر البشر, ولولا اني شوفت كل ده فيك من اول يوم جوازنا مكنتش كملت.. لكن انتَ تستاهل يا سيف, تستاهل كل حاجه حلوة, انتَ كنز والغبي بس اللي ميقدروش. ووقتها عبر عن مشاعره لأول مرة: -شمس انا بحبك. ابتسمت ابتسامة واسعة جدًا وهي بترد بعين بتلمع: -وانا بحبك اوي يا سيف.. ويارب اكون الاختيار الصح ليك, زي ما كنت الاختيار الصح ليا. ---------- _أنا قررت مش هكمل. اتنهدت بتعب وهي بتلمس بطنها البارزه في شهر حملها الأخير وردت: _ليه بس هو الدكتور ضايقك بحاجه؟ رد بزهق: _خنقني..ومبقتش عاوز اروح الجلسات دي، ولا حابب اكمل.. وتعبت وقرفت من الأدوية.. كفاية كده. بصتله شوية بتفكير بعدين قالت: _خلاص يا سيف زي ما تحب انا اكيد مش هقدر اغصبك على انك تكمل، الدكتور قال اهم شيء تكون راغب من جواك انك تتعالج وتبقى كويس. _وانا مش راغب ولا زفت. _طب ممكن تهدى! قولتلك خلاص متروحش تاني زي ما تحب. خبط على الباب خرجهم من كلامهم فلقت حسن اخوه.. ابتسمت بسماجه وقالت: _خير يا حسن؟ بصلها بغيظ: _خير يا مرات اخويا، أنا اللي كنت حابب أسألك خير؟ انا شايف في عربيه واقفة تحت البيت غريبة، بس سألت البواب قالي انها تخصكم، تخص مين بالضبط ان شاء الله؟ ابتسمت ببرود وردت: _تخصني.. اصل قولت أجيب عربية بدل ما كل مشوار ليا ولا لجوزي نطلب اوبر، مش مقامنا. جز علي سنانه بغيظ وسألها: _وعلى كده بتعرفي تسوقي؟ هزت راسها وقالت: _مانا روحت مدرسة سواقة، وخدت الكورس كامل، وطلعت الرخصة كمان.. فقولت أجيب العربية بقي. _وانتِ هتولدي امتى على كده؟ _مش عارفه لسه. رددتها بسماجة، فهز راسه بنار قايده جواه وقال: _لا تمام.. تمام يا مرات اخويا انا بس قولت افهم عربية مين دي، رغم ان كان ممكن توفري فلوسها واوصلكم انا.. -اوفر فلوسها ولا لأ هي في النهاية فلوس جوزي، فمش هتفرق معاك في حاجه. هز راسه كذا مره بغيظ قبل ما يمشي من قدامها. قفلت الباب وهي مبتسمه بزهو، عرفت ازاي تكسر شوكتهم، وتخليهم يتجنبوها، وده طبعا بفضل ملكية جوزها لكل حاجه. )-------- -لسه بيعيط برضو؟ قالتها وهي خارجه من الاوضه بعد ما نامت شويه بعد سهرة طويلة مع "آدم"، فابتسمت وهي شايفة "سيف" مشغول بين شيل ادم والرضعه اللي بيحضرها، وعمال يتحرك قدامه حركات بهلونية عشان يسكت... ضحكت بصوت على اخر حركه سيف عملها، فبصلها بتعب وهو بيقول: _بتضحكي! انا ناقص اتشعلق في السقف عشان البيه يرضى... قربت منهم وهي بتقول: _مش انتَ اللي قولتلي ادخلي ريحي وانا معاه! -مانتِ لازم ترتاحي برضو. -هو بس تعبان عشان بيسنن، عشان كده مزرجن. _معلش هو الله يكون في عونه برضو. جت تقرب منه وتشيله لكنه رفض وفضل متمسك برقبة سيف، فضحكت بتزمر وقالت: _يعني بقت كده؟ انتوا عملتوا حزب عليا؟ ضحك سيف وهو بيحضن ادم وقال: _تقريبا كده. رفعت حاجبها بخطر وقالت: _خلاص انا هجيب بنت المرة الجاية واعمل انا وهي حزب. لمعت عين سيف بشغف، وكأنه بيتمني تحقيق جملتها، وسكت شويه بيفكر بعدين قال: _كلمي الدكتور عاوز اكمل جلساتي. بصتله بدهشة وقالت: _ليه؟ اتنهد وهو بيقول: _اللي حصل من يومين مينفعش يحصل تاني يا شمس، يعني ايه تجري انتِ بآدم على الدكتور، وانا أفضل قاعد في العربيه وارفض ادخل معاكي، واقفل على نفسي العربية لحد ما ترجعي! لاحظت يومها ان الموقف ده أثر فيه جدا وفضل باقي اليوم مكتئب ولولا محاولاتها انها تخرجه من الحاله النفسيه دي كان فضل كده.. ردت بتحاول تواسيه: _حبيبي عادي ده بيحصل و.... _لا مش عادي، ومش بيحصل ولا ينفع يحصل، أنا كنت قاعد في العربيه هموت من الخوف عليكي وعليه، وكنت مش طايق الدنيا اني سايبك في موقف زي ده لوحدك، استحقرت نفسي اوي بس مقدرتش اخد الخطوه وانزل وادخلك... مش عاوز ده يحصل تاني يا شمس. قالها برجاء وزعل في اخر كلامه، فابتسمت وهي بتميل على كتفه بتسند راسها عليه: _خلاص هكلم الدكتور بكره ونروحله، وان شاء الله مش هيحصل الموقف ده تاني يا عيون شمس... باس راسها وهو بيضمها له: _بحبك. ابتسمت بحب: _مش اكتر مني.. وشمس عمرها ما تخيلت ان سيف يبقى نصيبها, ورفضت كتير لما خالتها عرضت عليها الموضوع, لكن قعدة واحده مع سيف قبل ما تاخد قرارها خلاها تحس ان الشخص ده عكس ما بيظهر, ورغم خوفها وقلقها من التجربة لكن ربنا هداها انها تخوضها.. ولولا تدابير ربنا ماكنش اتجمع بينهم! وسيف اللي ثار وغضب وقت ما عرف بقرار والدته, ورضخ في النهاية مستسلم من احساسه بعد ما قعد معاها انها شخص مسالم.. لقى رفيق الدنيا اللي يستاهله.. هي لحظة اختيار.. .بنعيش عليها عمرنا كله… تمت بحمد الله #

مقالات ذات صلة

نوني

فتخ عينه

جرحي ج1

أبويا الغني جوزني لممرض فقير

طرد

رواية روعة 2الاخير

اترك تعليقاً إلغاء الرد