الماضي 2
” منا قلقت عليك ”
” قلقتي ازاي يعني ”
” استنيتك امبارح ومجيتش والصبح مكنتش موجود … انا مضايقاك في حاجه ؟”
” لاء طبعا هتضايقيني ليه … انا جيت البيت امبارح متأخر بس انتي كنتي نايمه … وصحيت الصبح بدري خرجت ”
” رنيت عليك كتير ومردتش عليا ”
” ده لاني كنت في meeting ”
” تمام ”
” يعني ضيعتي محاضراتك انهارده وامتحاناتك قربت ؟”
” عادي بقا … عايزه اتكلم معاك ”
شاور على كنبه وقال ” طب تعالي نقعد هنا ”
قعدوا عليها وقالها ” هاا … سامعك ”
سكتت شويه وقالت ” انت مش مجبر تكمل حياتك معايا ”
مفهمش تقصد ايه فقال ” وضحي تقصدي ايه ؟”
” قصدي لو لسه بتحبها احنا ممكن نتطلق عادي وانت ترجعلها ”
13
” معلش مش فاهم … انتي عايزه تتطلقي يعني ؟”
” انا بوفر عليك كلام ممكن تكون محتاج تقوله … لو انت عايز ترجعلها ولسه بتحبها يبقى نتطلق ”
” طيب … عشان ننهي الحوار ده … انا لو كنت ناوي ارجع مكنتش اتجوزتك … ده اولا … ثانيا … حتى لو انا وانتي اتطلقنا برضو مش هرجعلها … لانها بالنسبالي صفحه واتقفلت ومستحيل تتفتح … مستحيل … ثالثا … لو انتي فعلا عايزه تتطلقي فأنا اكيد مش هجبرك تعيشي معايا ”
” انا كنت بوفر عليك كلام مش اكتر … هو ده اللي كنت عايزه أقوله … خصوصا أن من امبارح وانت متغير ”
” انتي عارفه تعب ماما أنا اتفاجئت بيه … وده ضايقني … غير الباقي اكيد لازم يضايقني … وعموما اسف يستي بس امبارح كان يوم صعب ”
” لاء أنا اللي اسفه مش انت … كان المفروض اقدر اللي حصل بس انا غصب عني فكرت انك عايز تسيبني ”
” لو كنت ناوي اسيبك مكنتش قربت منك لحد دلوقتي … وفي الاول أنا مكنتش عايزك … بس دلوقتي انا مش عايز غيرك وعايز اكمل باقي حياتي معاكي ”
سكتت وابتسمت وهو قال ” بس في حاجه ”
بصتله بانتباه وهو قال ” ياريت تثقي فيا وفي كلامي … لو في بينا ثقه هنتحدي كل حاجه واي حاجه ”
” ثقه في ايه بالظبط ”
” ثقه فيا … انا عمري ما هعمل حاجه تضايقك … وهكون دايما وفي ليكي ”
” طب ليه بتقول كده ؟ ”
” يمكن تحتاجي كلامي في يوم ”
” بس انا اصلا بثق فيك … ومش محتاجه الكلام ده لاني عارفاه ”
” لو بتثقي فيا زي ما بتقولي مكنتيش جيتي وقولتي ننفصل ”
” بس انا قولت كده عشانك ”
” معناها انك مش واثقه فيا برضو … انا مش وحش لدرجة أني اسيب مراتي عشان واحده وبالسهوله دي ”
