سلمي 2
ابتسمت وقالت:
= لأ، بس امبارح وأنا راجعة من عندكم للبيت هو شافني وحب يوصلني ورغينا شوية مع بعض، وخدت رقمه.
بص لها بحدة وقال:
_ واللي يخليكي تركبي معاه من الأول إيه وكنتوا بترغوا في إيه
بصت له بتعجب من طريقته المفاجئة وقالت:
= هو أصر عليا أركب معاه.. وبعدين في إيه مالك وشك اتغير كده ليه
بص الناحية التانية بضيق وقال:
_ مفيش حاجة يا ملك
استغربت منه وقالت بصوت واطي:
= “لا حول ولا قوة إلا بالله.. إيه الشخصية المتحولة كل دقيقة دي ربنا يكون في عوني معاه
وقالت بعدها وهي بتبعد عنه:
_أنا هركب وماشية دلوقتي، عاوز حاجة
لفت ولاقت العربية اللي وقفتها مش موجودة، فابتسم خالد وقال لها:
= أنتِ فاكرة إن العربية هتفضل واقفة كل ده مستنية نحكي قصة حياتنا دي أكيد مشيت من قبل ما نبتدي الحكاية أصلاً… وكمان مش قلت لك تعالي أجيب لك هدوم مكان اللي لابساه دي
ابتسمت وقالت:
_ يا ابني أنت مُصر تكسفني.. مينفعش تجيب لي حاجة زي دي، وكمان خلاص هدومي نشفت من الهوا فعادي خلاص.
بص حواليه وشاف محل هدوم قريب، ومسك إيديها وقال:
= معلش المرة دي مش هتحكم في أعصابي.. فـ يا أنا يا أنتِ دلوقتي
وجذبها من إيدها، فبصت للمكان اللي بص عليه وتنهدت وهزت رأسها بيأس منه ومشيت معاه لحد ما وصلوا، وقبل ما يدخلوا وقفت ورفعت إيديها:
_ لحظة واحدة.
وقف وبص لها باستفهام، فقالت موضحة:
= أرخص حاجة هتيجي قدام عيني هي دي اللي موافقة عليها، غير كده لأ.. تمام
قال لها بعدم اهتمام:
_ إن شاء الله
= بتكلم جد على فكره
_ وأنا بقولك إن شاء الله
بصت له بشك وبعدها قالت: أوك.. يلا بينا.
ودخلوا محل الهدوم، وفضلت تبص وتدور في المكان بتفكير، فجاءت لها بنت في عمرها أو أصغر قليلاً وقالت بابتسامة:
_ عاوزة مساعدة في حاجة حضرتك
بصت لها ملك بتشتت وقالت وهي بتفكر في السعر:
= بشوف لسه… هو إيه أرخص حاجة هنا
مفهمتش البنت سؤالها، وقبل ما تتكلم سبقها خالد بضيق من كلام ملك:
_ شوفي لها حاجة تكون على مقاسها ومناسبة ليها لو سمحتي
=تمام
وبعد ثواني كانت البنت شايلة فستانين؛ واحد أزرق والتاني بني. بصت ملك ثواني ورجعت تبص فوق، وقالت وهي بتشير بصبعها:
