ندي 3 الاخير

أحست ندى بحزنها وحسرتها في كلماتها فهي كالطفل الذي فضل قطعة الشوكولاته عن قطعة من الماسة لعدم معرفته قيمتها .

فربتت على يدها واردفت بتعاطف: متزعليش كدة ..صدقيني هما بيحبوكي ..مفيش ولاد مبيحبوش أمهم ..وافرحي كدة النهاردة خطوبة ابنك.

ثم استأذنت منها عندما رأت عمر يدخل من باب الفلة ….وتركتها مع ندمها وحسرتها .

إيمان لنفسها بحزن: رغم كل حاجه يا ندى لسه جايه تواسيني في ولادي اللي انا بعدتهم عنيى بإيدي

ثم تنهدت واكملت: مش كل الناس وحشه زيك ياايمان ..مش كل الناس وحشه.

ثم توجهت لتقف مع زوجها.

…………………………

عمر ليوسف وهما يتقدمون من الحفل: شايف اللي انا شايفه……بقولك ايه …قول لإبنك يبعد عن بنتي احسنله.

يوسف بإندهاش: انت ياأبني انت هتشلني….انا مش لسه مكلمك وانت وافقت !

عمر بغضب: ايوا يقفوا يرغوا مع بعض بالشكل دة لما يبقى يخطبها….لأ..لما يبقى يتجوزها كمان.

يوسف بيأس من صديقه: أها ..دانت هتعملنا فيها حمى وتقرفنا بقى من أولها.

عمر بتحذير: بقولك ايه قول لابنك يبعد عن بنتي …كله الا ريم ..فاهم.

يوسف بغضب مصتنع ممزوج بمرح: يا عم بقى قرفتني كل اما تشوفهم واقفين مع بعض
( يوسف وهو يقلد عمر بطريقه مضحكه)
كله الا ريم كله الا ريم قول لابنك يبعد عن بنتي

ما قولنا الولد عايز يتجوزها وكلنا عارفين ان هما لبعض من وهما صغيرين .

ثم هم بالمغادرة: اما اروح أشوف مراتي فين قبل مااتشل او اتجلط بسببك.

ضحك عمر على مرح صديقه الذي لم يتغير مع مرور السنين

ندى بعد أن تقدمت منه :ايه يا عمر كل ده،…النهاردة خطوبة أسر وتتأخر بالشكل ده.

عمر وهو يقبل رأسها بحب :أسف يا حبيبتي والله ،بس ابنك سايب الجريدة من الصبح وكان لازم انا ابقي مكانه هناك وأطمن على عدد بكرة قبل ما يروح المطبعة وبعدين أجي .

ندي : طب اتفضل بقي كلم أسر عشان بيسأل عليك من الصبح .

عمر وهو يمسك بيدها : حاضر يا قلبي ، تعالي معايا.

ثم أخذ بيدها وتوجهوا لمكان تواجد أسر و خطيبة .

……………………………..

عمر لأسر : مبروك يا عريس ، …..سايبني انا أتمرمط هناك لواحدي في الجريدة وأنت بدلع نفسك هنا مع القمر .

لمار خطيبة أسر : ميرسي يأنكل.

أسر وهو يقلدها : ميرسي يأنكل ……..، ده بينق علينا،…. بقولك ايه يا حج كفايا نق الله يخليك عشان بس الكوشة متولعش بينا .