سلمي 2
_ أنت عملت اللي قلت لك عليه صح
هز رأسه فأكملت
_ هل السنيورة اتضايقت ولا زعلت
هز رأسه بالنفي وقال بتفكير:
_ هي اتضايقت من السعر شوية.. بس فرحت في الآخر بس مردتش تقول
= طبيعي ما تقولش، بس فرحتها بتكفي عن شكرها يا أخينا موضوع البنات ده أنا أدرى بيه منك.. وزي ما خدت بكلامي أول مرة ونجح، يبقى اشتري مني دايماً واضمن إنك كسبان ولا اي كلام
_ آخر حاجة قلتيها لي معملتهاش.
بصت جنبه بتفكير وقالت:
_إيه هي دي
حكى لها موضوع السيارة والرجل وما فعلته ملك، ومع نهاية كلامه ارتسمت ابتسامة واسعة على وجه أميرة وقالت:
_ أنت مش واخد بالك هي عملت معاك إيه
= كان مفروض أوصلها زي ما قلتِ لي بس معلش مدرتش بنفسي..
_ يا غبي
تداركت كلامها بسرعة وهي تضرب جبينها بعدما نظر لها بحدة:
_ قصدي يا حبيبي… أنت مش عارف بنت الأصول دي عملت إيه دي بقت تسيطر عليك.. بيمعني زي الأسد لما بيغضب ويزير، ولما يشوف حبيبته قلبه يهدأ ويميل.. فاهم
أنهت كلامها بابتسامة، فيما نظر لها بتشنج من تشبيهها الأخير، وقال وهو يشير للخارج
_ امشي يا أميرة امشي.. أنا الغلطان إني كلمتك من الأول.
وقفت قدامه وحطت عينيها في عينيه وقالت:
= يا ابني افهمني.. قصدي إنها بقى ليها دور في حياتك.. (دخلت قلبك) ده المختصر وأنت مع عصبيتك الهايجة دي، هي بكلمة تخليك هادي وراسي مش قلتلي إنك كنت ناوي تضرب الراجل وهي وقفت قدامك وقالتلك عشان خاطري فلفيت ومعملتش حاجة ده معناه إن قلبك رضخ لها واستسلم.. فاهم
بص لها لثواني بصمت وهو يحلل كلامها في عقله، فقالت أميرة:
_هو أنا بكلم نفسي ولا كلامي صعب يتفهم ولا في اي
=معاكي حق
قالها فابتسمت وعادت للجلوس بجانبه من جديد:
_ أيوه كده.. قول بقى
بص قدامه وعينيه بتفتكر كل لحظة، ومع كل كلمة كانت ابتسامته بتزيد
= لما وقفت قدامي ساعتها، حسيت كأن النار اللي جوايا انطفت مرة واحدة… لما بصيت في عينيها توهت في سوادها الجميل.. كانت المرة الأولى اللي قلبي يجادلني ويقولي (بس) واستكنت ليه حقيقي…. شعور أول مرة أحس بيه ونفسي يتعاد تاني
مسحت أميرة دمعة زائفة وهي تقول بتأثر مصطنع:
_تصدق أثرت فيا يا واد عمي.. يا سلام على الشعور الجميل.. خليك ماشي على النمط ده، وكل مرة أسألك تقولي أشعار زي دي وأنا هكون مطمنة
