سلمي 2

​سمع إصرارها من صوتها، فقرر يحكي كل اللي جواه كأنها فرصة للبوح لن تتكرر، وقال:

_ أنا بتعصب بسرعة من أقل حاجة… معرفش مالي وإيه اللي حصلي بالظبط، لكن من وأنا عندي 12 سنة وأتفه حاجة بتعصبني وتخرجني عن شعوري. رحت عند دكتور نفسي بس مدانيش علاج لحالتي، بالعكس كان بيضايقني أكتر، فرفضت أتعالج.. وبعدها بقيت آذي كل اللي حوليّ. وفي يوم كنت بلعب أنا ومهند في التليفون عادي، مش فاكر اللي حصل بالظبط، بس اللي فاكره إني حاولت أخنقه لدرجة إن وشه وصل للون الأزرق وكان بيلقط آخر أنفاسه، واللي أنقذه من إيدي كان أبويا. ومن ساعتها وأنا ملازم أوضتي، وبقت حياتي كلها في الأوضة دي، وفي حالة الزهق بقرأ الكتب اللي بقت ونيسي الوحيد… عشان كده لما دخلتي الأوضة اتعصبت واتضايقت كأنك لمستي حاجة غالية عليا.. وبس، من بعدها بقيت لوحدي وماليش دعوة بحد ولا حد ليه دعوة بيا، كأني مقطوع من شجرة.

​كانت مستمعة له بآذان صاغية، وبعد ما خلص هزت كتفها ببساطة وقالت:

_ اللي فيك ميختلفش كتير عن اللي أختي بتمر بيه يا خالد. الاختلاف مابينكم إن واحد خايف يواجه الدنيا لأنه خايف يأذي اللي حواليه، والتاني خايف يواجه الدنيا لأنه مش واثق في اللي حواليه وخايف الناس تأذيه اللي فيك ده يا خالد مش عيب، وأنا عارفة إنه مش بمزاجك، بس بإيدك تغيره وتتحكم فيه كمان، بس أنت بأفكارك دي بتخليه يسيطر عليك أكتر، وبكده محدش هيقدر يقرب لك ويتفاهم معاك.

​= طب ما أنا مش عارف أسيطر عليه، مش بإيدي وأنتِ ذات نفسك شوفتي لما كنا قاعدين في الكافيه اتعصبت وسحبت الكتاب من إيدك وأنتِ اتصدمتي من اللي عملته.

​هزت رأسها موافقة وقالت:

_ واستغربت كمان، بس أرجع وأقولك إن بإرادتك وعزيمتك تقدر تسيطر على الغضب اللي جواك مهما كانت صعوبته.. وحط في دماغك إن غضبك ده هو عدوك، مش عاوزك تكون سليم وعايش حياة جميلة، لا.. هو عاوز الكل يبقى ضدك، بيكرهوك وخايفين منك، فأنت حاربه وخليك أقوى منه. ومعنى إنك تحاربه يعني إنك تتحديه في كل حاجة.. تشوف اللي يعصبك وتمنع نفسك، وافتكر إن ده عدوك (العصبي) وقول لأ. تشوف حاجة باردة زي اللي عملته معاك خليك أبرد منها ووقّعها هي مش أنت.. ومهما كان الشخص، حتى لو كانت أميرة اللي مشوفتش زي برودها واستفزازها اتنين، خليك أنت قدها مرتين.. فاهمني